གསུང་མགུར 12:6, Psalm 12:6

6གཙོ་བོ་དཀོན་མཆོག་ཉིད་ཀྱི་དམ་བཅའ་རྣམས་བློ་གདེང་བྱ་འོས་སོ།

དེ་ནི་ལན་གྲངས་བདུན་ཙམ་མེར་སྲེག་བཏང་བའི་རིན་ཆེན་དངུལ་དང་མཆུངས་ཤིང་བཅོས་མིན་ལགས།

གསུང་མགུར 11:4-7, Psalm 11:4-7

4གཙོ་བོ་དཀོན་མཆོག་རང་གི་མཆོད་ཁང་དམ་པར་བཞུགས།

ཁོང་གི་བཞུགས་ཁྲི་མཐོ་རིས་གནས་སུ་ཡོད། ཁོང་གིས་ག་ས་ག་ལ་མི་ཚོར་གཟིགས་པ་དང།

དེ་ཚོས་བྱེད་པའི་ལས་རྣམས་མཁྱེན།

5བཟང་ངན་གཉིས་ཀར་ཁོང་གིས་བརྟག་དཔྱད་མཛད། ཚུལ་མིན་ཁྲིམས་འགལ་རྣམས་ལ་ཁོང་གིས་ཐུགས་ནས་སྡང་བར་དྲག་པོ་གནང་བར་མཛད།

6མི་ངན་རྣམས་ཀྱི་ཐོག་ཏུ་ཁོང་ཉིད་ཀྱིས། མེ་དང་མུ་ཟི་གནམ་ནས་འདེབས་པར་མཛད།

རླུང་ཚ་པོས་དེ་ཚོར་ཉེས་ཆད་གནང་།

7གཙོ་བོ་དཀོན་མཆོག་ཐུགས་གཤིས་དྲང་པོ་ལགས། ཁོང་ནི་ལས་བཟང་མཁོ་ནར་ཐུགས་མཉེས་པས།

བཟང་པོ་བྱེད་མཁན་ཁོང་གི་སྤྱན་སྔ་རུ། གསོན་པོར་འཚོ་ཞིང་གནས་པར་འགྱུར་ལགས་སོ༎

གསུང་མགུར 10:16-18, Psalm 10:16-18

16གཙོ་བོ་དཀོན་མཆོག་ནི་དུས་རྒྱུན་གྱི་ཆེད་དུ་རྒྱལ་པོ་ཡིན།

ལྷ་རྟེན་གཞན་ལ་མཆོད་མཁན་མི་རྣམས་ནི། ཁོང་གི་ཡུལ་ནས་ཡོངས་སུ་སྟོངས་པར་འགྱུར།

17ཀྱེ་གཙོ་བོ་དཀོན་མཆོག་ཁྱེད་ནི་ཉམ་ཐག་གིས། སྨོན་འདུན་བྱས་པའི་སྙན་ཆོག་གསན་མཛད་དེ།

དེ་ཚོར་སེམས་ཤུགས་གནང་བར་འགྱུར།

18མནར་སྤྱོད་ནང་དུ་ཚུད་པའི་མི་རྣམས་དང་། དྭ་ཕྲུག་རྣམས་ཀྱི་ངུས་འབོད་ཁྱེད་ཀྱིས་གསན།

ཉིད་ཀྱིས་དེ་ཚོའི་ཕྱོགས་གཏོགས་མཛད་གནང་ཏེ། ཞལ་ཆེ་གཅོད་པར་མཛད་པའི་རྐྱེན་གྱིས་ནི།

སྐྱེ་བོ་མི་རྟག་པའི་མི་རྣམས་ཀྱིས་ནམ་ཡང་འཇིགས་སྐྲག་བསྐུལ་མི་ནུས༎