Ephesians (3) – ཨེ་ཕེ་སུ་པ། (3)

1 དེའི་ཕྱིར་ང་པའུ་ལུ་ཁྱེད་ཡ་ཧུ་དཱ་པ་མིན་པ་རྣམས་ཀྱི་དོན་དུ་མཱ་ཤི་ཀ་ཡེ་ཤུའི་བཙོན་པ་ཡིན།

2 ཁྱེད་རྣམས་ལ་ཕན་པའི་ཆེད་དུ་ང་ལ་དཀོན་མཆོག་གི་ཐུགས་རྗེ་སྤེལ་བའི་ལས་འགན་གནང་བ་ཁྱེད་ཚོས་ཐོས་ཡོད།

3 ངས་སྔར་རགས་ཙམ་བྲིས་པ་ལྟར་མངོན་སུམ་དུ་གྱུར་བའི་སྒོ་ནས་ང་གསང་བ་དེའི་ཤེས་མཁན་དུ་གྱུར།

4 དེ་བཀླགས་ནས་ང་ནི་མཱ་ཤི་ཀའི་གསང་བ་རྟོགས་མཁན་ཡིན་པ་ཁྱེད་ཚོས་ཤེས་ཐུབ།

5 གསང་བ་དེ་སྔོན་གྱི་མི་རབས་ལ་མངོན་སུམ་དུ་མ་མཛད་ཀྱང༌། ད་ལྟ་དམ་པའི་ཐུགས་ཉིད་ཀྱི་སྒོ་ནས་ཁོང་གི་སྐུ་ཚབ་དམ་པ་དང༌། ལུང་སྟོན་པ་རྣམས་ལ་མངོན་པར་མཛད།

6གསང་བ་དེ་ནི་འཕྲིན་བཟང་བརྒྱུད་ནས་མཱ་ཤི་ཀ་ཡེ་ཤུའི་ཐོག་ནས་ཡ་ཧུ་དཱ་པ་མིན་པ་རྣམས་ཡ་ཧུ་དཱ་པ་དང་མཉམ་དུ་དཀོན་མཆོག་གི་བྱིན་རླབས་ཀྱི་བགོ་སྐལ་ཐོབ་མཁན་དང༌། སྐུ་ལུས་གཅིག་གི་ཡན་ལག དཀོན་མཆོག་གི་ཞལ་ཆད་འཛིན་མཁན་བཅས་སུ་གྱུར།

7 ཁོང་གི་ནུས་མཐུ་ཡིས་ང་ལ་གནང་བའི་དཀོན་མཆོག་གི་ཐུགས་རྗེ་བཞིན་དུ་ང་ནི་འཕྲིན་བཟང་དེའི་ཞབས་ཏོག་ཏུ་གྱུར།

8 ང་དཀོན་མཆོག་གི་མི་རྣམས་ལས་དམའ་ཤོས་ཡིན་ཡང༌། མཱ་ཤི་ཀའི་དཔག་ཏུ་མེད་པའི་ཐུགས་རྗེ་དེ་ཡ་ཧུ་དཱ་པ་མིན་པ་རྣམས་ལ་སྒྲོག་པ་དང༌།

9ཐམས་ཅད་འགོད་པ་གནང་མཁན་དཀོན་མཆོག་གི་ནང་ན་གནའ་སྔ་མོ་ནས་སྦས་པའི་གསང་བ་མི་ཐམས་ཅད་ལ་མངོན་པར་བྱེད་པའི་ཐུགས་རྗེ་དེ་ང་ལ་གནང་བྱུང༌།

10དེ་ནི་ཆོས་ཚོགས་ཀྱི་སྒོ་ནས་ཞིང་ཁམས་སུ་སྡོད་པའི་མཐུ་ལྡན་དང་དབང་ཅན་རྣམས་ལ་དཀོན་མཆོག་གི་ཤེས་རབ་རྣམ་པ་སྣ་ཚོགས་ད་ལྟ་མངོན་པར་འགྱུར་བའི་ཆེད་དུ་ཡིན།

11 ཡང་དེ་ནི་དཀོན་མཆོག་གིས་ཐོག་མཐའ་མེད་པའི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་བསྒྲུབས་པར་མཛད།

12 ཁོང་བརྒྱུད་ནས་ང་ཚོ་འཇིགས་པ་མེད་པར་ཡིད་རྟོན་བྱེད་ཅིང་དད་པའི་སྒོ་ནས་དཀོན་མཆོག་གི་མདུན་དུ་འགྲོ་བའི་ལམ་ཡོད།

13 དེའི་ཕྱིར་ངའི་སྡུག་བསྔལ་ཁྱེད་རྣམས་ལ་ཕན་པའི་ཆེད་དུ་ཡིན་པས་ཡིད་ཐང་མི་ཆད་པའི་ཞུ་བ་ཞུ།

ཨེ་ཕེ་སུ་པ་རྣམས་ཀྱི་ཕྱིར་སྨོན་ལམ་འདེབས་པ།

14-15 དེ་བས་ན། གནམ་ས་གཉིས་ལ་ཡོད་པའི་ཁྱིམ་ཚང་རེ་རེ་ལ་མིང་བྱུང་བའི་ཡབ་ཀྱི་དྲུང་དུ་པུས་མོ་སར་བཙུགས་ཏེ་ངས་སྨོན་ལམ་འདི་ལྟར་འདེབས།

16 ཁོང་གི་དཔག་ཏུ་མེད་པའི་གཟི་བརྗིད་དང་མཚུངས་ཏེ། ཁོང་གི་ཐུགས་ཉིད་ཀྱི་སྒོ་ནས་ཁྱེད་ཚོའི་སེམས་སྟོབས་ཤུགས་ཀྱིས་བརྟན་པར་འགྱུར་ཞིང༌།

17 དད་པའི་སྒོ་ནས་མཱ་ཤི་ཀ་ནི་ཁྱེད་ཚོའི་སེམས་ཀྱི་ནང་དུ་བཞུགས་པ་དང༌། བྱམས་པའི་རྨང་གཞི་ལ་བརྟེན་ནས།

18 དད་ལྡན་ཐམས་ཅད་དང་མཉམ་དུ་མཱ་ཤི་ཀའི་བྱམས་པ་ནི་ཚད་ལས་འདས་པ་ཡིན་པ་རྟོགས་ཐུབ་པ་དང༌།

19 དཀོན་མཆོག་གི་ཚེ་སྲོག་དང་ནུས་ཤུགས་ཀྱིས་ཁྱེད་ཚོ་གང་བར་འགྱུར་བའི་ཆེད་དུ། ཁྱེད་ཚོས་བློ་ཡུལ་ལས་འདས་པའི་བྱམས་པ་དེ་རྟོགས་པར་ཤོག

20 ད་ང་ཚོའི་ནང་དུ་ལས་སྒྲུབ་པའི་ནུས་མཐུའི་སྒོ་ནས་ང་ཚོས་ཞུ་བ་དང་བསམ་པ་ཐམས་ཅད་དེ་བས་ལྷག་པར་མཛད་ཐུབ་མཁན་ཁོང་ལ།

21 ཆོས་ཚོགས་དང་མཱ་ཤི་ཀ་ཡེ་ཤུའི་ཐོག་ནས་དུས་རྒྱུན་དུ་མི་རབས་ནས་མི་རབས་ཐམས་ཅད་དུ་བསྟོད་པ་ཕུལ་བར་ཤོག ཨ་མེན།།

 

*********************************

Ephesians (2) – ཨེ་ཕེ་སུ་པ། (2)

1 སྔོན་ཆད་ཁྱེད་ཚོ་ནི་ཆོས་ཁྲིམས་དང་འགལ་བ་དང༌། སྡིག་ཉེས་ཀྱི་རྐྱེན་གྱིས་འཆི་བ་དང་འདྲ་བ་ཡིན་ཏེ།

2 འཇིག་རྟེན་འདིའི་ལུགས་སྲོལ་ངན་པ་སྲུང་ཞིང༌། མི་མཐོང་བའི་ཡུལ་གྱི་དབང་པོ་བདུད་རྒྱལ་ཏེ་དཀོན་མཆོག་གི་བཀའ་ལ་མི་ཉན་པ་རྣམས་ལ་དབང་སྒྱུར་བྱེད་མཁན་གྱི་རྗེས་སུ་འབྲངས།

3 སྔར་ང་ཚོ་ཐམས་ཅད་ཀྱང་ཁོ་ཚོའི་ཁྲོད་དུ་བསྡད་དེ་འདོད་ཆགས་ཀྱི་དབང་འོག་ཏུ་ཡོད་ཅིང༌། ལུས་སེམས་ཀྱི་འདོད་པ་ལྟར་སྤྱོད་པ་བྱས་པས། གཞན་རྣམས་ལྟར་དཀོན་མཆོག་གི་ཆད་པ་ཕོག་འོས་པ་ཡིན།

4 འོན་ཀྱང་ཐུགས་རྗེ་ཕྱུག་པའི་དཀོན་མཆོག་གིས་ང་ཚོར་ཤིན་ཏུ་བྱམས་ཤིང་གཅེས་པས།

5 ང་ཚོས་སྡིག་ཉེས་ཀྱི་ལས་བྱས་པའི་རྐྱེན་གྱིས་འཆི་བ་དང་འདྲ་བ་ཡིན་ཡང༌། མཱ་ཤི་ཀ་དང་མཉམ་དུ་སླར་གསོན་དུ་མཛད། (ཐུགས་རྗེའི་སྒོ་ནས་ཁྱེད་ཚོར་ཐར་པ་ཐོབ་)

6 ཡང་ཁོང་དང་ལྷན་དུ་སླར་གསོན་དུ་མཛད་ནས་མཱ་ཤི་ཀ་ཡེ་ཤུའི་ཐོག་ནས་ང་ཚོ་ཁོང་དང་མཉམ་དུ་ཞིང་ཁམས་ལ་སྡོད་དུ་བཅུག

7དེ་ནི་མ་འོངས་པའི་དུས་སུ་ཁོང་གིས་མཱ་ཤི་ཀ་ཡེ་ཤུ་བརྒྱུད་ནས་ང་ཚོར་བཀའ་དྲིན་མཛད་པའི་སྒོ་ནས་ཁོང་གི་བླ་ན་མེད་པའི་ཐུགས་རྗེ་སྟོན་པའི་ཆེད་དུ་ཡིན་པས་སོ།

8 གང་ཡིན་ཞེ་ན། ཐུགས་རྗེའི་སྒོ་ནས་ཁྱེད་ཚོ་དད་པ་ཡིས་ཐར་བར་གྱུར། དེ་ནི་ཁྱེད་རྣམས་ལས་མ་འབྱུང༌། དཀོན་མཆོག་གི་གནང་སྦྱིན་ཡིན།

9 མི་སུས་ཀྱང་རང་བསྟོད་མི་བྱེད་པའི་ཕྱིར། ཐར་པ་དེ་ནི་རང་གི་བྱ་སྤྱོད་ལས་བྱུང་བ་མ་ཡིན་ནོ།

10 གང་ལགས་ཟེར་ན། ང་ཚོ་ཁོང་གི་བཟོ་བཀོད་སྤུས་ལེགས་ཤིག་ཡིན་ཏེ། མཱ་ཤི་ཀ་ཡེ་ཤུའི་ཐོག་ནས་དཀོན་མཆོག་གིས་སྔར་གྲ་སྒྲིག་མཛད་ཟིན་པའི་ལས་བཟང་གི་ཆེད་དུ་ང་ཚོ་བཀོད་པ་ཡིན།

མཱ་ཤི་ཀའི་ནང་ན་གཅིག་ཏུ་འགྱུར་བ།

11 དེའི་ཕྱིར་སྐྱེས་དུས་ནས་ཡ་ཧུ་དཱ་པ་མིན་པ་རྣམས། སྔར་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་རྣམས་ཀྱིས་ཁྱེད་ཚོར་ཆོས་ཀྱི་རྟགས་མེད་པའི་ལྷ་ཆོས་པ་ཞེས་ཟེར་ཞིང༌། ཡ་ཧུ་དཱ་པའི་ཆོས་ཀྱི་རྟགས་ནི་མིའི་ལག་པས་ལུས་སྟེང་དུ་རྟགས་གང་བྱེད་པ་ཁོ་ན་ཡིན།

12 དེའི་དུས་སུ་ཁྱེད་རྣམས་མཱ་ཤི་ཀ་དང་འབྲེལ་བ་མེད་ཅིང༌། ཡི་སི་ར་ཨེལ་གྱི་རྒྱལ་སྲིད་ལ་མི་གཏོགས། དཀོན་མཆོག་གིས་གང་ཞལ་གྱིས་བཞེས་པ་དང་ཁ་བྲལ་ཏེ། ཁྱེད་ཚོ་རེ་བ་མེད་ཅིང༌། འཇིག་རྟེན་འདིར་དཀོན་མཆོག་དང་འབྲེལ་བ་མེད་པ་ཡིན་པར་ཁྱེད་ཚོས་དྲན་པར་གྱིས་ཤིག

13 འོན་ཀྱང་མཱ་ཤི་ཀ་ཡེ་ཤུའི་ཐོག་ནས་སྔོན་ལ་ཐག་རིང་དུ་བསྡད་པ་ཁྱེད་རྣམས་ད་ལྟ་མཱ་ཤི་ཀའི་སྐུ་ཁྲག་གི་སྒོ་ནས་ཐག་ཉེ་བར་ཁྲིད་པ་ཡིན།

14 གང་ཡིན་ཞེ་ན། ཁོང་ཉིད་ངེད་རྣམས་ཀྱི་སྡུམ་མཛད་མཁན་ཡིན། ཁོང་གིས་ཡ་ཧུ་དཱ་པ་དང༌། ཡ་ཧུ་དཱ་པ་མིན་པ་རྣམས་གཅིག་ཏུ་མཛད་ཅིང༌། སྡང་སེམས་ཀྱི་བར་ཆད་གཏོར་བཤིག་མཛད།

15 མཱ་ཤི་ཀའི་ནང་ན་གཉིས་པོ་དེ་ལས་མི་གསར་པ་གཅིག་ཏུ་མཛད་པའི་ཆེད་དུ་ཁོང་གིས་བཀའ་ཁྲིམས་དང་སྒྲིག་ལམ་ལྡན་པའི་ཆོས་ཁྲིམས་མེད་པར་མཛད། དེ་ལྟར་དེ་གཉིས་བསྡུམས་ནས།

16སྐུ་གཟུགས་གཅིག་པོའི་ཐོག་ནས་རྒྱང་ཤིང་སྒང་ལ་གྲོངས་པའི་སྒོ་ནས་འདི་གཉིས་པོ་དཀོན་མཆོག་དང་སྡུམ་པར་མཛད་དེ་ཁོ་ཚོའི་སྡང་སེམས་དེ་མེད་པར་ཡང་མཛད།

17 ཁོང་ཕེབས་ནས་ཁྱེད་ཚོ་ཐག་རིང་པོ་ཡོད་པ་རྣམས་དང༌། ཐག་ཉེ་པོ་ཡོད་པ་གཉིས་ལ་ཞི་བདེའི་འཕྲིན་བཟང་བསྒྲགས།

18 གང་ལགས་ཤེ་ན། མཱ་ཤི་ཀ་བརྒྱུད་ནས་ང་ཚོ་གཉིས་ཀ་དམ་པའི་ཐུགས་ཉིད་གཅིག་གི་སྒོ་ནས་ཡབ་དང་འབྲེལ་བ་བྱེད་སྲིད།

19 དེའི་ཕྱིར་ད་ཕྱིན་ཆད་ཁྱེད་ཚོ་ཕྱི་པའམ་ངོ་མི་ཤེས་པ་མིན་ཏེ། དམ་པར་འགྱུར་བ་རྣམས་དང་ཡུལ་གཅིག་པ་དང༌། དཀོན་མཆོག་གི་ཁྱིམ་མི་ཡིན།

20 ཁྱིམ་མིའི་ཁང་པ་དེའི་རྨང་གཞི་ནི་སྐུ་ཚབ་དང་ལུང་སྟོན་པ་རྣམས་ཡིན་ལ། རྨང་རྡོ་གཙོ་བོ་ནི་མཱ་ཤི་ཀ་ཡེ་ཤུ་རང་ཉིད་ཡིན།

21 མཱ་ཤི་ཀར་བརྟེན་ཏེ་ཁང་པ་ཆ་ཚང་གཅིག་ཏུ་སྦྲེལ་ནས་གཙོ་བོའི་མཆོད་ཁང་དམ་པ་ཞིག་ཏུ་འགྱུར།

22 ཁོང་བརྒྱུད་ནས་ཁྱེད་ཚོའང་དམ་པའི་ཐུགས་ཉིད་ཀྱི་ངང་ནས་དཀོན་མཆོག་གི་བཞུགས་གནས་ཤིག་ཏུ་སྐྲུན་བཞིན་ཡོད་དོ།།

 

************************************

Ephesians (1) – ཨེ་ཕེ་སུ་པ། (1)

1 དཀོན་མཆོག་གི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས། ཨེ་ཕེ་སུ་གྲོང་ཁྱེར་དུ་ཡོད་པའི་དཀོན་མཆོག་གི་མི་རྣམས་ཏེ། མཱ་ཤི་ཀ་ཡེ་ཤུའི་ཐོག་ནས་ལྷག་བསམ་ཆེ་བ་རྣམས་ལ་འཕྲིན་ཡིག་འདི་ཕུལ་ལོ།

2 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག

དཀོན་མཆོག་ནས་བྱིན་རླབས་ཐོབ་པ།

3 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་འབུལ་བར་ཤོག མཱ་ཤི་ཀའི་ཐོག་ནས་ཁོང་གིས་ང་ཚོར་སེམས་ཉིད་ཀྱི་བྱིན་རླབས་ཐམས་ཅད་ཞིང་ཁམས་སུ་གནང༌།

4 ང་ཚོ་དཀོན་མཆོག་གི་སྤྱན་སྔར་དམ་པ་དང་སྐྱོན་མེད་པར་འགྱུར་བའི་ཆེད་དུ་འཇིག་རྟེན་མ་བཀོད་པའི་སྔོན་ལ་ཁོང་གིས་མཱ་ཤི་ཀའི་ཐོག་ནས་ངེད་རྣམས་བདམས།

5བྱམས་པའི་སྒོ་ནས་ཁོང་གི་བཀའ་དྲིན་ལྡན་པའི་ཐུགས་དགོངས་བཞིན་དུ་ཡེ་ཤུ་མཱ་ཤི་ཀ་བརྒྱུད་ནས་ང་ཚོ་ཁོང་གི་སྲས་སུ་འགྱུར་བའི་ཕྱིར་སྔར་འདམ་པར་མཛད།

6 དེ་ནི་ཁོང་གི་གཟི་བརྗིད་དང་ལྡན་པའི་ཐུགས་རྗེ་ལ་བསྟོད་པའི་ཆེད་དུ་ཡིན། ཐུགས་རྗེ་དེ་དཀོན་མཆོག་གི་གཅེས་པའི་སྲས་ཀྱི་སྒོ་ནས་ང་ཚོར་གནང༌།

7-9 ཁོང་གི་སྐུ་ཁྲག་ཡིན་པའི་བླུ་རིན་གྱི་ངང་ནས་ང་ཚོའི་སྡིག་ཉེས་སེལ་ཏེ་ཐར་པ་ཐོབ། དེ་ནི་ཁོང་གི་དཔག་ཏུ་མེད་པའི་ཐུགས་རྗེ་བཞིན་དུ་ང་ཚོར་ལྷག་པར་གནང༌། ཤེས་རབ་དང་རྟོགས་པ་ཐམས་ཅད་ཀྱིས་མཱ་ཤི་ཀ་བརྒྱུད་ནས་དཀོན་མཆོག་ཐུགས་དགྱེས་པ་བཞིན་དུ་ཁོང་གི་ཐུགས་དགོངས་ཀྱི་གསང་བ་ང་ཚོར་མངོན་པར་མཛད།

10ཡང་ཁོང་གི་ཐུགས་དགོངས་ནི་དུས་ལ་འབབ་སྐབས་སུ་གནམ་ས་གཉིས་ལ་གང་ཡོད་པ་ཐམས་ཅད་གཅིག་ཏུ་བསྡུས་ནས་མཱ་ཤི་ཀའི་དབང་འོག་ཏུ་འཇུག་པ་དེ་ཡིན།

11 རང་ཉིད་ཀྱི་ཐུགས་དགོངས་བཞིན་དུ་བྱ་བ་ཐམས་ཅད་སྒྲུབ་མཁན་དཀོན་མཆོག་གིས་སྔར་ནས་བསྐོས་པས། མཱ་ཤི་ཀའི་སྒོ་ནས་ང་ཚོ་ལའང་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་སྐལ་བ་ཐོབ་བྱུང༌།

12 དེ་ནི་མཱ་ཤི་ཀ་ལ་ཐོག་མར་རེ་སྒུག་བྱེད་མཁན་ང་ཚོ་ཁོང་གི་གཟི་བརྗིད་ཀྱི་བསྟོད་པའི་དོན་ལ་འཚོ་བའི་ཆེད་དུ་ཡིན།

13 ཁྱེད་ཚོས་ཀྱང་ཐར་པ་གནང་བའི་བདེན་པའི་བཀའ་འཕྲིན་ཐོས་ནས། མཱ་ཤི་ཀ་ལ་དད་པ་བྱས་པས་ཁྱེད་ཚོ་དཀོན་མཆོག་གིས་སྔར་ནས་ཞལ་ཆད་གནང་བའི་དམ་པའི་ཐུགས་ཉིད་ཡིན་པའི་རྒྱ་ཡིས་བཏབ་པར་གྱུར།

14 དཀོན་མཆོག་གི་ཁོངས་མི་རྣམས་ཐར་བར་འགྱུར་བའི་བར་དུ། དམ་པའི་ཐུགས་ཉིད་ནི་ང་ཚོར་འཐོབ་རྒྱུ་ཡིན་པའི་བྱིན་རླབས་ཀྱི་གཏའ་མ་ཡིན། དེ་ནི་དཀོན་མཆོག་གི་གཟི་བརྗིད་ཀྱི་བསྟོད་པ་ཡོང་བའི་ཆེད་དུ་ཡིན།

བཀའ་དྲིན་ཆེ་ཞུ་བ་དང་སྨོན་ལམ་འདེབས་པ།

15 དེ་བས་ན་ཁྱེད་ཚོས་གཙོ་བོ་ཡེ་ཤུ་ལ་དད་ཅིང༌། དཀོན་མཆོག་གི་མི་ཐམས་ཅད་ལ་གཅེས་པར་འཛིན་པའི་སྐོར་ཐོས་པས།

16 སྨོན་ལམ་འདེབས་པའི་དུས་སུ་ངས་ཁྱེད་ཚོ་གླེང་བ་དང༌། ཁྱེད་ཚོའི་དོན་དུ་རྒྱུན་ཆད་མེད་པར་བཀའ་དྲིན་ཆེ་ཞུ།

17 ཁྱེད་ཚོས་ཁོང་དེ་བས་ཡག་པ་ངོ་ཤེས་པའི་ཕྱིར། གཟི་བརྗིད་དང་ལྡན་པའི་ཡབ་སྟེ་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་དཀོན་མཆོག་གིས་ཁྱེད་ཚོར་ཤེས་རབ་དང་རྟོགས་པའི་ཐུགས་ཉིད་གནང་བའི་སྨོན་ལམ་འདེབས།

18 དེ་ནི་ཁྱེད་ཚོའི་བློ་སྒོ་ཕྱེ་ནས་ཁོང་གིས་ཁྱེད་ཚོར་བོས་པའི་རེ་བ་དང༌། དཀོན་མཆོག་གིས་ཁོང་གི་མི་རྣམས་ལ་ཞལ་གྱིས་བཞེས་པའི་བྱིན་རླབས་ཕུན་སུམ་ཚོགས་པ་གང་ཡིན་ཞིང༌།

19 ང་ཚོ་དད་ལྡན་རྣམས་ཀྱི་དོན་ལ་ཁོང་གི་བླ་ན་མེད་པའི་ནུས་མཐུ་གང་ཡིན་པ་ཁྱེད་ཚོས་ཤེས་པའི་ཆེད་དུ་ཡིན། ནུས་མཐུ་དེ་རང་གིས་

20 དཀོན་མཆོག་གིས་མཱ་ཤི་ཀ་འཆི་བ་ནས་སླར་གསོན་པར་མཛད་ནས་ཞིང་ཁམས་སུ་ཁོང་གི་ཕྱོགས་གཡས་ལ་བཞུགས་སུ་བཅུག་གོ

21 དེར་མཱ་ཤི་ཀ་ནི་ཁྲིམས་དང༌། དབང༌། ནུས་མཐུ། མངའ་ཐང༌། གོ་མིང་ཐམས་ཅད་ཀྱི་སྟེང་ལ། དུས་འདིར་མ་ཟད་མ་འོངས་པའི་དུས་སུའང་བཞུགས་སོ།

22 ཡང་དོན་ཐམས་ཅད་མཱ་ཤི་ཀའི་ཞབས་འོག་དུ་བཅུག་པར་མཛད་ཅིང་དཀོན་མཆོག་གིས་ཁོང་ཐམས་ཅད་ཀྱི་དབུ་རུ་བསྐོས་ནས་ཆོས་ཚོགས་ལ་གནང༌།

23 ཆོས་ཚོགས་ནི་ཁོང་གི་སྐུ་ལུས་ཡིན་ཏེ། ཅི་ཡོད་པ་ཐམས་ཅད་ཡོངས་སུ་རྫོགས་པ་མཛད་མཁན་གྱིས་ཡོངས་སུ་རྫོགས་པར་འགྱུར་རོ།།

 

************************************