James (5) – ཡ་ཀོབ། (5)

1 ད་ཁྱོད་ཕྱུག་པོ་རྣམས་ང་ལ་ཉོན་ཞིག ཁྱོད་ལ་འབབ་རྒྱུ་ཡིན་པའི་སྡུག་བསྔལ་གྱི་རྐྱེན་གྱིས་ངུས་ཤིང་སྨྲེ་སྔགས་ཐོན་ཞིག

2 ཁྱོད་ཀྱི་རྒྱུ་ནོར་རུལ་ཞིང༌། མུག་པས་གྱོན་གོས་བཟས་ཚར་རོ།

3 ཁྱོད་ཀྱི་གསེར་དང་དངུལ་ལ་གཡའ་ཆགས་ཤིང༌། གཡའ་དེས་ཁྱོད་ལ་སྐྱོན་ཡོད་པ་ར་སྤྲོད་བྱེད་ཅིང༌། མེ་ལྟར་ཁྱོད་ཀྱི་ཤ་སྲེག་པར་འགྱུར། དུས་ཀྱི་མཐའ་མར་ཁྱོད་ཀྱིས་རྒྱུ་ནོར་བསགས་སོ།

4 ཉོན་ཞིག ཁྱོད་ཀྱི་ཞིང་རྔ་མཁན་རྣམས་ཀྱི་གླ་ཆ་ཁྱོད་ཀྱིས་གཡོ་ཐབས་ཀྱིས་ཉར་བས་གླ་ཆ་དེས་འབོད་བཞིན་འདུག ཡང་དབང་ཀུན་དང་ལྡན་པའི་དཀོན་མཆོག་གིས་རྔ་མཁན་ཚོའི་སྐད་ངན་གསན།

5 ཁྱོད་ཚོས་འཇིག་རྟེན་འདིར་རང་འདོད་ལྟར་བདེ་བ་དང་རྒྱས་སྤྲོད་བྱེད་པའི་ངང་ནས་མི་ཚེ་བསྐྱལ་ཏེ། ཁྲིམས་གཅོད་ཀྱི་ཉིན་མོར་ཉེས་ཆད་ཕོག་ངེས་ཡིན།

6 ཁྱོད་ཀྱིས་ཉེས་མེད་ཀྱི་མི་རྣམས་ལ་ཁྲིམས་གཅོད་བྱས་ནས་བསད། ཁོ་ཚོས་ཁྱོད་ལ་རྒོལ་བར་མི་བྱེད།

བཟོད་སྒོམ་བྱེད་དགོས་པའི་སྐོར།

7 དེའི་ཕྱིར་སྤུན་ཟླ་རྣམས། གཙོ་བོ་མ་འབྱོན་པའི་བར་དུ་བཟོད་པར་བྱེད། སྟོན་ཆར་དང་དཔྱིད་ཆར་མ་འབབ་པའི་བར་དུ་ཞིང་པས་བཟོད་སྒོམ་བྱེད་དེ་ས་གཞི་ནས་འབྱུང་བའི་རིན་ཐང་ཆེ་བའི་ལོ་ཏོག་སྒུག་ཅིང་སྡོད་པའི་དཔེ་ལ་ལྟོས་ཤིག

8 ཁྱེད་ཀྱིས་ཀྱང་བཟོད་པར་བྱེད་དགོས། གཙོ་བོ་སླེབས་པར་ཉེ་བ་ཡིན་པས་ཡིད་སེམས་བརྟན་པོར་གནས་ཤིག

9 སྤུན་ཟླ་རྣམས། ཁྱེད་ཚོར་ཁྲིམས་གཅོད་མི་ཕོག་པའི་ཆེད་དུ་གཅིག་གིས་གཅིག་ལ་མ་རངས་པའི་གཏམ་མ་ཤོད། ལྟོས་ཤིག ཁྲིམས་དཔོན་སྒོའི་འགྲམ་ལ་བཞེངས་ནས་འདུག

10 སྤུན་ཟླ་རྣམས། ཁྱོད་ཚོས་གཙོ་བོ་དཀོན་མཆོག་གི་མཚན་གྱི་ཐོག་ནས་གསུངས་པའི་ལུང་སྟོན་པ་རྣམས་ནི་སྡུག་བསྔལ་མྱོང་དུས་བཟོད་པ་སྒོམ་པའི་མིག་དཔེར་ཟུངས་ཤིག

11 ང་ཚོས་བཟོད་སེམས་ཡོད་པའི་མི་རྣམས་ནི་བདེ་བར་རྩི། ཁྱེད་ཚོས་ཡོབ་ཀྱིས་བཟོད་སྒོམ་བྱས་པའི་སྐོར་ཐོས་མྱོང་ལ། མཐའ་མར་གཙོ་བོས་གང་མཛད་པ་ཡང་ཤེས། གང་ཡིན་ཟེར་ན། གཙོ་བོ་དཀོན་མཆོག་ནི་བྱམས་དང་ཐུགས་རྗེ་ཅན་ཡིན་པས་སོ།།

12 ངའི་སྤུན་ཟླ་རྣམས། ད་ཉོན་ཞིག གལ་ཆེ་ཤོས་ནི་དཀོན་མཆོག་གི་ཞིང་ཁམས་སམ། ས་གཞི་དཔང་དུ་མ་འཛུགས་ཏེ་མནའ་ཅིའང་མ་སྐྱོལ་ཞིག ཁྱེད་ཚོར་ཁྲིམས་གཅོད་མི་ཕོག་པའི་ཆེད་དུ་ཡིན་ན་ཡིན་དང་མིན་ན་མིན་གྱི་གཏམ་དྲང་པོ་ཤོད་ཅིག

སྨོན་ལམ་འདེབས་དགོས་པའི་སྐོར།

13 ཁྱོད་ཚོའི་ཁྲོད་དུ་སུ་ཞིག་ལ་སྡུག་བསྔལ་ཡོད་དམ། ཁོས་སྨོན་ལམ་འདེབས་དགོས། སུ་ཞིག་ལ་དགའ་སྤྲོ་ཡོད་དམ། ཁོས་བསྟོད་གླུ་ལེན་དགོས།

14 ཁྱེད་ཚོའི་ནང་ན་ནད་པ་ཡོད་དམ། ཁོས་ཆོས་ཚོགས་ཀྱི་འགན་འཁུར་བ་རྣམས་བོས་ནས་ཁོང་ཚོས་གཙོ་བོའི་མཚན་གྱི་ཐོག་ནས་ནད་པར་སྣུམ་འབྱུག་སྟེ་སྨོན་ལམ་འདེབས་དགོས།

15 དཀོན་མཆོག་ལ་དད་པའི་ངང་ནས་འདེབས་པའི་སྨོན་ལམ་གྱིས་ནད་པ་དེ་ནད་ལས་ཐར་བར་འགྱུར་ཞིང༌། གཙོ་བོས་ཁོ་གསོ་བར་མཛད། གལ་ཏེ་ནད་པ་དེས་སྡིག་ཉེས་ཀྱི་ལས་བྱས་པ་ཡིན་ན་སེལ་བར་འགྱུར།

16 དེའི་ཕྱིར་ཁྱེད་ཀྱི་སྡིག་ཉེས་གཅིག་གིས་གཅིག་ལ་ཁས་བླངས་ཤིང༌། ནད་ལས་ཐར་བར་འགྱུར་བའི་ཕྱིར་ཕན་ཚུན་སྨོན་ལམ་ཐོབ་ཅིག དྲང་ལྡན་པ་ཞིག་གི་སྨོན་ལམ་ལ་བྱ་བ་སྒྲུབ་ཐུབ་པའི་དབང་ཤུགས་ཆེན་པོ་ཡོད།

17 ལུང་སྟོན་པ་ཨེ་ལི་ཡཱ་ནི་ང་ཚོའི་རང་གཤིས་དང་འདྲ་བ་ཞིག་ཡིན་ཏེ། ཆར་པ་མི་འབབ་པའི་སྨོན་ལམ་ནན་གྱིས་བཏབ་པས་ལོ་གསུམ་དང་ཟླ་བ་དྲུག་གི་བར་དུ་ས་ལ་ཆར་པ་མ་བབས།

18 དེ་ནས་ཁོང་གིས་ཡང་བསྐྱར་སྨོན་ལམ་བཏབ་པས། ནམ་མཁའ་ནས་ཆར་པ་བབས་ཤིང་ས་གཞི་ནས་འབྲས་བུ་སྐྱེས།

19 ངའི་སྤུན་ཟླ་རྣམས། ཁྱེད་ཚོའི་ནང་ནས་སུ་ཞིག་གིས་འཕྲིན་བཟང་གི་བདེན་པའི་ལམ་སྤངས་པ་དེ། གཞན་གྱིས་ཁོ་ལེགས་བཅོས་བཏང་ན།

20 སྡིག་ཉེས་ཅན་ཞིག་ནོར་བའི་ལམ་ནས་ཚུར་འཁྲིད་མཁན་དེས་སྡིག་ཅན་གྱི་སེམས་འཆི་བ་ལས་ཐར་བར་བྱེད་ཅིང༌། སྡིག་ཉེས་མང་པོ་སེལ་དུ་འཇུག་པ་དེ་ཤེས་པར་གྱིས་ཤིག ། །།

 

******************************************

James (4) – ཡ་ཀོབ། (4)

1 ཁྱོད་ཚོའི་ཁྲོད་དུ་རྩོད་པ་དང་འཁྲུག་པ་གང་ནས་འབྱུང༌། ཁྱོད་ཚོའི་སེམས་ནང་དུ་འཐབ་བཞིན་པའི་འདོད་ཆགས་ནས་མ་འབྱུང་ངམ།

2 འདོད་ཆགས་ཀྱིས་གང་འདོད་པ་མི་འཐོབ་པས་ཁྱོད་ཚོས་མིའི་སྲོག་གཅོད། ཧམ་འདོད་བྱས་ནས་གང་འདོད་པ་མི་འཐོབ་པས་རྩོད་ཅིང་འཁྲུག ཁྱོད་ཚོས་དཀོན་མཆོག་ལ་གསོལ་བ་མི་འདེབས་པའི་རྐྱེན་གྱིས་གང་འདོད་པ་མི་འཐོབ།

3 ཁྱོད་ཚོས་གསོལ་བ་འདེབས་ཀྱང་མི་འཐོབ། གང་ཡིན་ཟེར་ན། གང་འཐོབ་པ་དེ་རང་གི་འདོད་པ་ལྟར་སྤྱོད་པའི་ཕྱིར་དང་ཀུན་སློང་ངན་པའི་སྒོ་ནས་གསོལ་བ་འདེབས་པས་སོ།

4 དམ་ཚིག་མི་སྲུང་མཁན་ཁྱོད་རྣམས། འཇིག་རྟེན་འདི་ལ་ཆགས་པ་ནི་དཀོན་མཆོག་ལ་སྡང་བ་ཡིན་པ་མི་ཤེས་སམ། དེའི་ཕྱིར་སུ་ཡང་འཇིག་རྟེན་གྱི་གྲོགས་པོར་འགྱུར་འདོད་པ་དེ་དཀོན་མཆོག་གི་དགྲ་བོར་འགྱུར།

5 ཡང་ན་དཀོན་མཆོག་གིས་ང་ཚོར་གནས་སུ་བཅུག་པའི་སེམས་ནི་ཕྲག་དོག་གིས་གང་ཞེས་པའི་གསུང་རབ་ནང་གི་བཀའ་དེ་དོན་མེད་པར་སེམས་སམ།

6 འོན་ཀྱང་ཁོང་གིས་དེ་ལས་ལྷག་པའི་ཐུགས་རྗེ་གནང༌། དེའི་ཕྱིར་གསུང་རབ་ཀྱི་མདོ་ལས།

དཀོན་མཆོག་གིས་ནི་ང་རྒྱལ་ཅན་ལ་རྒོལ།།

ཉམས་ཆུང་རྣམས་ལ་ཐུགས་རྗེ་གནང་བར་མཛད།།

ཅེས་གསུངས་སོ།

7 དེའི་ཕྱིར་ཁྱོད་རྣམས་ཀྱིས་དཀོན་མཆོག་གི་བཀའ་སྲུང་ཞིག བདུད་ལ་རྒོལ་བར་བྱེད་ཅིང༌། ཁོ་འབྲོས་པར་འགྱུར།

8 དཀོན་མཆོག་དང་ཉེ་བར་སོང་དང༌། ཁོང་ཁྱོད་དང་ཉེ་བར་འབྱོན་པར་འགྱུར། སྡིག་ཉེས་ཅན་གྱི་མི་ཚོ། ཁྱོད་ཚོའི་ལག་པ་གཙང་བར་བྱོས་ཤིག བློ་རྩེ་གཉིས་ཅན་གྱི་མི་རྣམས། ཁྱོད་ཚོའི་སེམས་གཙང་བར་བྱོས་ཤིག

9 མྱ་ངན་བྱེད་དེ་ངུས་ཤིང་སྨྲེ་སྔགས་ཐོན་ཞིག ཁྱོད་ཚོའི་གད་མོ་ནི་ངུ་འབོད་དང༌། ཁྱོད་ཚོའི་སྐྱིད་པོ་ནི་ཡིད་འཕམ་པར་སྒྱུར་ཞིག

10 གཙོ་བོ་དཀོན་མཆོག་གི་སྤྱན་སྔར་རང་གིས་རང་ལ་དམའ་ས་བཟུང་ཞིང༌། ཁོང་གིས་ཁྱོད་ལ་མཐོ་བར་མཛད་དོ།།

11 སྤུན་ཟླ་རྣམས། གཅིག་གིས་གཅིག་ལ་དམའ་འབེབས་མ་གཏོང་ཞིག སྤུན་ཟླ་ལ་དམའ་འབེབས་གཏོང་བའམ་སྐྱོན་འདོགས་བྱེད་པ་དེ་བཀའ་ཁྲིམས་ལ་དམའ་འབེབས་གཏོང་ཞིང་སྐྱོན་འདོགས་བྱེད་པ་ཡིན། འོན་ཀྱང་བཀའ་ཁྲིམས་ལ་དམའ་འབེབས་བཏང་ན། ཁྱོད་ནི་བཀའ་ཁྲིམས་སྒྲུབ་མཁན་མིན་ཏེ་སྐྱོན་འདོགས་བྱེད་མཁན་ཡིན།

12 ཐར་ཞིང་མེད་པར་མཛད་ཐུབ་པའི་ཁྲིམས་འགོད་པ་དང་ཁྲིམས་དཔོན་གཅིག་རང་ཡིན་པས། ཁྱིམ་མཚེས་ལ་སྐྱོན་འདོགས་བྱེད་ནུས་པ་ཁྱོད་སུ་ཡིན།

13དེ་རིང་ཡང་ན་སང་ཉིན་གྲོང་ཁྱེར་ཞིག་ལ་ཕྱིན་ནས་ལོ་གཅིག་གི་བར་དུ་ཉོ་ཚོང་བྱེད་པ་ལ་ཁེ་བཟང་འཐོབ་པར་འགྱུར་ཞེས་ཟེར་མཁན་ཁྱོད་རྣམས་ད་ཉོན་ཞིག

14 སང་ཉིན་ཅི་ལྟར་ཡིན་མིན་ཁྱོད་ཚོས་མི་ཤེས། ཁྱོད་ཀྱི་མི་ཚེ་ཅི་ལྟར་ཡིན། ཁྱོད་ནི་དུས་ཐུང་ངུ་མངོན་ཏེ་མི་སྣང་བར་འགྱུར་བའི་སྨུག་པ་ལྟར་ཡིན།

15 ཁྱོད་ཀྱིས་ “གཙོ་བོ་དཀོན་མཆོག་གི་དགོངས་པ་ཡིན་ན། ང་ཚོ་གསོན་པར་འགྱུར་ཞིང་འདི་དང་འདི་ལྟ་བུ་ཞིག་བྱེད་པར་བྱའོ་” ཞེས་ཟེར་དགོས།

16 འོན་ཀྱང་ད་ལྟ་ཁྱོད་ཚོས་ཁེངས་དྲེགས་ངང་ནས་འུད་ཤོབ་བྱེད། དེ་ལྟར་གྱི་གཏམ་ཐམས་ཅད་ངན་པ་ཡིན།

17 དེ་བས་ན། བཟང་པོ་ཤེས་ཀྱང་མི་སྒྲུབ་མཁན་དེས་སྡིག་ཉེས་ཀྱི་ལས་བྱེད་པའོ།།

 

*************************************************

James (3) – ཡ་ཀོབ། (3)

1 ངའི་སྤུན་ཟླ་རྣམས། ཁྱེད་ཚོའི་ཁྲོད་དུ་མི་མང་པོ་ཆོས་སློབ་མཁན་དུ་འགྱུར་མི་རུང༌། གང་ཡིན་ཟེར་ན། ང་ཚོ་སློབ་མཁན་ནི་ཁྲིམས་ལྷག་པར་དམ་པོ་གཅོད་པར་འགྱུར་བ་ཁྱེད་ཀྱིས་ཤེས།

2 ང་ཚོ་ཚང་མས་དོན་མང་པོར་འཕྱུགས་པས། སུ་ཡང་གཏམ་ལ་མ་འཕྱུགས་པ་དེ་མ་ཚང་བ་མེད་པ་ཞིག་ཡིན་ཏེ་ལུས་ཧྲིལ་པོའང་གཅུན་ཐུབ་བོ།

3 ཡང་རྟ་གཅུན་པའི་ཕྱིར་ཁ་ལ་སྲབ་གཡོགས་ན་དེའི་ལུས་ཧྲིལ་པོའང་གཅུན་ཐུབ།

4 ཡང་དཔེ་གཞན་ཞིག་གྲུ་གཟིངས་ལ་བལྟས་ན། དེ་ཚོ་ཆེ་ཞིང་རླུང་ཆེན་གྱིས་འདེད་ཀྱང༌། མཇུག་གི་སྐྱ་བོ་ཆུང་ཆུང་གིས་གྲུ་པའི་འདོད་པ་ལྟར་གྱི་སར་ཁ་ལོ་སྒྱུར་ཐུབ།

5 དེ་བཞིན་ལྕེ་ནི་ལུས་ཀྱི་ཡན་ལག་ཆུང་ཆུང་ཞིག་ཡིན་ཡང་དོན་ཆེན་གྱི་སྐོར་འུད་ཤོབ་བྱེད། མེ་ཆུང་ངུ་ཞིག་གིས་ཅི་ལྟར་ཆེ་བའི་ཤིང་ནགས་སྲེག

6 ཡང་ལྕེ་ནི་མེ་སྟེ། ང་ཚོའི་ཡན་ལག་གི་ནང་ནས་ལྕེ་དེས་དྲང་པོ་མེད་པའི་འཇིག་རྟེན་མཚོན། དེས་ལུས་ཧྲིལ་པོ་མི་གཙང་བར་བྱེད་ཅིང༌། མི་ཚེའི་འཁོར་ཆ་ཚང་སྤར་བ་དང༌། དམྱལ་ཁམས་ཀྱིས་མེ་ཡིན་པའི་ལྕེ་སྤར་རོ།

7 མིའི་རིགས་ཀྱིས་གཅན་གཟན་དང༌། བྱ་བྱིའུ། ལྟོ་བགྲོད། རྒྱ་མཚོའི་སྲོག་ཆགས་རིགས་ཀུན་འདུལ་བར་བྱེད་ཅིང༌། བཏུལ་ཟིན་ཀྱང༌།

8 སུས་ཀྱང་ལྕེ་འདུལ་མི་ཐུབ། དེ་ནི་མི་བརྟན་པ་དང་ངན་པ་ཡིན་ཏེ། སྲོག་ལེན་དུག་ཆུ་ཡིས་གང༌།

9 ང་ཚོས་ལྕེ་ཡིས་ང་ཚོའི་གཙོ་བོ་ཡིན་པའི་ཡབ་ལ་བསྟོད་བསྔགས་བྱེད་ཅིང༌། ལྕེ་ཡིས་དཀོན་མཆོག་གི་དཔེ་རུ་བཀོད་པའི་མི་རྣམས་ལ་དམོད་མོ་ཡང་འདེབས་པས།

10 ཁ་གཅིག་ནས་བསྟོད་པ་དང་དམོད་མོ་གཉིས་ཀ་འཐོན། ངའི་སྤུན་ཟླ་རྣམས། དེ་ལྟར་མི་རུང་ངོ༌།

11 ཆུ་མིག་གི་ཁ་གཅིག་ལས་འཐུང་ཆུ་དང་ཚྭ་ཆུ་གཉིས་ཀ་འཐོན་ནམ།

12 ངའི་སྤུན་ཟླ་རྣམས། བསེ་ཡབ་ཟེར་བའི་ཤིང་སྡོང་ལས་སྐྱུར་རུའམ། རྒུན་འབྲུམ་ཤིང་ལས་བསེ་ཡབ་སྐྱེ་མི་སྲིད་པ་ལྟར། དེ་ལྟར་ཚྭ་ཆུ་ལས་འཐུང་ཆུ་འབྱུང་བར་མི་སྲིད།

དཀོན་མཆོག་གི་ཞིང་ཁམས་ནས་འབྱུང་བའི་ཤེས་རབ།

13 ཁྱེད་ཚོའི་ནང་ནས་མཁས་ཤིང་བློ་གྲོས་ཅན་སུ་ཡིན། མི་དེས་སྤྱོད་ལམ་བཟང་པོ་དང༌། ཤེས་རབ་ལས་བྱུང་བའི་སེམས་དུལ་པོའི་སྒོ་ནས་སྟོན་དགོས།

14 འོན་ཀྱང་ཁྱོད་ཚོའི་སེམས་ལ་ཕྲག་དོག་དྲག་པོ་དང་འདོད་པ་ཚ་པོ་ཡོད་ན། རང་གི་ཤེས་རབ་སྐོར་འུད་ཤོབ་བྱེད་པའི་སྒོ་ནས་རྫུན་གཏམ་མ་ཤོད་ཅིག

15 འདི་ལྟར་གྱི་ཤེས་རབ་ནི་དཀོན་མཆོག་གི་ཞིང་ཁམས་ནས་འབབ་པ་མ་ཡིན་ཏེ། འཇིག་རྟེན་འདིའི་ཤེས་རབ། སྡིག་ཉེས་འདོད་པའི་ཤེས་རབ། བདུད་ཀྱི་ཤེས་རབ་ཡིན་ནོ།

16 གང་ཡིན་ཞེ་ན། ཕྲག་དོག་དང་འདོད་པ་ཚ་པོ་ཡོད་སར་མི་མཐུན་པ་དང་ངན་སྤྱོད་ཀུན་ཡང་ཡོད།

17 འོན་ཀྱང་དཀོན་མཆོག་གི་ཞིང་ཁམས་ནས་བྱུང་བའི་ཤེས་རབ་ནི་དང་པོར་བཅོས་མིན་དང༌། གཉིས་པར་ཞི་བདེ་ལ་དགའ་བ། དེ་བཞིན་སེམས་དུལ་པོ། ཡ་རབས། སྙིང་རྗེ་འབྲས་བཟང་དང་ལྡན་པ། ཕྱོགས་རིས་སམ་ཁ་བཤད་དོན་ལ་མི་གནས་པ་ཅི་ཡང་མེད་པ་ཞིག་ཡིན།

18 ཡང་ཞི་བདེ་སྐྲུན་མཁན་གྱིས་ཞི་བའི་ངང་ནས་ས་བོན་བཏབ་སྟེ་ཡང་དག་པའི་འབྲས་བུ་འཐོབ་བོ།།

 

******************************************************