Philippians (3) – ཕི་ལིབ་པཱི་པ། (3)    

1 མདོར་ན་སྤུན་ཟླ་རྣམས། གཙོ་བོའི་ངང་ནས་དགའ་བར་གྱུར་ཅིག ངས་དོན་འདི་རྣམས་ཡང་བསྐྱར་ཁྱེད་ཚོར་བྲིས་ན་ང་མི་བསུན་ཞིང༌། ཁྱེད་ཚོར་ཕན་ནོ།

2 ཁྱི་དང་འདྲ་བའི་མི་ངན་ཏེ་ཐར་པ་འཐོབ་པའི་ཕྱིར་ཡ་ཧུ་དཱ་པའི་ཆོས་ཀྱི་རྟགས་ངེས་པར་དུ་དགོས་ཞེས་པའི་མི་ལ་དོགས་ཟོན་གྱིས་ཤིག

3 གང་ཡིན་ཞེ་ན། ང་ཚོ་ནི་ཡ་ཧུ་དཱ་པའི་རྟགས་བདེན་པ་དང་ལྡན་ཏེ་དཀོན་མཆོག་གི་དམ་པའི་ཐུགས་ཉིད་ཀྱི་སྒོ་ནས་བསྙེན་བཀུར་བྱེད་ཅིང༌། མཱ་ཤི་ཀ་ཡེ་ཤུ་ལ་དགའ་བར་བྱེད་དེ་ཆོས་ཀྱི་རྟགས་ལེན་ལ་སོགས་པའི་མིའི་ལུགས་སྲོལ་ལ་མི་རྟེན།

4 དོན་དམ་དུ། ང་རང་ལ་མིའི་ལུགས་སྲོལ་ལ་རྟེན་པའི་རྒྱུ་མཚན་ཡོད། མི་གཞན་ཞིག་ལ་མིའི་ལུགས་སྲོལ་ལ་རྟེན་པའི་རྒྱུ་མཚན་ཡོད་བསམས་ན། ཁོ་ལས་ང་ལ་མང་བ་ཡོད།

5 ང་ནི་སྐྱེས་ནས་ཉིན་བརྒྱད་པར་ཡ་ཧུ་དཱ་པའི་ཆོས་ཀྱི་རྟགས་དང་ལྡན་ཏེ། ཡི་སི་ར་ཨེལ་མི་རིགས་ལ་གཏོགས་པ་དང༌། པེན་ཡ་མཱིན་ཚོ་པའི་མི་ཞིག ཤ་གཙང་རུས་གཙང་གི་ཡ་ཧུ་དཱ་པ་ཞིག ཆོས་ཁྲིམས་ཀྱི་ཆ་ནས་ཕཱ་རུ་ཤི་པ་ཞིག

6 ཆོས་ཚོགས་ལ་འབད་པའི་ཐོག་ནས་མནར་གཅོད་བྱེད་མཁན་ཡིན་ཏེ། ཆོས་ཁྲིམས་སྲུང་བའི་ཆ་ནས་སྐྱོན་མེད་པ་ཞིག་ཡིན།

7 འོན་ཀྱང་ངས་སྔར་ཁེ་ཕན་དུ་བརྩིས་པ་རྣམས་ད་ཆ་མཱ་ཤི་ཀའི་དོན་དུ་གྱོང་གུན་དུ་རྩི།

8 དེས་མ་ཟད་མཱ་ཤི་ཀ་ཡེ་ཤུ་ངའི་གཙོ་བོ་ངོ་ཤེས་པ་དེའི་བླ་ན་མེད་པའི་རིན་ཐང་གི་རྐྱེན་གྱིས་ངས་གཞན་ཐམས་ཅད་ཀྱང་གྱོང་གུན་དུ་རྩི། ཁོང་གི་ཆེད་དུ་ཐམས་ཅད་བརླག་མྱོང་ཞིང་དེ་ཚོ་གད་སྙིགས་སུ་རྩི། དེ་ནི་མཱ་ཤི་ཀ་འཐོབ་པའི་ཆེད་དང༌།

9 ཁོང་གི་ནང་ན་གནས་པའི་ཕྱིར་རོ། ཆོས་ཁྲིམས་སྲུང་བ་ལས་མ་ཡིན་ཏེ། མཱ་ཤི་ཀ་ལ་དད་པ་བྱེད་པའི་སྒོ་ནས་ང་ལ་དཀོན་མཆོག་དང་འབྲེལ་བ་ཡང་དག་པ་ཐོབ། དེ་ནི་དཀོན་མཆོག་ལས་འབྱུང་ཞིང༌། དད་པ་ལ་བརྟེན་ནོ།

10 ཁོང་ངོ་ཤེས་པ་དང༌། ཁོང་འཆི་བ་ནས་སླར་གསོན་པར་གྱུར་བའི་ནུས་མཐུ་ཤེས་པར་འདོད། ང་འཆི་བ་ཙམ་དུ་ཁོང་དང་མཉམ་པར་སྡུག་བསྔལ་མྱོང་བར་འདོད།

11 དེ་ནི་ཐབས་གང་གི་ཐོག་ནས་ང་འཆི་བ་ནས་སླར་གསོན་དུ་འགྱུར་བའི་ཕྱིར་རོ།།

དམིགས་ཡུལ་སྒྲུབ་པའི་སྐོར།

12 དོན་དེ་རྣམས་ཐོབ་ཟིན་པ་མ་ཡིན། ཡོངས་སུ་རྫོགས་པར་གྱུར་བ་ཡང་མ་ཡིན། འོན་ཏེ་མཱ་ཤི་ཀ་ཡེ་ཤུ་ཡིས་ང་དོན་གང་གི་ཕྱིར་བཟུང་བ་དེ་ངའི་འཛིན་པའི་ཕྱིར་འབད་རྩོལ་བྱེད།

13 སྤུན་ཟླ་རྣམས། ངས་དོན་དེ་རྣམས་ཐོབ་ཚར་བར་མི་རྩི་ཡང་ངས་འདི་གཅིག་པོ་བྱེད་དེ། གང་འདས་པ་བརྗེད་ནས་མ་འོངས་པ་ལ་གང་སྒྲུབ་པར་འབད་རྩོལ་བྱེད་པས།

14 དཀོན་མཆོག་གིས་མཱ་ཤི་ཀ་ཡེ་ཤུའི་སྒོ་ནས་ང་ཞིང་ཁམས་སུ་བོས་པའི་བྱ་དགའ་འཐོབ་པའི་ཕྱིར་ངས་དམིགས་ཡུལ་གྱི་ཕྱོགས་སུ་ཐད་ཀར་རྒྱུག་གོ

15 དེར་བརྟེན། ང་ཚོའི་ཁྲོད་ཀྱི་སྨིན་ཞིང་ཡོངས་སུ་རྫོགས་པར་འགྱུར་བ་རྣམས་ཀྱིས་དེ་ལྟར་སེམས་སྐྱེད་དགོས། ཡང་དོན་གཅིག་ལ་ལྟ་བ་མི་མཐུན་ན་དཀོན་མཆོག་གིས་དོན་དེའང་ཁྱེད་ལ་མངོན་པར་མཛད།

16 འོན་ཀྱང་ཐོབ་ཟིན་པའི་ཚད་གཞི་དེ་བཞིན་དུ་ང་ཚོས་སྤྱོད་པར་བྱེད་དགོས།

17 སྤུན་ཟླ་རྣམས། ཁྱེད་ཚོ་ཚང་མས་ང་མིག་དཔེར་འཛིན་ཅིང༌། ང་ཚོའི་དཔེ་ལྟར་མི་ཚེ་སྐྱེལ་བ་རྣམས་ལ་ལྟོས།

18 རྒྱུ་མཚན་ནི་མི་མང་པོས་མཱ་ཤི་ཀའི་རྒྱང་ཤིང་གི་དགྲ་བོ་ལྟར་སྤྱོད་པར་བྱེད། ངས་སྔར་ལན་མང་པོ་ཁོ་ཚོའི་སྐོར་ལ་ཁྱེད་རྣམས་ལ་སྨྲས་ཤིང༌། ད་ལྟའང་མིག་ལ་མཆི་མ་དང་བཅས་པར་བཤད་ཡོད།

19 ཁོ་ཚོ་འཇིག་པ་འགྱུར་ངེས་སོ། ཁོ་ཚོའི་ལྷ་ནི་སོ་སོའི་གྲོད་ཁོག་ཡིན། ཁོ་ཚོས་ངོ་ཚ་གྲགས་པར་འཛིན། འཇིག་རྟེན་འདི་ལ་བློ་གཅིག་ཏུ་སེམས།

20 འོན་ཀྱང་ངེད་རྣམས་ནི་དཀོན་མཆོག་གི་ཞིང་ཁམས་ཀྱི་མངའ་འབངས་ཡིན་ལ། དེ་ནས་འབྱོན་པའི་སྐྱབས་མགོན་ཞིག་སྟེ་གཙོ་བོ་ཡེ་ཤུ་མཱ་ཤི་ཀ་ང་ཚོས་ཡིད་རྟོན་ནས་སྒུག

21 དོན་ཐམས་ཅད་ཁོང་གི་དབང་འོག་ཏུ་སྒྱུར་ཐུབ་པའི་ནུས་མཐུའི་སྒོ་ནས་ང་ཚོའི་མིའི་ལུས་དམན་པ་འདི་ཡང་ཁོང་གི་གཟི་བརྗིད་དང་ལྡན་པའི་སྐུ་གཟུགས་དང་འདྲ་བར་མཛད་པར་འགྱུར་རོ།།

 

***************************************

Philippians (2) – ཕི་ལིབ་པཱི་པ། (2)    

1 ཁྱེད་ཚོ་ལ་མཱ་ཤི་ཀའི་ཐོག་ནས་སྐུལ་མ་གང་ཞིག་དང༌། བྱམས་པའི་སེམས་གསོ་དང༌། དམ་པའི་ཐུགས་ཉིད་ཀྱི་འགྲོགས་པ་དང༌། བརྩེ་སེམས་སམ་ཐུགས་རྗེ་བཅས་ཅིའང་ཡོད་ན།

2 བློ་སེམས་གཅིག་མཐུན་པ་དང༌། གཅིག་གིས་གཅིག་ལ་བརྩེ་བར་འཛིན་པ་དང༌། དམིགས་པ་གཅིག་མཐུན་གྱི་སྒོ་ནས་ངའི་དགའ་སྤྲོ་རྫོགས་པར་བྱེད་ཅིག

3 བྱ་བ་གང་ལ་ཡང་འགྲན་སེམས་སམ། ང་རྒྱལ་ཅིའང་མི་བྱེད་པར་དམའ་ས་བཟུང་སྟེ་རང་ལས་གཞན་རྣམས་གལ་ཆེ་བར་རྩིས།

4 མི་རེ་རེས་རང་དོན་ཁོ་ན་མ་གཉེར་བར་གཞན་གྱི་དོན་ཡང་གཉེར་དགོས། 5 མཱ་ཤི་ཀ་ཡེ་ཤུ་ཡིས་གང་དགོངས་པ་ལྟར་ཁྱེད་ཚོས་ཀྱང་སོམས་དགོས་ཏེ།

6 ཁོང་དང་དཀོན་མཆོག་ངོ་བོ་གཅིག་ཡིན་ཡང༌།།

དཀོན་མཆོག་མཉམ་པར་དེ་ལྟར་མི་འཛིན་པར།།

7 རང་གི་གཟི་བརྗིད་མངའ་ཐང་ཡོངས་དོར་ཏེ།།

བྲན་གཡོག་ཞིག་གི་ངོ་བོ་བླངས་ནས་ནི།།

མི་ཡི་རྣམ་པས་འཇིག་རྟེན་འདི་རུ་འཁྲུངས།།

8 མི་ཡི་རྣམ་པ་གྱུར་ནས་དམའ་ས་བཟུང༌།།

དཀོན་མཆོག་བཀའ་ལ་ཡོངས་སུ་ཉན་པར་མཛད།།

ཐ་ན་རྒྱང་ཤིང་སྟེང་དུ་གྲོངས་པ་འོ།།

9 དེའི་ཕྱིར་དཀོན་མཆོག་གིས་ནི་ཁོང་ཡོངས་སུ།།

འཕགས་ནས་མཚན་ཡང་ཀུན་ལས་མཐོ་བར་མཛད།།

10 དེས་ན་ཡེ་ཤུའི་མཚན་དེ་བརྗོད་པ་ཡིས།།

ས་སྟེང་ས་བླ་ས་འོག་ཐམས་ཅད་ཀུན།།

པུས་མོ་ས་ལ་བཙུགས་ཏེ་ཕྱག་འཚལ་ནས།།

11 ངག་གིས་ཡབ་ཆེན་དཀོན་མཆོག་བསྟོད་པའི་ཕྱིར།།

ཡེ་ཤུ་མཱ་ཤི་ཀ་ནི་གཙོ་བོ་རུ།།

ཡིན་པའི་ཁས་ལེན་ཡོངས་སུ་བྱ་བར་འགྱུར།།

འཇིག་རྟེན་འདི་ལ་འོད་སྣང་འཕྲོ་བ།

12 དེའི་ཕྱིར་ངའི་གཅེས་པའི་སྤུན་ཟླ་རྣམས། ཁྱེད་ཚོས་སྔར་ངའི་ཁ་ལ་རྟག་ཏུ་ཉན་པ་ལྟར། ང་དེར་ཡོད་པའམ། ཡང་ན་ད་ལྟ་དེར་མེད་པའི་དུས་སུ་སྔར་ལས་ལྷག་པར་འཇིགས་ཤིང་འདར་བའི་ངང་ནས་རང་ལ་ཐོབ་ཟིན་པའི་ཐར་པ་སྒྲུབས།

13 གང་ཡིན་ཞེ་ན། ཁྱེད་ཚོའི་ནང་ན་འཕྲིན་ལས་མཛད་མཁན་དཀོན་མཆོག་ཡིན་ཞིང༌། ཁོང་གང་ཐུགས་མཉེས་པ་དེ་འདོད་ཅིང་སྒྲུབ་པའི་ནུས་པ་ཁྱེད་ཚོར་གནང་ངོ༌།

14 ཡིད་མ་རངས་པའི་གཏམ་དང༌། ཁ་རྩོད་ཅིའང་མེད་པར་བྱ་བ་ཐམས་ཅད་བྱེད་ཅིག

15 དེ་ནས་ཁྱེད་ཚོ་སྐྱོན་མི་བརྗོད་པ་དང་ཉེས་པ་མེད་པ། དཀོན་མཆོག་གི་སྲས་དང་སྲས་མོ་དྲི་མ་མེད་པར་གྱུར་ནས། གཡོ་ཅན་དང་ལོག་པའི་མི་རབས་ཀྱི་ཁྲོད་དུ་འཇིག་རྟེན་ལ་འོད་སྣང་འཕྲོ་བ་ལྟར་སྟེ།

16ཁྱེད་ཚོས་ཚེ་སྲོག་གི་བཀའ་བཟུང་བའི་སྒོ་ནས་མཱ་ཤི་ཀའི་ཉིན་མོར་ངའི་ལས་སྟོང་རྒྱུགས་མིན་པ་དང་ངལ་རྩོལ་དེ་འབྲས་མེད་དུ་མ་གྱུར་བ་ངས་གཟེངས་མཐོན་པོས་བརྗོད།

17 འོན་ཀྱང༌། གལ་ཏེ་ཁྱེད་ཚོའི་དད་པའི་མཆོད་པ་དང་བསྙེན་བཀུར་གྲུབ་པའི་ཕྱིར་ངའི་ཁྲག་གསེར་སྐྱེམས་ཕུལ་བ་ལྟར་ཐོན་ན་ཡང༌། ང་དགའ་བ་མ་ཟད་ཁྱེད་ཚོ་ཐམས་ཅད་དང་མཉམ་དུ་དགའ་བར་བྱེད།

18 ཁྱེད་ཚོས་ཀྱང་དེ་ལྟར་དགའ་ཞིང་ང་དང་མཉམ་དུ་དགའ་བར་བྱེད་དགོས།

ཐི་མོ་ཐེའི་སྐོར།

19 ཁྱེད་ཚོའི་གནས་ཚུལ་ཐོས་ནས་ངའང་དགའ་བར་འགྱུར་བའི་ཕྱིར། གཙོ་བོ་ཡེ་ཤུའི་ཐོག་ནས་ངས་ཐི་མོ་ཐེ་ཁྱེད་ཚོའི་རྩར་མྱུར་དུ་གཏོང་བའི་རེ་བ་བྱེད།

20 རྒྱུ་མཚན་ནི་ཁྱེད་ཚོའི་དོན་ལ་བདེན་པར་སེམས་ཁུར་བྱེད་མཁན་ཁོ་དང་འདྲ་བ་ངའི་རྩར་གཞན་མེད།

21 ཁོ་ཚོས་གཞན་ཐམས་ཅད་ཡེ་ཤུ་མཱ་ཤི་ཀའི་དོན་དུ་མི་གཉེར་བར་རང་དོན་གཉེར།

22 འོན་ཀྱང་ཐི་མོ་ཐེའི་རིན་ཐང་ཆེ་བ་ཁྱེད་རྣམས་ཀྱིས་ཤེས་ཏེ། བུ་ཡིས་ཕ་དང་མཉམ་དུ་གང་བྱེད་པ་ལྟར་ཐི་མོ་ཐེ་ཡིས་ང་དང་མཉམ་དུ་འཕྲིན་བཟང་གི་ལས་ཀ་བྱས་པས་སོ།

23 དེའི་ཕྱིར་ང་ལ་དོན་གང་འབྱུང་བ་ཤེས་མ་ཐག་ཏུ་ཁོ་ཁྱེད་ཀྱི་རྩར་མྱུར་དུ་གཏོང་བའི་རེ་བ་ཡོད་ཅིང༌།

24 ངའང་རིང་པོར་མ་ལོན་པར་གཙོ་བོ་ལ་བརྟེན་ནས་དེར་སླེབས་ཐུབ་པའི་ཡིད་ཆེས་ཡོད།

ཨེ་པབ་རོ་དི་ཊུ་ཡི་སྐོར།

25 ངའི་སྤུན་ཟླ་དང་ལས་རོགས། དཔུང་གྲོགས། ཁྱེད་ཚོའི་བང་ཆེན་དང་ངའི་མཁོ་ཆས་སྒྲིག་མཁན་ཨེ་པབ་རོ་དི་ཊུ་ཁྱེད་ཚོའི་རྩར་ལོག་གཏོང་རྒྱུ་གལ་ཆེ་བར་སེམས།

26 གང་ལགས་ཤེ་ན། ཁྱེད་ཚོ་ཐམས་ཅད་ཤིན་ཏུ་དྲན་ཞིང༌། ཁྱེད་ཚོས་ཁོང་ནད་ཀྱིས་བཏབ་པའི་གཏམ་ཐོས་པས་ཁོང་སེམས་འཁྲུགས་པར་གྱུར།

27 དངོས་གནས་བྱས་ན་ཁོང་འཆི་ལ་ཉེ་བའི་ནད་ཀྱིས་བཏབ་ཀྱང༌། དཀོན་མཆོག་གིས་ཁོང་ལ་ཐུགས་རྗེ་གནང༌། ང་ལ་མྱ་ངན་སྟེང་དུ་མྱ་ངན་མ་འབྱུང་བའི་ཆེད་དུ་དཀོན་མཆོག་གིས་ཁོང་གཅིག་པུ་མ་ཟད་ང་ལ་ཡང་ཐུགས་རྗེ་གནང་བྱུང༌།

28 དེའི་ཕྱིར་ཁོང་ཁྱེད་ཚོའི་རྩར་དེ་བས་ཀྱང་ལོག་གཏོང་འདོད་ཡོད། དེ་ནས་ཁོང་དང་མཇལ་ནས་ཁྱེད་ཚོ་དགའ་བར་འགྱུར་ཞིང༌། ངའི་སེམས་ཁྲལ་ཡང་ཇེ་ཆུང་དུ་འགྲོ་བར་འགྱུར།

29 གཙོ་བོའི་ངང་ནས་དགའ་བར་བྱེད་དེ་ཁོང་ལ་སྣེ་ལེན་བྱེད་ཅིང༌། ཁོང་དང་འདྲ་བ་རྣམས་ལ་བཀུར་སྟི་བྱེད།

30 གང་ཡིན་ཟེར་ན། མཱ་ཤི་ཀའི་ལས་ཀྱི་དོན་ལ་ཁོང་འཆི་ལ་ཉེ་བ་ཙམ་བྱུང་ཞིང༌། ཁྱེད་ཚོའི་ཚབ་ལ་ང་ལ་གཡོག་བྱེད་པའི་ཕྱིར་ཉེན་ཁ་ཆེན་པོ་མྱོང་ངོ༌།།

 

*****************************************************

Philippians (1) – ཕི་ལིབ་པཱི་པ། (1)    

1 པའུ་ལུ་དང་ཐི་མོ་ཐེ་མཱ་ཤི་ཀ་ཡེ་ཤུའི་ཞབས་ཕྱི་གཉིས་ཀྱིས། ཕི་ལིབ་པཱི་གྲོང་ཁྱེར་དུ་མཱ་ཤི་ཀ་ཡེ་ཤུའི་ནང་ན་ཡོད་པའི་དཀོན་མཆོག་གི་མི་ཐམས་ཅད་དང༌། ཆོས་ཚོགས་ཀྱི་དོ་དམ་པ་དང་ལས་འཛིན་པ་རྣམས་ལ་འཕྲིན་ཡིག་འདི་ཕུལ་ལོ།

2 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག

བཀའ་དྲིན་ཆེ་ཞུ་བ།

3 ངས་ཁྱེད་ཚོ་དྲན་ཐེངས་རེ་རེར་ངའི་དཀོན་མཆོག་ལ་བཀའ་དྲིན་ཆེ་ཞུ།

4 ཁྱེད་ཚོ་ཐམས་ཅད་ཀྱི་དོན་ལ་གསོལ་བ་འདེབས་པའི་ཚེ་ངས་རྒྱུན་དུ་དགའ་བའི་ངང་ནས་སྨོན་ལམ་འདེབས།

5 དེ་ནི་ཉིན་དང་པོ་ནས་ད་ལྟའི་བར་དུ་ཁྱེད་ཚོས་འཕྲིན་བཟང་གི་ལས་བྱེད་པར་ང་ལ་རོགས་རམ་བྱས་པས་སོ།

6 ཁྱེད་ཚོའི་ཁྲོད་དུ་བྱ་བ་བཟང་པོ་འགོ་འཛུགས་མཁན་དཀོན་མཆོག་གིས་མཱ་ཤི་ཀ་ཡེ་ཤུ་སླར་འབྱོན་པའི་ཉིན་མོའི་བར་དུ་སྒྲུབ་པར་ཡང་མཛད་རྒྱུ་ཡིན་པ་དེ་ངར་ཡིད་ཆེས་ཡོད།

7 ངས་ཁྱེད་ཚོ་ཐམས་ཅད་ཀྱི་སྐོར་ལ་དེ་ལྟར་བསམས་ན་འོས་སོ། གང་ཡིན་ཟེར་ན། ཁྱེད་ཚོ་རྟག་ཏུ་ངའི་སེམས་ལ་གནས་ཏེ། ང་བཙོན་ལ་འཇུག་པ་དང༌། འཕྲིན་བཟང་གསལ་བཤད་བྱེད་པ་དང༌། མི་རྣམས་ཀྱི་དད་པ་བརྟན་པོར་བྱེད་པའི་ཆ་ནས་ཁྱེད་ཚོ་ནི་ང་དང་མཉམ་དུ་དཀོན་མཆོག་གི་ཐུགས་རྗེ་འཐོབ་མཁན་ཡིན།

8 ངས་མཱ་ཤི་ཀ་ཡེ་ཤུའི་ཐུགས་བརྩེ་ཡིས་ཁྱེད་ཐམས་ཅད་དྲན་པ་དེ་དཀོན་མཆོག་ངའི་དཔང་པོ་མཛད་མཁན་ཡིན།

9 ཡང་ངས་འདི་ལྟར་གསོལ་བ་འདེབས་ཏེ། ཁྱེད་ཚོའི་བྱམས་སེམས་དེ་ཤེས་རབ་དང་རྟོགས་པ་ཐམས་ཅད་ཀྱི་སྟེང་སྔར་ལས་ལྷག་པར་འཕེལ་ནས།

10 ཁྱེད་ཚོས་གང་མཆོག་ཡིན་པ་བླངས་ཏེ་མཱ་ཤི་ཀའི་ཉིན་མོའི་བར་དུ་བཅོས་མིན་དང་སྐྱོན་མེད་པར་འགྱུར་བའི་ཆེད་དང༌།

11 དཀོན་མཆོག་གི་གཟི་བརྗིད་དང་བསྟོད་པ་འཕེལ་བའི་ཕྱིར་ཡེ་ཤུ་མཱ་ཤི་ཀ་ལ་བརྟེན་ནས་རྣམ་པར་དག་པའི་འབྲས་བུ་ཡིས་ཁྱེད་ཚོ་གང་བར་འགྱུར།

འཕྲིན་བཟང་སྤེལ་བའི་སྐོར།

12 སྤུན་ཟླ་རྣམས། ང་ལ་གང་བྱུང་བ་དེས་དོན་དམ་དུ་འཕྲིན་བཟང་འཕེལ་བར་བྱས་པ་ཤེས་པར་གྱིས་ཤིག

13 གོང་མའི་རྒྱལ་པོའི་ཕོ་བྲང་གི་སྲུང་དམག་ཚང་མ་དང༌། གཞན་མི་ཐམས་ཅད་ཀྱིས་ང་མཱ་ཤི་ཀའི་དོན་ལ་བཙོན་དུ་བཅུག་པ་དེ་ཤེས་པར་གྱུར།

14མ་ཟད་ང་བཙོན་དུ་བཅུག་པའི་རྐྱེན་གྱིས་སྤུན་ཟླ་མང་ཆེ་བས་གཙོ་བོ་ལ་བརྟེན་ཏེ་དཀོན་མཆོག་གི་བཀའ་འཇིགས་པ་མེད་པར་སྒྲོག་པའི་བློ་སྟོབས་ཆེ་བར་གྱུར།

15 དོན་དམ་དུ་མི་ལ་ལས་མཱ་ཤི་ཀའི་ཆོས་སྟོན་པ་ནི་ཕྲག་དོག་ཅན་དང་ཁ་རྩོད་ལ་དགའ་མཁན་ཡིན་ཡང༌། ལ་ལས་སེམས་བཟང་པོ་ཡིས་ཆོས་སྟོན།

16 རྗེས་མ་རྣམས་ཀྱིས་བྱམས་སེམས་ཀྱི་ངང་ནས་མཱ་ཤི་ཀའི་ཆོས་སྟོན་པ་ནི། ང་འཕྲིན་བཟང་གསལ་བཤད་བྱེད་པའི་ཕྱིར་བསྐོས་པ་ཡིན་པ་ཤེས་པས་ཡིན།

17 འོན་ཀྱང༌། ང་བཙོན་ཁང་ལ་ཡོད་དུས་ང་ལ་སྡུག་པོ་གཏོང་བར་བསམས་ནས་སྔ་མ་རྣམས་ཀྱིས་སེམས་བཟང་ནས་མིན་པར་འགྲན་སེམས་ནས་ཆོས་སྟོན།

18 དེ་ལྟར་ཡིན་པར་ཅི་སྨྲ། སྔ་རྗེས་ཀྱི་བདེན་རྫུན་གང་ཡིན་ཡང་མཱ་ཤི་ཀའི་ཆོས་སྒྲོག་བཞིན་ཡོད་པས་ང་ད་ལྟ་དགའ་སྟེ། རྗེས་མའང་དགའ་བར་འགྱུར།

19 གང་ཡིན་ཞེ་ན། གནས་ཚུལ་འདི་ནི་ཁྱེད་ཚོའི་སྨོན་ལམ་དང༌། ཡེ་ཤུ་མཱ་ཤི་ཀའི་ཐུགས་ཉིད་ཀྱི་རོགས་རམ་བརྒྱུད་ནས་ང་སྐྱོབ་པའི་རྒྱུར་འགྱུར་བར་ངས་ཤེས།

20 ངས་སྙིང་ཐག་པ་ནས་རེ་སྨོན་བྱེད་པའི་དོན་གང་ལའང་ངོ་མི་ཚ་བར། ང་སྙིང་སྟོབས་ཆེན་པོས་གསོན་རུང་ཤི་རུང་སྔར་ལྟར་དུས་རྟག་ཏུ་མཱ་ཤི་ཀ་ངའི་ལུས་ཀྱི་སྒོ་ནས་འཕག་པར་འདོད།

21 གང་ལགས་ཟེར་ན། ང་ནི་འཚོ་བ་མཱ་ཤི་ཀའི་དོན་དུ་ཡིན། ཤི་ནའང་ལེགས་སོ།

22 གལ་ཏེ་ང་མུ་མཐུད་གསོན་པོར་གནས་ན་ངའི་བྱ་བར་མཱ་ཤི་ཀའི་དོན་དུ་འབྲས་བུ་དང་ལྡན་པ་ཡིན་པས། ཡང་སྙིང་ཤི་གསོན་གང་ཞིག་འདམ་རྒྱུ་ཡིན་པ་མི་ཤེས།

23 ང་ནི་ཐེ་ཚོམ་ནང་དུ་ཚུད། འཇིག་རྟེན་འདི་ལས་འདས་ཏེ་མཱ་ཤི་ཀ་དང་མཉམ་དུ་གནས་འདོད། འདི་ལས་ལྷག་པ་མེད་པས་སོ།

24 འོན་ཀྱང༌། ཁྱེད་ཚོར་ཕན་པའི་ཆེད་དུ་ང་གསོན་པོར་གནས་པ་དེ་བས་གལ་ཆེའོ།

25 དེའི་ཡིད་ཆེས་ཀྱི་ངེས་པ་རྙེད་དེ། ཁྱེད་ཚོ་དད་པའི་ནང་ཡར་སྐྱེད་དང་དགའ་བ་འབྱུང་བའི་ཕྱིར་ང་གསོན་པོར་གནས་ནས་མུ་མཐུད་ཁྱེད་ཚོ་ཐམས་ཅད་དང་མཉམ་དུ་སྡོད་པ་ངས་ཤེས།

26 དེ་ནི་ང་ཁྱེད་ཚོའི་རྩར་ཕྱིར་ལོག་སྐབས་ངའི་རྐྱེན་གྱིས་ཁྱེད་ཚོ་མཱ་ཤི་ཀའི་ཐོག་ནས་དེ་བས་དགའ་སྤྲོ་འཕེལ་བའི་ཆེད་དུ་ཡིན།

27 གང་ལྟར་ཁྱེད་ཚོས་བྱ་སྤྱོད་ཚང་མ་མཱ་ཤི་ཀའི་འཕྲིན་བཟང་དང་མཐུན་པར་གྱིས་ཤིག དེ་ནས་ང་ཁྱེད་ཚོ་དང་མཇལ་རུང་མི་མཇལ་རུང༌། ཁྱེད་ཚོ་བློ་སེམས་གཅིག་མཐུན་གྱི་སྒོ་ནས་བརྟན་པོར་གནས་ཤིང༌། འཕྲིན་བཟང་ལ་བརྟེན་པའི་དད་པ་དེའི་དོན་དུ་བློ་རྩེ་གཅིག་སྒྲིམ་གྱིས་བརྩོན་པའི་གཏམ་ངས་ཐོས་པར་འགྱུར།

28 དགྲ་བོ་རྣམས་ལ་གང་ཡིན་ཡང་མི་སྐྲག་པ་དེ་ནི་ཁོ་ཚོ་ལ་འཇིག་པ་དང༌། ཁྱེད་ཚོ་ལ་ཐར་པ་འབྱུང་བའི་སྔ་ལྟས་ཡིན། ཐར་པ་དེ་ནི་དཀོན་མཆོག་ནས་འབྱུང་བས་མ་འཇིགས་ཤིག

29 མཱ་ཤི་ཀ་ལ་དད་པ་བྱེད་པ་མ་ཟད། ཁོང་གི་དོན་ལ་སྡུག་བསྔལ་མྱོང་བའང་དཀོན་མཆོག་གིས་ཁྱེད་རྣམས་ལ་གནང་བ་ཡིན།

30 གང་ལགས་ཟེར་ན། ང་ལ་བྱུང་བའི་འཐབ་རྩོད་སྔར་མཐོང་བ་དང་ད་ལྟ་ཐོས་པ་དེ་བཞིན་ཁྱེད་ཚོ་ལའང་འབྱུང་ངོ༌།།

 

**********************************