Genesis (8) – བཀོད་པ (8)

1 འོན་ཀྱང་དཀོན་མཆོག་གིས་ད་དུང་ནོ་ཨ་དང་གྲུའི་ནང་ཡོད་པ་ཐམས་ཅད་ལ་དགོངས་པ་བཞེས་ཏེ། ཆུའི་སྒང་ལ་རླུང་ཞིག་རྒྱུག་བཅུག་པ་དང་ཆུ་དམའ་བར་འགྲོ་བཞིན་ཡོད་པ་མ་ཟད།

2 རྒྱ་མཚོ་ཆེན་པོའི་གཏིང་གི་ཆུ་མིག་དང་ནམ་མཁའི་ཆུ་སྒོ་བཀག་ནས་དྲག་ཆར་ཆད།

3 ཉི་མ་བརྒྱ་དང་ལྔ་བཅུའི་རིང་ལ་ཆུ་དལ་པོར་ཉུང་ཕྲིས་ཏེ།

4 ཟླ་བ་བདུན་པའི་ཚེས་བཅུ་བདུན་གྱི་ཉིན་ཨ་ར་རཌ་ཟེར་བའི་ཡུལ་གྱི་རི་རྒྱུད་ཀྱི་སྟེང་ལ་གྲུ་དེ་བསྡད།

5 ཆུ་དེ་དམའ་བར་འགྲོ་བཞིན་ཡོད་པ་དང་ཟླ་བ་བཅུ་པའི་ཉིན་དང་པོར་རིའི་རྩེ་རྣམས་ཐོན།

6 ཉི་མ་བཞི་བཅུའི་རྗེས་སུ་ནོ་ཨས་གྲུའི་སྒེ་ཁུང་ཕྱེ་ནས།

7 ཕོ་རོག་ཞིག་གློད་དེ་ས་མ་སྐམ་པའི་ཙམ་ལ་ཕར་ཚུར་ཕུར་རོ།

8 དེ་ནས་ཡང་ཆུ་རྣམས་སྐམ་ཡོད་མེད་ཤེས་ཕྱིར་ནོ་ཨས་ཕུག་རོན་གཅིག་བཏང་ནས།

9 ས་ཐམས་ཅད་ལ་ད་དུང་ཡང་ཆུ་ཡོད་པས། ཕུག་རོན་དེ་ལ་སྡོད་ས་མེད་པའི་རྐྱེན་གྱིས་གྲུའི་རྩར་ལོག་ནས་ཡོང་ཤིང༌། ནོ་ཨས་ལག་པ་བརྐྱངས་ནས་ཕུག་རོན་བཟུང་སྟེ་གྲུའི་ནང་བཞག

10 ཉི་མ་བདུན་གྱི་རྗེས་སུ་ཁོང་གིས་ཡང་བསྐྱར་ཕུག་རོན་ཞིག་ཕྱི་རོལ་དུ་བཏང་བས།

11 ཕུག་རོན་དེ་དགོང་དྲོ་ལོག་ཡོང་ནས། ཤིང་སྐྱུར་རུའི་ལོ་མ་སོས་པ་ཞིག་མཆུ་ཏོར་ཁྱེར་ཡོད་པ་མཐོང་སྟེ། ཆུ་དམའ་རུ་ཕྱིན་ཡོད་པ་ནོ་ཨས་ཤེས།

12 དེ་ནས་ཡང་ཁོང་གིས་ཉི་མ་བདུན་བསྒུགས་ནས་ཕུག་རོན་ཞིག་བཏང་བས། དེ་ཁོང་གི་རྩར་ཕྱིར་མ་ལོག

13 ནོ་ཨ་དགུང་ལོ་དྲུག་བརྒྱ་བཅུ་མེད་གཅིག་གི་ཟླ་བ་དང་པོའི་ཚེས་གཅིག་ལོན་པའི་ཉིན་ཆུ་དམའ་རུ་ཕྱིན་ཚར་ཡོད་པས། ནོ་ཨས་གྲུའི་ཐོག་ཕྱེ་ཏེ་ཕྱོགས་བཞིར་བལྟས་ཤིང་ས་སྐམ་པོར་འགྲོ་བཞིན་ཡོད་པར་མཐོང༌།

14 ཟླ་བ་གཉིས་པའི་ཚེས་ཉི་ཤུ་རྩ་བདུན་གྱི་ཉིན་ས་ནི་ཡོངས་སུ་སྐམ་ཡོད།

15 དེ་ནས་དཀོན་མཆོག་གིས་ནོ་ཨ་ལ་

16 “ད་ཁྱེད་རང་དང་ཁྱེད་ཀྱི་བཟའ་ཟླ་ཁྱེད་ཀྱི་བུ་གསུམ་དང་ཁོ་ཚོའི་བཟའ་ཟླ་རྣམས་གྲུ་ནས་ཐོན་ཞིག

17 ཡང་ཁྱེད་ཚོ་མཉམ་དུ་ཡོད་པའི་དུད་འགྲོ་དང་སྲོག་ཆགས་འབུ་སྲིན་བྱ་བྱིའུ་ཐམས་ཅད་ཡང་གྲུ་ནས་ཕྱིར་ཁྲིད་ཅིག གང་ལགས་ཟེར་ན། དེ་ཚོ་རྒྱུད་དང་ལྡན་པར་གྱུར་ཏེ་མང་པོ་འཕེལ་ནས་ས་གཞི་འགེངས་པར་འགྱུར་བའི་ཕྱིར་རོ་” ཞེས་བཀའ་གནང༌།

18 ནོ་ཨ་དང་ཁོང་གི་བཟའ་ཟླ་དང༌། ཁོང་གི་བུ་གསུམ་དང་ཁོ་ཚོའི་བཟའ་ཟླ་རྣམས་གྲུའི་ནང་ནས་ཐོན་པ་དང༌།

19 ཡང་དུད་འགྲོ་དང་སྲོག་ཆགས་འབུ་སྲིན་བྱ་བྱིའུ་ཐམས་ཅད་རང་རང་གི་རིགས་བཞིན་དུ་གྲུ་ནས་ཕྱིར་ཐོན།

20 དེ་ནས་ནོ་ཨས་ཡ་ཝེ་དཀོན་མཆོག་ལ་གུས་བཀུར་བྱེད་པའི་ཕྱིར་མཆོད་ཁྲི་ཞིག་བརྩིགས་ནས་དུད་འགྲོ་དང་བྱ་བྱིའུ་ཁྲོད་ནས་རིགས་གཙང་བ་རེ་རེ་བླངས་སྟེ་བསད་ནས་མཆོད་ཁྲིའི་ཁར་སྲེག་སྟེ་མཆོད་པ་ཕུལ།

21 མཆོད་པ་དེའི་དྲི་བསུང་ཞིམ་པོ་བསྣམས་ནས་ཡ་ཝེ་དཀོན་མཆོག་གིས་ཐོག་མ་མི་ཆུང་དུས་ནས་ཁོའི་བསམ་པ་ངན་པ་ཡིན་པ་ཤེས། འོན་ཀྱང་ད་ཕྱིན་ཆད་མིའི་སེམས་ངན་པ་ཡིན་ཀྱང་ངས་ས་གཞིར་ཆད་པ་གཅོད་པར་མི་བྱ། ད་ལན་ངས་ཁོ་ཚོ་མེད་པ་བྱས་པ་ལྟར་ད་ནས་བཟུང་སེམས་ཅན་ཐམས་ཅད་རྒྱུན་གཅོད་པར་མི་བྱ།

22 འཇིག་རྟེན་མཐའ་མའི་བར་དུ་ནི།།

ཞིང་ལ་སོན་འདེབས་སྟོན་ཐོག་སྡུད།།

ཚ་གྲང་དབྱར་དགུན་དུས་བཞི་དང༌།།

ཉིན་མཚན་ལ་སོགས་ཆད་མེད་ཡོད།།

ཞེས་ཐུགས་ལ་དགོངས་སོ།།

*************************************

Genesis (9) – བཀོད་པ (9)

1 ཡང་དཀོན་མཆོག་གིས་ནོ་ཨ་དང་ཁོང་གི་བུ་རྣམས་ལ་བྱིན་རླབས་གནང་སྟེ་ “རྒྱུད་དང་ལྡན་པར་གྱུར་ནས་ཁྱེད་ཀྱི་བུ་རྒྱུད་རྣམས་ས་གཞིར་འཕེལ་བར་གྱུར་ཞིག

2 ཡང་སྲོག་ཆགས་ཆེ་ཆུང་དང༌། བྱ། ཉ་རིགས་ཐམས་ཅད་ཁྱེད་རྣམས་ལ་འཇིགས་ཡོང༌། ངས་དེ་ཚོ་ཁྱེད་རྣམས་ཀྱི་དབང་འོག་ཏུ་འཇུག་པར་བྱ།

3 ཡང་ངས་ས་ལ་འགྲོ་བའི་སྲོག་ཆགས་ཐམས་ཅད་ཁྱེད་ཚོ་ལ་ཁ་ཟས་སུ་སྟེར། སྔར་ངས་སྔོ་ཚོད་སྤྲད་པ་བཞིན་ད་ལྟ་ཐམས་ཅད་ཁྱེད་ཚོ་ལ་ཁ་ཟས་སུ་སྟེར་རོ།

4 འོན་ཀྱང་ཁྲག་ཡོད་པའི་ཤ་མ་ཟ། དེ་ནི་སྲོག་ཁྲག་གི་ནང་དུ་ཡོད་པས་སོ།

5 གལ་སྲིད་མི་གཅིག་གིས་མི་གཞན་བསད་ན། ངས་ཁོ་ལ་ཆད་པ་ཕོག་པར་འགྱུར། དུད་འགྲོས་མི་བསད་ན། དེའང་གསོད་པར་འགྱུར།

6 མི་ནི་དཀོན་མཆོག་ཉིད་ཀྱི་དཔེ་ལྟར་བཟོས་ཡོད་པའི་རྐྱེན། ཁོ་བསད་མཁན་དེ་མི་གཞན་གྱིས་གསད་ཡོང༌།

7 ཁྱེད་ཚོ་བུ་ཕྲུག་མང་པོ་སྐྱེས་ཤིང་རྒྱུད་དང་ལྡན་པར་གྱུར་ནས་ས་ལ་འཕེལ་བར་གྱུར་ཞིག་” ཅེས་གསུངས།

8 ཡང་དཀོན་མཆོག་གིས་ནོ་ཨ་དང་ཁོང་གི་བུ་རྣམས་ལ་

9 “ལྟོས་ཤིག ངས་ཁྱེད་དང་ཁྱེད་ཀྱི་བུ་རྒྱུད།

10 ཁྱེད་དང་མཉམ་དུ་ཡོད་པའི་བྱ་བྱིའུ་དང༌། དུད་འགྲོ སྲོག་ཆགས་འབུ་སྲིན་གྲུའི་ནང་ནས་ཐོན་པའི་སེམས་ཅན་ཐམས་ཅད་མཉམ་དུ་ཁ་ཆད་བྱེད་རྒྱུ་ཡིན།

11 ད་ཕྱིན་ཆད་ཆུ་ལོག་ཆེན་པོ་ཡིས་སེམས་ཅན་ཐམས་ཅད་མེད་པར་མི་འགྱུར་ཞིང༌། ས་གཞི་ཡང་ཆུ་ལོག་གིས་མེད་པར་བཟོ་བར་མི་བྱ། འདི་ནི་ངས་ཁྱེད་ཚོ་དང་མཉམ་དུ་བྱེད་པའི་ཁ་ཆད་ཡིན་” ཞེས་གསུངས།

12 ཡང་དཀོན་མཆོག་གིས་ “ཁྱེད་དང་ཁྱེད་མཉམ་དུ་ཡོད་པའི་སེམས་ཅན་ཐམས་ཅད་དང༌། མ་འོངས་པའི་རིགས་རྒྱུད་ཀུན་མཉམ་དུ་ཁ་ཆད་བྱེད་པའི་རྟགས་ནི་འདི་ལྟར་ཡིན།

13 གནམ་གྱི་སྤྲིན་པའི་དཀྱིལ་ལ་ངས་འཇའ་ཞིག་བཙུགས་པ་དེ་ནི་འཇིག་རྟེན་དང་ངའི་བར་ལ་ཁ་ཆད་བྱས་པའི་རྟགས་ཡིན།

14 ཡང་ངས་ནམ་མཁའི་སྟེང་དུ་སྤྲིན་པ་དཀྲིག་པའི་ཚེ་སྤྲིན་གྱི་ནང་ལ་འཇའ་མཐོང་སྐབས།

15 ཁྱེད་ཚོ་དང་སེམས་ཅན་ཐམས་ཅད་ཆུ་ལོག་གིས་མེད་པར་མི་འབྱུང་བའི་ཁ་ཆད་བྱས་པ་དེ་ངས་དྲན་པར་བྱ།

16 སྤྲིན་པའི་ནང་ཡོད་པའི་འཇའ་ལ་བལྟས་ཏེ་ང་དཀོན་མཆོག་དང་ས་གཞི་ལ་ཡོད་པའི་སེམས་ཅན་ཐམས་ཅད་དང་མཉམ་དུ་རྒྱུན་ཆད་མེད་པའི་ཁ་ཆད་དྲན་པར་བྱ་” ཞེས་གསུངས།

17 དཀོན་མཆོག་གིས་ནོ་ཨ་ལ་ “འདི་ནི་མིའི་རིགས་དང་སེམས་ཅན་ཐམས་ཅད་ང་དང་མཉམ་དུ་བྱས་པའི་ཁ་ཆད་ཀྱི་རྟགས་ཡིན་” ཞེས་གསུངས་སོ།།

**********************************************

Genesis (11) – བཀོད་པ (11)

1 ཡང་མི་ཀུན་ལ་སྐད་ཅིག་དང་གཏམ་གཅིག་ཡོད།

2 ཁོ་ཚོ་ཤར་ཕྱོགས་སུ་སོང་སྐབས་ཤི་ནེ་ཨར་ཞེས་པའི་ཡུལ་གྱི་ཐང་ཞིག་ལ་སླེབས་ནས་དེར་གཞིས་ཆགས་བྱས།

3 ཡང་ཁོ་ཚོས་གཅིག་གིས་གཅིག་ལ་ “ད་ང་ཚོས་ས་ཕག་བཟོས་ནས་མེ་ལ་ནན་གྱིས་སྲེག་དགོས་” ཞེས་ཟེར། དེ་ལྟར་བྱས་ནས་དེ་རྣམས་ཀྱིས་རྡོའི་ཚབ་ལ་ས་ཕག་དང༌། ཨར་འདམ་ཀྱི་ཚབ་ལ་སྣུམ་ནག་བེད་སྤྱོད་བྱས།

4 ཡང་ཁོ་ཚོས་ “ང་ཚོ་མིང་གྲགས་ཆོད་པའི་ཕྱིར་དང༌། ང་ཚོ་འཛམ་གླིང་ཡོངས་སུ་གཏོར་བར་མི་འགྱུར་བའི་ཕྱིར་ད་ང་ཚོས་རང་གི་དོན་དུ་གྲོང་ཁྱེར་ཞིག་དང་དེའི་ནང་མཁར་མཐོ་པོ་ནམ་མཁའ་ལ་ཐུག་པ་ཞིག་རྩིག་དགོས་” ཞེས་ཟེར།

5 དེ་ནས་ཡ་ཝེ་དཀོན་མཆོག་གིས་མི་རྣམས་ཀྱིས་བརྩིགས་པའི་གྲོང་ཁྱེར་དང་མཁར་མཐོ་པོ་གཟིགས་པར་མར་ཕེབས་པ་དང༌།

6 ཁོང་གིས་ “ཁོ་ཚོ་སྐད་གཅིག་དང་མི་རིགས་གཅིག་ཡིན་པས་དེ་ལྟ་བུའི་ལས་འགོ་འཛུགས་པ་ཡིན། ད་ཕྱིན་ཆད་ཁོ་ཚོས་གང་བྱེད་འདོད་པ་ཚང་མ་མི་སྲིད་པ་གང་ཡང་མེད།

7 ད་ཁོ་ཚོའི་སྐད་དེ་ཕན་ཚུན་བརྡ་མི་འཕྲོད་བའི་ཕྱིར་ང་ཚོ་བབས་ནས་སྐད་དེ་དཀྲུག་པར་བྱེད་དགོས་” ཞེས་གསུངས་པ་དང༌།

8 ཡ་ཝེ་དཀོན་མཆོག་གིས་ཁོ་ཚོ་ས་ཆ་དེ་ནས་ས་གཞི་ཀུན་ལ་གཏོར་བས་ཁོ་ཚོས་གྲོང་ཁྱེར་དེ་བརྩིག་རྒྱུ་མཚམས་བཞག

9 དེའི་ཕྱིར་གྲོང་ཁྱེར་དེའི་མིང་ལ་སྦ་བེལ་ཞེས་བཏགས། གང་ཡིན་ཟེར་ན། དེར་ཡ་ཝེ་དཀོན་མཆོག་གིས་མི་རྣམས་ཀྱི་སྐད་དཀྲུགས་ནས་ས་གཞི་ཀུན་ཏུ་གཏོར་བ་གནང་ངོ༌།།

****************************************

Genesis (4) – བཀོད་པ (4)

1 དེ་ཡང་ཨ་དམ་རང་གི་གཏན་གྲོགས་ཧ་ཝ་དང་མཉམ་དུ་འདུས་པས། མོ་མངལ་དང་ལྡན་པར་གྱུར་ཏེ། བུ་ཞིག་སྐྱེས་པས། ཁོ་མོས་ “ཡ་ཝེ་དཀོན་མཆོག་གི་བྱིན་རླབས་ཀྱིས་ང་ལ་བུ་ཞིག་སྐྱེས་བྱུང་” ཞེས་བཤད། ཁོང་གིས་བུ་དེའི་མིང་ལ་ཀ་ཡིན་ཞེས་བཏགས།

2 དེ་ནས་ཡང་ཁོང་ལ་བུ་ཆུང་བ་ཧ་བེལ་སྐྱེས་སྟེ། ཧ་བེལ་གྱིས་ལུག་རྫི་བྱས་པ་དང༌། ཀ་ཡིན་གྱིས་ཞིང་ལས་བྱས།

3 དུས་འགའ་ཞིག་གི་རྗེས་སུ་ཀ་ཡིན་གྱིས་ཞིང་གི་འབྲས་བུ་ནས་ཡ་ཝེ་དཀོན་མཆོག་ལ་མཆོད་པ་ཞིག་ཕུལ།

4 ཧ་བེལ་གྱིས་སྔོན་སྐྱེས་ལུག་གི་ཚི་ལུས་དཀོན་མཆོག་ལ་མཆོད་པ་ཕུལ་ཏེ། ཁོ་དང་ཁོའི་མཆོད་པ་ལ་དཀོན་མཆོག་ཐུགས་དགྱེས།

5 འོན་ཀྱང་ཀ་ཡིན་གྱི་མཆོད་པ་ལ་དཀོན་མཆོག་ཐུགས་མ་དགྱེས་པས། ཀ་ཡིན་ཤིན་ཏུ་ཁྲོས་ཤིང་རྣམ་འགྱུར་ལོག་གོ

6 ཡ་ཝེ་དཀོན་མཆོག་གིས་ཀ་ཡིན་ལ་ “ཁྱོད་རང་རླུང་ལངས་ཏེ་རྣམ་འགྱུར་ལོག་པའི་དོན་གང་ཡིན་ནམ།

7 གལ་ཏེ་ཁྱོད་ཀྱིས་སྤྱོད་པ་བཟང་པོ་བྱས་པ་ཡིན་ན་ངས་ཁྱོད་རང་ངེས་པར་དོར་བར་མི་བྱ། འོན་ཀྱང་ཁྱོད་ཀྱིས་ལས་ངན་བྱས་པ་ཡིན་ན། སྡིག་ཉེས་ནི་སྤྱང་ཀིས་ལུག་གུ་སྒུག་པ་ལྟར་ཁྱོད་ཀྱི་འགྲམ་ལ་སྒུག་ནས་བསྡད་ཡོད། དེས་ཁྱོད་ལ་དབང་གནོན་བྱེད་པར་འདོད་ཀྱང༌། ཁྱོད་དེ་ལ་དབང་དུ་སྒྱུར་དགོས་” ཞེས་གསུངས།

8 དེ་ནས་ཀ་ཡིན་གྱིས་རང་གི་གཅུང་པོ་ཧ་བེལ་ལ་ “ང་ཚོ་ས་ཞིང་ལ་འགྲོ་” ཞེས་བཤད་དེ། ཞིང་ཁར་ཀ་ཡིན་གྱིས་ཁོའི་གཅུང་པོ་ཧ་བེལ་བརྡུངས་ནས་བསད།

9 དེའི་རྗེས་སུ་ཡ་ཝེ་དཀོན་མཆོག་གིས་ཀ་ཡིན་ལ་ “ཁྱོད་ཀྱི་སྤུན་མཆེད་ཧ་བེལ་གང་དུ་ཡོད་དམ་” ཞེས་བཀའ་དྲིས་གནང་བས། དེའི་ལན་ལ་ཁོས་ “ངས་མི་ཤེས། ཁོ་གང་དུ་ཡོད་མེད་ལྟ་མཁན་ང་རེད་དམ་” ཞེས་བཤད།

10 དེ་ནས་ཡ་ཝེ་དཀོན་མཆོག་གིས་ “ཁྱོད་ཀྱིས་ལས་ངན་དེ་ལྟར་གང་གི་དོན་དུ་བྱས་སམ། ཁྱོད་ཀྱི་གཅུང་པོའི་ཁྲག་གིས་ས་སྟེང་ནས་ང་འབོད་ཀྱི་འདུག

11 དེའི་རྐྱེན་ཁྱོད་ལ་ཆད་པ་ཞིག་ཕོག་པར་འོས་པས། ད་ཕྱིན་ཆད་ཁྱོད་ཀྱིས་ཞིང་ལས་བྱེད་མི་ཆོག གང་ལགས་ཟེར་ན། ཁྱོད་ཀྱིས་བསད་པའི་གཅུང་པོའི་ཁྲག་དེ་སའི་ནང་ཐིམ་ཡོད་པས་སོ།

12 ཁྱོད་ཀྱིས་ས་ལས་འབྲས་བུ་ཐོབ་ཐབས་བྱས་ཀྱང་འབྲས་བུ་གང་ཡང་སྐྱེ་མི་ཡོང༌། ཁྱོད་ནི་ཆགས་ས་བརྟེན་ས་མེད་པར་འཇིག་རྟེན་ནང་འཁྱམས་ཏེ་བསྡད་དགོས་ཡོང་” ཞེས་གསུངས།

13 དེ་ནས་ཀ་ཡིན་གྱིས་ཡ་ཝེ་དཀོན་མཆོག་ལ་ “ཉེས་ཆད་དེ་ལྟར་ངས་འཁུར་མི་ཐུབ།

14 གཟིགས་དང༌། ཁྱེད་ཀྱིས་དེ་རིང་ང་ཁྱེད་རང་གི་སྐུ་དྲུང་དང་ས་ཞིང་ནས་བསྐྲད་གནང་བས། ང་ནི་ཁྱིམ་མེད་འཇིག་རྟེན་ནང་འཁྱམས་ཏེ་བསྡད་ན་སུ་ཡིན་ཡང་ང་དང་ཕྲད་པ་དེས་ང་གསད་ཡོང་” ཞེས་བཤད།

15 འོན་ཀྱང་ཡ་ཝེ་དཀོན་མཆོག་གིས་ “དེ་ལྟར་མིན། གལ་ཏེ་གཞན་གྱིས་ཁྱོད་བསད་ན་སྲོག་གཅོད་མཁན་དེ་ལ་ཆད་པ་ལྡབ་བདུན་ཕོག་ཡོང་” ཞེས་གསུངས། དེའི་རྐྱེན་གྱིས་ཀ་ཡིན་མི་གཞན་གྱིས་མི་གསོད་པའི་ཕྱིར་དཀོན་མཆོག་གིས་ཁོ་ལ་རྟགས་ཤིག་བསྐྱོན།

16 དེ་ནས་ཀ་ཡིན་ཡ་ཝེ་དཀོན་མཆོག་གི་དྲུང་ནས་སོང་སྟེ། ཨེ་དེན་གྱི་ཤར་ཕྱོགས་སུ་ཡོད་པའི་ས་ཆ་འཁྱམ་ཉུལ་ཞེས་པར་གནས་སོ།།

******************************************

Genesis (6) – བཀོད་པ (6)

5 ཡ་ཝེ་དཀོན་མཆོག་གིས་འཇིག་རྟེན་གྱི་མིའི་རིགས་ཀྱི་སྤྱོད་ངན་ཚབས་ཆེན་པོ་ཡོད་པ་དང༌། ཁོ་ཚོའི་བསམ་པ་ཐམས་ཅད་རྟག་ཏུ་ངན་པ་ཁོ་ན་ཡོད་པ་གཟིགས་ཏེ།

6 ཁོང་གིས་མིའི་རིགས་མཛད་པའི་ཕྱག་ལས་ལ་འགྱོད་པ་དང་ཐུགས་ཤིན་ཏུ་སྐྱོ་ནས་

7 “མིའི་རིགས་དང་དུད་འགྲོ་སྲོགས་ཆགས་འབུ་སྲིན། ནམ་མཁའི་བྱ་བྱིའུ་སོགས་ཐམས་ཅད་ངས་བཟོས་པས། ད་ངའི་སེམས་ཤིན་ཏུ་འགྱོད་པའི་རྐྱེན་གྱིས་དེ་ཚོ་ཚང་མ་འཇིག་རྟེན་ནས་ངས་མེད་པ་བཟོ་བར་བྱ་” ཞེས་གསུངས།

8 འོན་ཀྱང་ཡ་ཝེ་དཀོན་མཆོག་ནོ་ཨ་ལ་ཐུགས་དགྱེས།

9 འདི་ནོ་ཨའི་ལོ་རྒྱུས་ཡིན་ཏེ། ནོ་ཨ་ནི་མི་སེམས་དྲང་པོ་ཞིག་ཡིན་པ་དང༌། དེའི་དུས་སུ་ཡོད་པའི་མིའི་ནང་ནས་ཁོང་གཅིག་པུ་སྐྱོན་མེད་ཡིན། དཀོན་མཆོག་དང་མཉམ་དུ་འགྲོགས་སོ།

10 ནོ་ཨ་ལ་བུ་གསུམ་ཡོད་དེ། ཁོ་ཚོའི་མིང་ཤེམ་དང་ཧམ་དང་ཡ་ཕེད་བཅས་ཡིན།

11 ཡང་དཀོན་མཆོག་གི་སྤྱན་སྔར་མིའི་རིགས་ནི་ཡོངས་སུ་ངན་རུལ་དུ་གྱུར་ཏེ། དྲག་སྤྱོད་གང་སར་ཁྱབ་ཡོད་པ་དང༌།

12 ཡང་མིའི་རིགས་ཀྱིས་སྤྱོད་པ་ངན་པ་བྱས་པས། འཛམ་གླིང་ཡོངས་སུ་ལས་ངན་གྱིས་གང་ནས་ཡོད་པ་དཀོན་མཆོག་གིས་གཟིགས་ཏེ།

13 ཁོང་གིས་ནོ་ཨ་ལ་ “མིའི་རིགས་ཀྱིས་བྱས་པའི་ལས་ངན་གྱི་སྒོ་ནས་དྲག་སྤྱོད་གང་སར་ཁྱབ་ཡོད་པས། ལྟོས་ཤིག ངས་མིའི་རིགས་ཡོངས་རྫོགས་འཇིག་རྟེན་དང་མཉམ་དུ་ཡོངས་སུ་མེད་པར་བྱ།

14 ཁྱེད་རང་དང་ཁྱེད་ཀྱི་ནང་མིའི་ཆེད་དུ་ཁང་མིག་ཡོད་པའི་ཤིང་གི་གྲུ་ཆེན་པོ་ཞིག་བཟོས་དང༌། ཕྱི་ནང་གཉིས་ཀར་སྣུམ་ནག་སྐུས་ཤིག

15 བཟོ་སྟངས་ནི་གྲུའི་རིང་ཚད་ནི་སྨི་བརྒྱ་དང་སུམ་ཅུ། ཞེང་ཚད་སྨི་ཉི་ཤུ་རྩ་གཉིས་དང༌། མཐོ་ཚད་སྨི་བཅུ་གསུམ་ཡོད་པ་ཞིག་བཟོས་ཤིག

16 ཡང་གྲུ་ལ་ཐོག་ཅིག་བཀབ་སྟེ། ཐོག་དང་རྩིག་པའི་བར་ལ་སྨི་ཕྱེད་ཀ་བར་སྟོང་པ་འཇོག གྲུའི་ནང་ཐོག་བརྩེགས་སྟོད་སྨད་བར་གསུམ་བཟོས་ནས་གྲུའི་ལོགས་སུ་སྒོ་ཞིག་བཟོས།

17 ལྟོས་ཤིག འཇིག་རྟེན་ནང་སྲོག་གི་དབུགས་དང་ལྡན་པའི་སེམས་ཅན་ཐམས་ཅད་མེད་པར་བྱེད་པའི་ཕྱིར་ངས་ཆུ་ལོག་ཆེན་པོ་ཞིག་བཟོ་བར་བྱ།

18 འོན་ཀྱང་ཁྱེད་རང་དང་ཁ་ཆད་བྱེད་རྒྱུ་ཡིན། ཁྱེད་དང་ཁྱེད་ཀྱི་བཟའ་ཟླ་དང༌། ཁྱེད་ཀྱི་བུ་གསུམ་དང་ཁོ་ཚོའི་བཟའ་ཟླ་རྣམས་གྲུའི་ནང་འཛུལ་བར་བྱ།

19-20 ཡང་དེ་ཚོ་གསོན་པོར་གནས་པའི་ཕྱིར་སྲོག་ཆགས་ཀྱི་རིགས་ཐམས་ཅད་དང༌། བྱ་བྱིའུའི་རིགས་ཐམས་ཅད་ཀྱི་ནང་ནས་ཕོ་མོ་གཉིས་གཉིས་ཁྱེད་མཉམ་དུ་གྲུའི་ནང་ཁྲིད་ཅིག

21 ཡང་དེ་ཚོའི་དོན་ལ་ཟས་སྣ་ཚོགས་དང༌། ཁྱེད་ཚོའི་ཕྱིར་ཡང་ཁ་ཟས་བསགས་ནས་ཁྱེར་ཞིག་” ཅེས་བཀའ་གནང༌།

22 དཀོན་མཆོག་གི་བཀའ་གནང་བ་ལྟར་ནོ་ཨས་བསྒྲུབས་པར་བྱས་སོ།།

************************************************

Genesis (7) – བཀོད་པ (7)

1 དེ་ནས་ཡ་ཝེ་དཀོན་མཆོག་གིས་ནོ་ཨ་ལ་ “མི་རབས་འདི་ལས་ཁྱེད་གཅིག་པོ་ངའི་དྲུང་དུ་སེམས་དྲང་པོ་ཡིན་པས་ཁྱེད་དང་ཁྱེད་ཀྱི་ནང་མི་གྲུའི་ནང་དུ་སོང་ཞིག

2-3 སྲོག་ཆགས་ཐམས་ཅད་དང༌། བྱ་བྱིའུའི་རིགས་ཐམས་ཅད་ས་གཞིའི་སྟེང་གསོན་པོར་གནས་པའི་ཕྱིར་དཀོན་མཆོག་ལ་མཆོད་པར་འོས་པའི་སྲོག་ཆགས་གཙང་བའི་རིགས་ཐམས་ཅད་ནས་ཕོ་མོ་བདུན་བདུན། དཀོན་མཆོག་ལ་མཆོད་པར་མི་འོས་པའི་སྲོག་ཆགས་མི་གཙང་བའི་རིགས་ནས་ཕོ་མོ་གཉིས་གཉིས། བྱ་བྱིའུའི་རིགས་ནས་ཕོ་མོ་བདུན་བདུན་ཁྲིད་ཅིག

4 ད་ནས་ཞག་བདུན་གྱི་རྗེས་སུ་ཉིན་ཚན་བཞི་བཅུ་བར་ངས་ཆར་པ་དང་ཆུ་ལོག་ཆེན་པོ་ཞིག་དབབ་པ་དང༌། ངས་སའི་སྟེང་ལ་བཟོས་པའི་སེམས་ཅན་ཐམས་ཅད་མེད་པར་བྱ་” ཞེས་གསུངས།

5 ཡ་ཝེ་དཀོན་མཆོག་གི་བཀའ་གནང་བ་བཞིན་ནོ་ཨས་བསྒྲུབས་པར་བྱས་སོ།

6 ཡང་ཆར་པ་དང་ཆུ་ལོག་བབ་པའི་ཚེ་ནོ་ཨ་དགུང་ལོ་དྲུག་བརྒྱ་ལོན་ཡོད།

7 ཆུ་ལོག་ནས་ཐར་བའི་ཕྱིར་ནོ་ཨ་དང་ཁོང་གི་བཟའ་ཟླ། ཁོང་གི་བུ་གསུམ་དང་ཁོ་ཚོའི་བཟའ་ཟླ་རྣམས་གྲུའི་ནང་དུ་འཛུལ།

8-9 དཀོན་མཆོག་གིས་བཀའ་གནང་བ་ལྟར་དུད་འགྲོ་དང་སྲོག་ཆགས་འབུ་སྲིན་གྱི་རིགས་ཐམས་ཅད། བྱ་བྱིའུའི་རིགས་གཙང་བ་དང་མི་གཙང་བ་ཐམས་ཅད་ནས་ཕོ་མོ་རེ་རེ་བྱས་ནོ་ཨ་དང་མཉམ་དུ་གྲུའི་ནང་ལ་ཕྱིན།

10 དེ་ནས་ཞག་བདུན་གྱི་རྗེས་སུ་ས་ལ་ཆུ་ལོག་ཆེན་པོ་བྱུང༌།

11 ནོ་ཨ་དགུང་ལོ་དྲུག་བརྒྱ་ཟླ་བ་གཉིས་པའི་ཚེས་བཅུ་བདུན་ལོན་པའི་ཉིན་མོ་དེ་རང་ལ་རྒྱ་མཚོ་ཆེན་པོའི་གཏིང་གི་ཆུ་མིག་ཐམས་ཅད་རྡོལ་བ་དང༌། ནམ་མཁའི་ཆུའི་སྒོ་ཚང་མ་ཡང་ཕྱེ།

12 དེ་ནས་ཉིན་མཚན་བཞི་བཅུའི་བར་དྲག་ཆར་འབབ་རྒྱུའི་ཆར་པ་འགོ་བཙུགས།

13 ཡང་ཉིན་མོ་དེ་རང་ལ་ནོ་ཨ་དང་ཁོང་གི་བཟའ་ཟླ། བུ་གསུམ་ཤེམ་ཧམ་ཡ་ཕེད་དང་ཁོ་ཚོའི་བཟའ་ཟླ་རྣམས་གྲུའི་ནང་དུ་ཕེབས།

14 ཁོང་ཚོ་མཉམ་དུ་གཅན་གཟན་དང༌། དུད་འགྲོ་སྲོག་ཆགས་འབུ་སྲིན་བྱ་བྱིའུ་ཐམས་ཅད་ཀྱི་རིགས་སོ་སོ་ཀུན་གྲུའི་ནང་དུ་ཕྱིན།

15 སྲོག་གི་དབུགས་དང་ལྡན་པའི་སེམས་ཅན་ཐམས་ཅད་ལས་ཕོ་མོ་རེ་རེ་ནོ་ཨའི་རྩར་སླེབས་ནས་གྲུའི་ནང་ཕྱིན།

16 དེ་ཚོ་ཚང་མ་དཀོན་མཆོག་གི་བཀའ་བཞིན་དུ་གྲུའི་ནང་དུ་ཕྱིན་པའི་རྗེས་ལ་ཡ་ཝེ་དཀོན་མཆོག་གིས་ནོ་ཨའི་རྒྱབ་ནས་གྲུའི་སྒོ་བསྐྱོན།

17 ཡང་ཉི་མ་བཞི་བཅུའི་བར་ཆུ་ལོག་ཆེན་པོ་བྱུང་བའི་རྐྱེན་གྱིས་ཆུ་རྒྱས་ཏེ་གཏིང་རིང་པོ་བྱུང་བས་གྲུ་ཆུའི་སྒང་ལ་འཕྱོ།

18 ཆུ་ཤིན་ཏུ་རྒྱས་པས་ཆུ་ཁ་མཐོ་རུ་མཐོ་རུ་ཕྱིན་ཏེ་གྲུ་མུ་མཐུད་ཆུའི་སྟེང་ལ་གཡེངས།

19 ཡང་ཆུ་དེ་ཤིན་ཏུ་གཏིང་རིང་བ་དང་རྒྱ་ཆེ་བ་བྱུང་བས། ནམ་མཁའི་འོག་ཏུ་ཡོད་པའི་རི་བོ་མཐོན་པོ་ཀུན་ཆུའི་ནང་དིམ།

20 ཆུ་དེ་རི་བོའི་རྩེ་ལས་སྨི་བདུན་ཙམ་གྱི་མཐོན་པོར་སླེབས།

21 ཡང་ས་ལ་ཡོད་པའི་དུད་འགྲོ་ཚང་མ་དང༌། སྲོག་ཆགས་འབུ་སྲིན། གཅན་གཟན། བྱ་བྱིའུ། མི་ཐམས་ཅད་ཆུ་དེའི་ནང་དུ་ཤི་སྟེ།

22 མདོར་ན་སྐམ་ས་ལ་ཡོད་པའི་སྲོག་གི་དབུགས་དང་ལྡན་པའི་སེམས་ཅན་ཐམས་ཅད་ཤིའོ།

23 ས་སྟེང་ལ་ཡོད་པའི་དུད་འགྲོ་དང་བྱ་བྱིའུ་ལ་སོགས་པའི་སེམས་ཅན་ཐམས་ཅད་དང༌། མིའི་རིགས་ཀུན་ཡ་ཝེ་དཀོན་མཆོག་གིས་མེད་པར་མཛད། འོན་ཀྱང་གྲུའི་ནང་ནོ་ཨ་དང་མཉམ་དུ་ཡོད་པ་ཚང་མ་གསོན་པོར་གནས།

24 ཡང་ཉི་མ་བརྒྱ་དང་ལྔ་བཅུ་བར་སའི་སྟེང་དུ་ཆུ་རྒྱས་སོ།།

***********************************************

Genesis (1) – བཀོད་པ (1)

1 ཐོག་མར་དཀོན་མཆོག་གིས་འཇིག་རྟེན་ཁམས་དང་དེར་ཡོད་པ་ཐམས་ཅད་གསར་དུ་བཀོད་གནང་བ་རེད།

2 ཡང་ས་ནི་དབྱིབས་མེད་སྟོང་པ་ཡིན་པ་དང༌། རྒྱ་མཚོ་ཆེན་པོའི་སྟེང་ལ་མུན་ནག་ཡིན་ཞིང་དཀོན་མཆོག་གི་དགོངས་པ་ནི་རྒྱ་མཚོའི་སྟེང་རླུང་ལྟར་རྒྱུ་བཞིན་ཡོད་དོ།

3 དེ་ཡང་དཀོན་མཆོག་གིས་ “འོད་འབྱུང་ཞིག་” ཅེས་གསུངས་པས། འོད་བྱུང་ངོ༌།

4 དཀོན་མཆོག་གིས་འོད་དེ་ལེགས་པ་ཡིན་པར་གཟིགས་ཏེ་མུན་པ་ལས་འོད་དབྱེ་བ་ཕྱེ།

5 དཀོན་མཆོག་གིས་འོད་ཀྱི་མིང་ལ་ཉིན་མོ་ཞེས་བཏགས། མུན་པའི་མིང་ལ་མཚན་མོ་ཞེས་བཏགས། མཚན་མོ་དང་ཉིན་མོ་བྱུང་བ་དེ་ནི་ཉི་མ་དང་པོའོ།

6-7 ཡང་དཀོན་མཆོག་གིས་ “ཆུ་ཁག་གཉིས་སུ་འགྱུར་ཕྱིར་དེའི་དཀྱིལ་ནས་བར་མཚམས་ཤིག་འབྱུང་ཞིག་” ཅེས་གསུངས་པ་དང༌། བར་མཚམས་བྱུང་ངོ༌། བར་མཚམས་ཀྱི་འོག་ལ་ཡོད་པའི་ཆུ་རྣམས་བར་མཚམས་ཀྱི་སྟེང་ལ་ཡོད་པའི་ཆུ་རྣམས་ལས་དབྱེ་བར་གནང་བས་དེ་བཞིན་དུ་བྱུང༌།

8 དཀོན་མཆོག་གིས་བར་མཚམས་དེའི་མིང་ལ་ནམ་མཁའ་ཞེས་བཏགས། ཡང་མཚན་མོ་དང་ཉིན་མོ་བྱུང་བ་དེ་ནི་ཉི་མ་གཉིས་པའོ།

9 ཡང་དཀོན་མཆོག་གིས་ “སྐམ་ས་ཡོང་བའི་ཕྱིར་ནམ་མཁའི་འོག་ཏུ་ཡོད་པའི་ཆུ་རྣམས་གནས་གཅིག་ཏུ་འདུས་ཤིག་” ཅེས་གསུངས་པས། དེ་བཞིན་དུ་བྱུང་ངོ༌།

10 དཀོན་མཆོག་གིས་སྐམ་ས་ལ་ས་ཞེས་བཏགས། ཆུ་རྣམས་གནས་གཅིག་ཏུ་འདུས་པ་དེ་ལ་རྒྱ་མཚོ་ཞེས་བཏགས། དཀོན་མཆོག་གིས་དེ་ལེགས་པ་ཡིན་པར་གཟིགས་སོ།

11 ཡང་དཀོན་མཆོག་གིས་ “རྩི་ཤིང་ས་ལ་སྐྱེ་བར་བྱོས་ཤིག ས་བོན་ཡོད་པའི་སྔོ་ཚོད་དང་ས་བོན་ཡོད་པའི་འབྲས་བུའི་ཤིང་སྡོང་སོ་སོའི་རིགས་ལྟར་སྐྱེ་བར་འགྱུར་” ཞེས་གསུངས་པས་དེ་བཞིན་དུ་བྱུང་ངོ༌།

12 ཡང་རྩི་ཤིང་ས་ལ་སྐྱེས་ཏེ། ས་བོན་སྐྱེ་བའི་སྔོ་ཚོད་དང་ས་བོན་ཡོད་པའི་འབྲས་བུ་སྐྱེ་བའི་ཤིང་སྡོང་སོ་སོའི་རིགས་ལྟར་སྐྱེས་ནས། དཀོན་མཆོག་གིས་དེ་ལེགས་པ་ཡིན་པར་གཟིགས་སོ།

13 ཡང་མཚན་མོ་དང་ཉིན་མོ་བྱུང་བ་དེ་ནི་ཉི་མ་གསུམ་པའོ།

14 ཡང་དཀོན་མཆོག་གིས་ “ཉིན་མཚན་དབྱེ་བའི་ཕྱིར་ནམ་ཁའི་བར་མཚམས་ལ་འོད་རྣམས་དང༌། འོད་དེ་ཚོ་བརྒྱུད་ནས་ནམ་དུས་དང༌། ཉིན་མོ། ལོ་འཁོར་ལ་སོགས་པ་རྩི་ཐུབ་པ་འབྱུང་ཞིག

15 ཡང་འོད་དེ་རྣམས་ནམ་མཁར་འཕྲོ་བའི་སྒོ་ནས་ས་ལ་འོད་ཕོག་ཅིག་” ཅེས་གསུངས་པ་དང་དེ་བཞིན་དུ་བྱུང་ངོ༌།

16 དཀོན་མཆོག་གིས་མཛད་པའི་འོད་ཆེན་པོ་གཉིས་ནི། ཉིན་མོར་དབང་བྱེད་པའི་ཕྱིར་ཆེ་བ་དང༌། མཚན་མོར་དབང་བྱེད་པའི་ཕྱིར་ཆུང་བ། ད་དུང་སྐར་མ་རྣམས་ཀྱང་མཛད།

17 ས་ལ་འོད་འཕྲོ་བའི་ཕྱིར་དཀོན་མཆོག་གིས་དེ་ཚོ་ནམ་མཁའི་བར་མཚམས་ལ་བཀོད།

18 དེ་ཚོ་ནི་ཉིན་དང་མཚན་ལ་དབང་བྱེད་པའི་ཕྱིར་དང༌། འོད་དང་མུན་ནག་དབྱེ་བའི་ཕྱིར་རོ། ཡང་དཀོན་མཆོག་གིས་དེ་ལེགས་པ་ཡིན་པར་གཟིགས་སོ།

19 མཚན་མོ་དང་ཉིན་མོ་བྱུང་བ་དེ་ནི་ཉི་མ་བཞི་པའོ།

20 ཡང་དཀོན་མཆོག་གིས་ “ཆུ་ཡི་ནང་དུ་སྲོག་ཆགས་ཀྱི་རིགས་སྣ་ཚོགས་སྐྱེས་ནས་ཆུ་རྣམས་གང་ཞིག ནམ་མཁའི་བར་མཚམས་ལ་བྱ་སྣ་ཚོགས་བྱུང་ནས་ཕུར་ཞིག་” ཅེས་གསུངས།

21 དེ་བཞིན་དཀོན་མཆོག་གིས་རྒྱ་མཚོའི་སེམས་ཅན་ཆེན་མོ་དང༌། ཆུའི་ནང་གི་སྲོག་ཆགས་སོ་སོའི་རིགས་ལྟར་དང༌། ནམ་མཁའི་སྟེང་གི་བྱ་སོ་སོའི་རིགས་བཞིན་དུ་བཀོད་གནང་ངོ༌། དཀོན་མཆོག་གིས་དེ་ལེགས་པ་ཡིན་པར་གཟིགས་སོ།

22 དཀོན་མཆོག་གིས་དེ་ཚོ་ལ་བྱིན་རླབས་གནང་ནས་ “རྒྱུད་དང་ལྡན་ཞིང་མང་པོ་འཕེལ་ཏེ་རྒྱ་མཚོ་རྣམས་གང་བར་བྱོས་ཤིག བྱ་རྣམས་འཕེལ་བར་གྱུར་ཞིག་” ཅེས་གསུངས།

23 ཡང་མཚན་མོ་དང་ཉིན་མོ་བྱུང་བ་དེ་ནི་ཉི་མ་ལྔ་པའོ།

24 ཡང་དཀོན་མཆོག་གིས་ “སྲོག་ཆགས་ཆེ་ཆུང་སོ་སོའི་རིགས་ལྟར་ས་ལ་འབྱུང་བར་གྱུར་ཞིག ཕྱུགས་རིགས་དང༌། འབུ་སྲིན་གཅན་གཟན་བཅས་སོ་སོའི་རིགས་བཞིན་དུ་ས་ལ་འབྱུང་བར་འགྱུར་” ཞེས་གསུངས་པས་དེ་བཞིན་དུ་བྱུང༌།

25 དཀོན་མཆོག་གིས་སྲོག་ཆགས་ཆེ་ཆུང་དང༌། ཕྱུགས་རིགས་འབུ་སྲིན་བཅས་སོ་སོའི་རིགས་ལྟར་མཛད་པ་དང༌། དེ་ལེགས་པ་ཡིན་པར་གཟིགས་སོ།

26 ཡང་དཀོན་མཆོག་གིས་ “རྒྱ་མཚོའི་ཉ་རྣམས་དང༌། ནམ་མཁའི་བྱ་རྣམས། ས་ལ་ཡོད་པའི་ཕྱུགས་རིགས། འབུ་སྲིན་ཐམས་ཅད་ལ་དབང་བྱེད་པའི་ཕྱིར། ང་ཚོ་རང་དཔེ་རུ་བྱས་ཏེ་མིའི་རིགས་བཟོ་བར་བྱ་” ཞེས་གསུངས་སོ།།

27 དཀོན་མཆོག་གིས་ནི་རང་ཉིད་ལ།།

དཔེར་བྱས་ཕོ་མོ་གཉིས་མཛད་དོ།།

ཕོ་མོ་གཉིས་པོའི་གཟུགས་དེ་ནི།།

དཀོན་མཆོག་ཉིད་ལ་དཔེར་མཛད་དོ།།

28 ཡང་ཁོང་གིས་ཁོ་གཉིས་ལ་བྱིན་རླབས་གནང་ནས་ “ཁྱོད་ཚོའི་རིགས་རྒྱུད་མང་པོ་འཕེལ་ཞིང་ས་གཞི་ཚང་མར་ཁྱབ་ནས་དབང་དུ་སྒྱུར་ཏེ། རྒྱ་མཚོའི་ཉ་དང༌། ནམ་མཁའི་བྱ། ས་ལ་ཡོད་པའི་སྲོག་ཆགས་ཐམས་ཅད་ལ་དབང་བྱོས་ཤིག་” ཅེས་གསུངས།

29 དཀོན་མཆོག་གིས་ “ལྟོས་ཤིག ངས་ས་ལ་ཡོད་པའི་ས་བོན་སྐྱེ་བའི་སྔོ་ཚོད་ཐམས་ཅད་དང༌། ས་བོན་ཡོད་པའི་འབྲས་བུའི་ཤིང་སྡོང་ཐམས་ཅད་ཁྱོད་ཚོའི་ཟས་སུ་སྟེར་བ་ཡིན་” ཞེས་གསུངས་པ་དང༌།

30 “ཡང་སའི་དུད་འགྲོ་དང༌། ནམ་མཁའི་བྱ། འབུ་སྲིན་སོགས་སྲོག་གི་དབུགས་དང་ལྡན་པའི་སེམས་ཅན་ཐམས་ཅད་ཀྱི་ཕྱིར་སྔོ་ཚོད་ཀྱི་རིགས་ཚང་མ་ངས་ཁོ་ཚོ་ལ་ཟས་སུ་སྟེར་བ་ཡིན་ནོ་” ཞེས་གསུངས་པས་དེ་བཞིན་དུ་བྱུང༌།

31 དཀོན་མཆོག་གིས་ཇི་མཛད་པ་ཐམས་ཅད་ལ་གཟིགས་པ་དང་དེ་ཤིན་ཏུ་ལེགས་པ་ཡིན་ནོ། ཡང་མཚན་མོ་དང་ཉིན་མོ་བྱུང་བ་དེ་ནི་ཉི་མ་དྲུག་པའོ།།

************************************************

Genesis (2) – བཀོད་པ (2)

1 དེ་ལྟར་འཇིག་རྟེན་ཁམས་དང་དེར་ཡོད་པ་ཐམས་ཅད་གྲུབ་བོ།

2 དཀོན་མཆོག་གིས་འཇིག་རྟེན་གྱི་ནང་ལ་ཇི་ཡོད་པ་བསྒྲུབས་ཚར་བའི་རྗེས་ཀྱི་ཉི་མ་བདུན་པ་ལ་ངལ་གསོས་ནས་བཞུགས་སོ།

3 དཀོན་མཆོག་གིས་ཉི་མ་བདུན་པ་དེ་དམ་པ་ཞིག་ཏུ་བྱིན་གྱིས་རླབས། གང་ལགས་ཟེར་ན། ཉི་མ་དེ་ལ་ཁོང་གིས་མཛད་པའི་འཕྲིན་ལས་ཐམས་ཅད་བསྒྲུབས་ནས་ངལ་གསོས་ཏེ་བཞུགས་པའི་ཕྱིར།

4 དེ་ནི་འཇིག་རྟེན་ཁམས་བཀོད་པའི་ལོ་རྒྱུས་ཡིན་ནོ།།

ཨེ་དེན་གྱི་ལྡུམ་རའི་སྐོར།

7 དེ་ནས་ཡ་ཝེ་དཀོན་མཆོག་གིས་ས་སྟེང་གི་ཐལ་བ་ལས་མི་བཟོས་གནང་སྟེ་དེའི་སྣ་ཁུང་ལ་སྲོག་གི་དབུགས་བླུགས་པས། མི་དེ་སྲོག་དང་ལྡན་པ་ཞིག་བྱུང་ངོ༌།

8 ཡ་ཝེ་དཀོན་མཆོག་གིས་ཤར་ཕྱོགས་སུ་ཡོད་པའི་ཨེ་དེན་ཞེས་པའི་ཡུལ་ལ་ལྡུམ་ར་ཞིག་བཟོས་གནང་སྟེ། ཁོང་གིས་མཛད་པའི་མི་དེ་ལྡུམ་ར་དེར་བཞག

9 དེ་ཡང་ལྡུམ་ར་དེའི་ནང་ཡ་ཝེ་དཀོན་མཆོག་གིས་ས་ནས་ཤིང་སྡོང་ལེགས་པོ་སྣ་ཚོགས་དང༌། དེ་རྣམས་ལ་འབྲས་བུ་ཞིམ་པོ་སྣ་ཚོགས་སྐྱེ་རུ་བཅུག ལྡུམ་ར་དེའི་དཀྱིལ་ལ་སྲོག་དང་ལྡན་པའི་ཤིང་དང༌། བཟང་ངན་རྟོགས་པའི་ཤིང་ཡང་སྐྱེ་བཅུག་པར་མཛད།

10 ཨེ་དེན་ཞེས་པའི་ཡུལ་ནས་ཆུ་ཞིག་ལྡུམ་རའི་ནང་རྒྱུགས་ཏེ་རྗེས་སུ་ཕྱིར་ཐོན་ནས་གཙང་པོ་བཞི་རུ་གྱུར།

11 གཙང་པོ་དང་པོའི་མིང་ལ་པི་ཤོན་ཟེར་ཞིང༌། དེ་ནི་ཧ་བི་ལ་ཞེས་པའི་ཡུལ་གྱི་མཐའ་ནས་རྒྱུག་གོ

12 ས་ཆ་དེར་ལྷད་མེད་པའི་གསེར་དང༌། དཀོན་པོའི་དྲི་ཞིམ་གྱི་ཆུ། གཟི་བཅས་ཐོན་གྱི་ཡོད།

13 གཙང་པོ་གཉིས་པའི་མིང་ལ་གི་ཧོན་ཡིན་ཏེ། དེ་ནི་ཀུ་ཤེ་ཞེས་པའི་ཡུལ་གྱི་མཐའ་ནས་རྒྱུག

14 གཙང་པོ་གསུམ་པའི་མིང་ནི་ཏི་ཀེ་ལི་སི་ཡིན་ཏེ། དེ་ནི་ཨ་སུར་ཞེས་པའི་ས་ཆའི་ཤར་ཕྱོགས་སུ་རྒྱུག གཙང་པོ་བཞི་པའི་མིང་ལ་ཡུ་ཧྥ་ལ་ཏི་ཅེས་ཟེར་རོ། 15 ཨེ་དེན་གྱི་ལྡུམ་རའི་ནང་འདེབས་ལས་བྱེད་པ་དང་ལྡུམ་ར་སྲུང་བའི་ཕྱིར་ཡ་ཝེ་དཀོན་མཆོག་གིས་མི་དེ་དེར་བཞག་གནང༌།

16 ཡ་ཝེ་དཀོན་མཆོག་གིས་མི་དེ་ལ་ “ལྡུམ་རའི་ཤིང་སྡོང་གི་འབྲས་བུ་ཐམས་ཅད་ཁྱོད་ཀྱིས་ཟ་ཆོག

17 འོན་ཀྱང་བཟང་ངན་རྟོགས་པའི་ཤིང་གི་འབྲས་བུ་ཟ་མི་ཆོག གལ་སྲིད་དེ་བཟས་ན་ཉིན་དེར་ཁྱོད་འཆི་བར་འགྱུར་ངེས་ཡིན་” ཞེས་གསུངས།

18 དེ་ནས་ཡ་ཝེ་དཀོན་མཆོག་གིས་ “མི་འདི་གཅིག་པུར་བསྡད་ན་མི་ལེགས་པས། ངས་ཁོང་དང་འཚམས་པའི་རོགས་པ་བྱེད་མཁན་ཅིག་བཟོ་བར་བྱ་” ཞེས་གསུངས།

19 ཡ་ཝེ་དཀོན་མཆོག་གིས་ས་སྟེང་གི་ཐལ་བ་ནས་དུད་འགྲོ་ཐམས་ཅད་དང༌། ནམ་མཁའི་བྱ་ཐམས་ཅད་མཛད། དེ་ཚོ་ཐམས་ཅད་ཀྱི་མིང་ཇི་ལྟར་བཏགས་པ་གཟིགས་པའི་ཕྱིར་མི་དེའི་རྩར་ཁྲིད་ནས། མི་དེས་དེ་ཚོ་ལ་མིང་བཏགས་པ་དེ་བཞིན་སྲོག་ཆགས་རེ་རེ་ལ་མིང་རེ་རེ་བྱུང་ངོ༌།

20 མི་དེས་ཕྱུགས་རིགས་དང༌། བྱ་བྱིའུ་དུད་འགྲོ་ཐམས་ཅད་ཀྱི་མིང་བཏགས། འོན་ཀྱང་རང་གི་ཆེད་དུ་གཏན་གྲོགས་འཚམས་པོ་ཞིག་མ་བྱུང༌།

21 དེའི་ཕྱིར་ཡ་ཝེ་དཀོན་མཆོག་གིས་མི་དེ་གཉིད་ལྗིད་པོ་ཞིག་ཁུག་བཅུག་སྟེ། ཁོ་གཉིད་ཁུག་དུས་དཀོན་མཆོག་གིས་ཁོའི་རྩིབ་མ་གཅིག་བཏོན་ནས་ཤུལ་དེ་ནི་ཤ་ཡིས་བསྐྱོན།

22 ཡ་ཝེ་དཀོན་མཆོག་གིས་རྩིབ་མ་དེ་ལ་བུད་མེད་གཅིག་བཀོད་ནས་མི་དེའི་རྩར་ཁྲིད་པ་དང༌།

23 མི་དེས།

འདི་ནི་ང་ཡི་རུས་པའི་ནང་གི་རུས།།

ཤ་ཡི་ནང་གི་ཤ་ཡིན་དེ་ལ་ནི།།

བུད་མེད་ཅེས་པའི་མིང་བཏགས་རྒྱུ་མཚན་ནི།།

ཁོ་མོ་ཕོ་ནས་བཏོན་པར་བྱས་བའི་ཕྱིར།།

ཞེས་བཤད།

24 དེའི་རྐྱེན་གྱིས་སྐྱེས་པས་རང་གི་ཕ་མ་བཞག་ནས་རང་གི་བུད་མེད་དང་མཉམ་དུ་འདུས་ཤིང༌། ཁོང་གཉིས་ཤ་རུས་གཅིག་ཏུ་འགྱུར།

25 མི་དེ་དང་རང་གི་བུད་མེད་གཉིས་ཀ་གཅེར་བུར་ཡོད་ཀྱང་ངོ་ཚ་མེད་དོ།།

*************************************************

Genesis (3) – བཀོད་པ (3)

1 དེ་ཡང་ཡ་ཝེ་དཀོན་མཆོག་གིས་མཛད་པའི་སྲོག་ཆགས་ཐམས་ཅད་ལས་གཡོ་སྒྱུ་ཅན་གྱི་སྦྲུལ་གྱིས། བུད་མེད་ལ་ “དཀོན་མཆོག་གིས་ཁྱེད་ཚོས་ལྡུམ་རའི་ཤིང་འབྲས་ཐམས་ཅད་མ་ཟ་ཞེས་དངོས་གནས་གསུངས་སམ་” ཞེས་བཤད།

2 དེའི་ལན་དུ་བུད་མེད་ཀྱིས་སྦྲུལ་ལ་ “ལྡུམ་རའི་ནང་གི་ཤིང་སྡོང་གི་འབྲས་བུ་ཚང་མ་ང་ཚོས་ཟ་ཆོག

3 འོན་ཀྱང་དཀོན་མཆོག་གིས་ལྡུམ་རའི་དཀྱིལ་གྱི་ཤིང་འབྲས་དེ་ཁྱོད་ཚོས་ཟ་མི་ཆོག ལག་པ་ཡང་འཆང་མི་ཆོག གལ་སྲིད་བཀའ་ལ་མ་མཉན་ན་ཤི་ཡོང་ཞེས་གསུངས་” ཞེས་བཤད།

4 སྦྲུལ་གྱིས་བུད་མེད་ལ་ “ཁྱེད་ཚོ་ཤི་མི་ཡོང༌།

5 གང་ལགས་ཟེར་ན། ཁྱེད་ཚོས་ཤིང་འབྲས་དེ་ལས་བཟས་ན། རྟོགས་པ་འཐོབ་ཅིང་དཀོན་མཆོག་དང་འདྲ་བར་བཟང་ངན་ཤེས་པར་འགྱུར་བ་དེ་དཀོན་མཆོག་གིས་མཁྱེན་ནོ་” ཞེས་བཤད།

6 དེ་ནས་བུད་མེད་ཀྱིས་ཤིང་སྡོང་གི་འབྲས་བུ་དེ་ལ་བལྟས་ཏེ། འབྲས་བུ་ལེགས་པོ་དང༌། ཟ་བ་ལ་ཞིམ་པོ་མཐོང་བ་དང༌། རྟོགས་པ་འཐོབ་པའི་ཕྱིར་ཡིད་ལ་བབ་ནས། འབྲས་བུ་དེ་བླངས་ཏེ་བཟས་པ་མ་ཟད། རང་གི་ཁྱོ་བོ་ལ་ཡང་སྟེར་ནས་ཁོས་ཀྱང་བཟས།

7 དེ་མ་ཐག་ཏུ་ཁོང་གཉིས་ལ་རྟོགས་པ་ཐོབ་ཅིང་རང་ཉིད་གཅེར་བུར་ཡོད་པ་ཧ་གོ་སྟེ། བསེ་ཡབ་ཟེར་བའི་ཤིང་གི་ལོ་མ་སྦྲེལ་ཏེ་འདོམས་དཀྲིས་བཟོས།

8 དགོང་དྲོའི་དུས་སུ་ལྡུམ་རའི་ནང་ཡ་ཝེ་དཀོན་མཆོག་ཕེབས་པའི་སྒྲ་ཐོས་ནས། མི་དེ་དང་ཁོའི་བཟའ་ཟླ་ཡ་ཝེ་དཀོན་མཆོག་གི་དྲུང་ནས་བྲོས་ཤིང་ལྡུམ་རའི་ཤིང་སྡོང་གི་དཀྱིལ་དུ་ཡིབས།

9 འོན་ཀྱང་ཡ་ཝེ་དཀོན་མཆོག་གིས་མི་དེ་བོས་ཅིང་ “ཁྱོད་རང་གང་དུ་ཡོད་དམ་” ཞེས་བཀའ་འདྲི་གནང༌།

10 ཁོས་ལན་དུ་ “ཁྱེད་ཕེབས་པའི་སྒྲ་ཐོས་ཏེ་ང་འཇིགས། གང་ལགས་ཤེ་ན། ང་གཅེར་བུར་ཡོད་པ་ཤེས་ཏེ་ཡིབས་པ་ཡིན་” ཞེས་བཤད།

11 “ཁྱོད་གཅེར་བུར་འདུག་ཅེས་སུས་བརྗོད་དམ། ཁྱོད་ཀྱིས་ཟ་མི་ཆོག་པའི་ཤིང་འབྲས་ལས་བཟས་པ་ཡིན་ནམ་” ཞེས་དཀོན་མཆོག་གིས་བཀའ་འདྲི་གནང་བས།

12 “ཁྱེད་ཀྱིས་ང་ལ་གནང་བའི་བུད་མེད་ཀྱིས་ཤིང་འབྲས་ང་ལ་སྟེར་བས། ངས་བཟས་པ་ཡིན་” ཞེས་ཞུས།

13 ཡ་ཝེ་དཀོན་མཆོག་གིས་བུད་མེད་ལ་ “ཁྱོད་རང་གིས་བྱས་པ་འདི་ག་རེ་ཡིན་” ཞེས་གསུངས་པས། བུད་མེད་ཀྱིས་ “སྦྲུལ་གྱིས་ང་ལ་མགོ་སྐོར་བཏང་བས་ངས་ཤིང་འབྲས་བཟས་པ་ཡིན་” ཞེས་ཞུས།

14 ཡ་ཝེ་དཀོན་མཆོག་གིས་སྦྲུལ་ལ་ “ཁྱོད་ཀྱིས་ལས་ངན་དེ་ལྟར་བྱས་པའི་རྐྱེན་གྱིས་དུད་འགྲོ་དང་གཅན་གཟན་ཐམས་ཅད་ཀྱི་ནང་ནས་ཁྱོད་གཅིག་པུར་ཆད་པ་ཕོག་པ་ཡིན། ད་ནས་ཕྱིན་ཆད་ཁྱོད་ལྟོ་བས་འགྲོ་དགོས། ཡང་ནམ་འཚོ་བའི་བར་དུ་ཐལ་བ་ཟ་བར་གྱུར་ཞིག

15 ངས་ཁྱོད་དང་བུད་མེད་གཉིས་དགྲ་བོར་འབྱུང་བར་བྱ། ཁྱོད་ཀྱི་རྒྱུད་དང་མོའི་རྒྱུད་ཀྱི་བར་ཕན་ཚུན་སྡང་བར་བྱ་དང༌། ཁོང་གིས་ཁྱོད་ཀྱི་མགོ་བརྫི་ཡོང༌། ཡང་ཁྱོད་ཀྱིས་ཁོང་གི་ཞབས་རྟིང་ལ་སོ་བཏབ་ཡོང་” ཞེས་གསུངས།

16 ཡ་ཝེ་དཀོན་མཆོག་གིས་བུད་མེད་ལ་ “ངས་ཁྱོད་ཀྱི་ཕྲུ་གུ་འཁོར་བའི་དཀའ་ངལ་དང་སྐྱེ་བའི་སྡུག་བསྔལ་མང་དུ་གཏོང་བར་བྱ་སྟེ། འོན་ཀྱང་ཁྱོད་ཀྱིས་ཁྱོ་བོ་མཉམ་དུ་སྡོད་འདོད་པ་དང༌། ཁོས་ཁྱོད་ལ་དབང་བྱེད་ཡོང་” ཞེས་གསུངས།

17 ཡང་དཀོན་མཆོག་གིས་མི་དེ་ལ་ “ཁྱོད་ཀྱིས་རང་གི་གཏན་གྲོགས་ཀྱི་ཁ་ལ་ཉན་ཏེ། ངས་ཟ་མི་ཆོག་ཅེས་བཤད་པའི་ཤིང་འབྲས་ལས་ཁྱོད་ཀྱིས་བཟས་པས། ངས་ཁྱོད་ཀྱི་འདེབས་ལས་དཀའ་ལས་སུ་འགྱུར་བར་བྱ། ས་ཞིང་ལས་སྟོན་ཐོག་སྡུད་པའི་ཆེད་ནམ་འཚོ་བའི་བར་དུ་ཁྱོད་ཀྱིས་དཀའ་ལས་བརྒྱག་དགོས།

18 ས་ཞིང་ལས་ཁྱོད་ལ་ཚེར་མ་དང་རྩ་ངན་སྐྱེ་ཡོང༌། དེ་སྐྱེས་པའི་ས་ཞིང་གི་སྔོ་ཚོད་རྣམས་ཁྱོད་ཀྱིས་ཟ་དགོས།

19 ཁྱོད་ནི་ཐལ་བ་ནས་བཟོས་པའི་རྐྱེན་གྱིས་ཁྱོད་ཐལ་བར་མ་ལོག་པའི་བར་དུ་ས་ལས་འབྲས་བུ་འཐོབ་པའི་ཕྱིར་རྔུལ་ནག་འདོན་ཏེ་དཀའ་ངལ་སྤྱད་དགོས། མཐའ་མར་ཁྱོད་ནི་ཐལ་བ་ནས་བཟོས་པ་ཡིན་པས་ཁྱོད་ཐལ་བར་འགྱུར་རོ་” ཞེས་གསུངས།

20 དེ་ནས་མིང་ལ་ཨ་དམ་ཞེས་པའི་མི་དེས་རང་གི་གཏན་གྲོགས་ཀྱི་མིང་ལ་ཧ་ཝ་ཞེས་བཏགས། གང་ལགས་ཟེར་ན། མོ་རང་ནི་མི་ཐམས་ཅད་ཀྱི་ཨ་མ་ཡིན་པས་སོ།

21 ཡ་ཝེ་དཀོན་མཆོག་གིས་ཨ་དམ་དང་ཁོའི་གཏན་གྲོགས་ལ་སེམས་ཅན་གྱི་ལྤགས་པའི་གོས་བཟོས་གནང་ནས་ཁོ་ཚོ་ལ་གཡོགས་པར་མཛད།

22 དེ་ནས་ཡ་ཝེ་དཀོན་མཆོག་གིས་ “ལྟོས་ཤིག མི་དེས་བཟང་ངན་ཤེས་ཏེ་ང་ཚོ་དང་འདྲ་བར་གྱུར་བས། ད་ཁོས་སྲོག་དང་ལྡན་པའི་ཤིང་གི་འབྲས་བུ་ལས་ལེན་མི་ཆོག དེ་མིན་ཁོས་དེ་བཟས་ནས་ཚེ་དཔག་ཏུ་མེད་པ་འཐོབ་ཡོང་” ཞེས་གསུངས།

23 དེའི་རྐྱེན་གྱིས་ཡ་ཝེ་དཀོན་མཆོག་གིས་ས་ལས་བཟོས་གནང་བའི་མི་དེ་ཞིང་ལས་བྱེད་པའི་ཆེད་ཨེ་དེན་གྱི་ལྡུམ་ར་ནས་ཕྱིར་བཏོན་གནང༌།

24 ཁོང་གིས་མི་དེ་བསྐྲད་དེ་ལྡུམ་རའི་ནང་གི་སྲོག་དང་ལྡན་པའི་ཤིང་གི་སར་འགྲོ་བའི་ལམ་སྲུང་བའི་ཕྱིར། ལྡུམ་རའི་ཤར་ཕྱོགས་སུ་ཀེ་རུབ་ཟེར་བའི་སྲུང་མཁན་ཚོ་དང༌། ཕྱོགས་བཞིར་འཁོར་བའི་མེ་འབར་བའི་རལ་གྲི་ཞིག་བཞག་གནང་ངོ༌།།

***************************************************