Acts (21) – མཛད་པ། (21)

1 ཁོ་རྣམས་དང་ཁ་བྲལ་ཏེ་གྲུ་གཟིངས་ལ་བསྡད་ནས་ང་ཚོ་ཀོ་ཟི་ཞེས་པའི་གླིང་ཕྲན་དུ་ཐད་ཀར་ཕྱིན་ཞིང༌། དེའི་སང་ཉིན་རོའོ་ཏི་ཞེས་ཟེར་བའི་གླིང་ཕྲན་དང༌། ས་ཆ་དེ་ནས་པ་ཏ་རཱ་གྲུ་ཁར་སླེབས།

2 དེར་ཕེ་ནི་ཀེ་ཡུལ་ལ་འགྲོ་བའི་གྲུ་གཟིངས་ཤིག་དང་ཕྲད་ནས་དེ་ལ་འཛུལ་ནས་ང་ཚོ་ཕྱིན།

3 ཀིབ་རུ་གླིང་ཕྲན་མཐོང་ནས་དེ་གཡོན་ཕྱོགས་སུ་བཞག་སྟེ་སི་རི་ཡཱ་ཡུལ་ལ་གྲུ་གཟིངས་ཀྱི་དོས་པོ་འདོན་སའི་གྲུ་ཁ་ཐཱ་ཨེར་དུ་སླེབས།

4 དད་ལྡན་རྣམས་བཙལ་ནས་རྙེད་ཅིང་ང་ཚོ་དེར་ཉི་མ་བདུན་གྱི་བར་དུ་བསྡད། ཁོ་རྣམས་ཀྱིས་དམ་པའི་ཐུགས་ཉིད་ཀྱི་ངང་ནས་པའུ་ལུ་ལ་ཡེ་རུ་ཤ་ལེམ་ལ་མ་ཕེབས་ཞེས་ཞུས།

5 དེར་ང་ཚོ་བསྡད་ཐུབ་པའི་དུས་ཚོད་རྫོགས་ནས་ང་ཚོ་ལམ་ལ་ཆས་པ་ལ། དད་ལྡན་ཐམས་ཅད་ཀྱིས་བཟའ་ཟླ་དང་ཕྲུ་གུ་དང་བཅས་པར་ང་ཚོ་གྲོང་ཁྱེར་གྱི་ཕྱི་ཕྱོགས་སུ་བསྐྱལ། ངེད་རྣམས་ཀྱིས་རྒྱ་མཚོའི་འགྲམ་ལ་པུས་མོ་སར་བཙུགས་ཏེ་སྨོན་ལམ་བཏབ།

6 ཕན་ཚུན་གྱེས་མཚམས་ཞུས་ནས་ངེད་རྣམས་གྲུ་གཟིངས་ལ་བསྡད་པ་དང༌། ཁོ་རྣམས་སོ་སོའི་ཁྱིམ་དུ་ཕྱིར་ལོག

7 ཐཱ་ཨེར་ནས་མཚོ་ལམ་བརྒྱུད་དེ་ཕེ་ཏོ་ལེ་མཱ་ཞེས་པའི་གྲུ་ཁར་སླེབས། སྤུན་ཟླ་རྣམས་ལ་འཚམས་འདྲི་ཞུས་ནས་ཉི་མ་གཅིག་ཁོ་ཚོ་དང་མཉམ་དུ་བསྡད།

8 དེའི་ཕྱི་ཉིན་ལ་ཕར་ཕྱིན་ཏེ་སེ་སར་རེ་ཡཱ་གྲོང་ཁྱེར་དུ་སླེབས་པ་དང༌། འཕྲིན་བཟང་སྒྲོག་མཁན་ཕི་ལིབ་ཀྱི་ཁྱིམ་དུ་སོང་ནས་ཁོ་དང་མཉམ་དུ་བསྡད། ཕི་ལིབ་ནི་བདུན་པོའི་ནང་ནས་གཅིག་ཡིན།

9 ཁོ་ལ་ཆང་ས་རྒྱག་མ་མྱོང་བའི་བུ་མོ་བཞི་ཡོད་པ་ཚང་མ་ལུང་སྟོན་མཁན་ཡིན།

10 དེར་ཉིན་ཁ་ཤས་སྡོད་དུས་ཨ་ག་བཱུ་ཞེས་ཟེར་བའི་ལུང་སྟོན་པ་ཞིག་ཡ་ཧུ་དཱ་ཡུལ་ནས་སླེབས་པ་དང༌།

11 ངེད་རྣམས་ཀྱི་རྩར་ཡོང་སྟེ། པའུ་ལུའི་སྐེ་རགས་བླངས་ནས་རང་གི་རྐང་ལག་བཅིངས་ཏེ་ཁོང་གིས་ “དམ་པའི་ཐུགས་ཉིད་ཀྱིས་འདི་སྐད་དུ། ཡེ་རུ་ཤ་ལེམ་གྱི་ཡ་ཧུ་དཱ་པ་རྣམས་ཀྱིས་སྐེ་རགས་འདིའི་བདག་པོ་འདི་ལྟར་བཅིངས་ནས་ཡ་ཧུ་དཱ་པ་མིན་པའི་ལག་ཏུ་གཏད་” ཅེས་གསུངས།

12 དེ་ཐོས་ནས་ང་ཚོ་དང་ཡུལ་དེའི་མི་རྣམས་ཀྱིས་པའུ་ལུ་ལ་ཡེ་རུ་ཤ་ལེམ་ལ་མ་ཕེབས་པར་ནན་གྱིས་བསྐུལ།

13 ལན་དུ་པའུ་ལུས་ “ཁྱོད་རྣམས་ངུ་ནས་ངའི་སྙིང་གས་པར་བྱེད་པ་འདི་ཅི་ཡིན། ང་ནི་གཙོ་བོ་ཡེ་ཤུའི་མཚན་གྱི་ཕྱིར་འཆིང་བར་འགྱུར་བ་མ་ཟད། ཡེ་རུ་ཤ་ལེམ་ལ་ཤི་རྒྱུར་ཡང་གྲ་སྒྲིག་ཡོད་” ཅེས་གསུངས།

14 ཁོང་གི་ཐུགས་བསྒྱུར་མི་ཐུབ་པས་ང་ཚོས་ “གཙོ་བོ་དཀོན་མཆོག་གི་དགོངས་པ་འགྲུབ་པར་ཤོག་” ཅེས་སྨྲས་པ་དང་ཁ་རོག་བསྡད།

15 དེའི་རྗེས་སུ་ལམ་ཆས་གྲ་སྒྲིག་བྱས་ནས་ང་ཚོ་ཡེ་རུ་ཤ་ལེམ་དུ་སོང༌།

16 སེ་སར་རེ་ཡཱ་གྲོང་ཁྱེར་གྱི་ཉེ་གནས་ལས་ཁ་ཅིག་ངེད་རྣམས་དང་མཉམ་དུ་ཕྱིན་ཏེ། ཁོ་ཚོས་ཀིབ་རུ་གླིང་ཕྲན་གྱི་མི་སྔ་མོ་ནས་ཉེ་གནས་ཡིན་པ་ནཱ་ཟོན་གྱི་ཁྱིམ་དུ་སྡོད་པའི་ཕྱིར་ངེད་རྣམས་འཁྲིད།

གཙོ་བོ་ཡེ་ཤུའི་གཅུང་པོ་ཡ་ཀོབ་དང་མཇལ་བ།

17 ཡེ་རུ་ཤ་ལེམ་ལ་སླེབས་ནས་དེར་ཡོད་པའི་སྤུན་ཟླ་རྣམས་ཀྱིས་ང་ཚོ་དགའ་བའི་ངང་ནས་བསུས།

18 དེའི་སང་ཉིན་ཡ་ཀོབ་མཇལ་བར་པའུ་ལུ་ང་ཚོ་དང་མཉམ་དུ་ཕེབས་ཤིང༌། འགན་འཁུར་བ་ཐམས་ཅད་ཀྱང་དེར་ཡོད།

19 པའུ་ལུས་ཁོ་ཚོར་འཚམས་འདྲི་ཞུས་ནས། དཀོན་མཆོག་གིས་ཁོང་གི་ལས་ཀ་བརྒྱུད་དེ་ཡ་ཧུ་དཱ་པ་མིན་པ་རྣམས་ཀྱི་ནང་ལ་གང་མཛད་པ་རེ་རེ་བཞིན་གསུངས།

20 དེ་ཐོས་ནས་ཁོ་ཚོས་དཀོན་མཆོག་ལ་བསྟོད་པ་ཕུལ་བ་དང༌། པའུ་ལུ་ལ་ “སྤུན་ཟླ་ལགས། ཡ་ཧུ་དཱ་པ་རྣམས་ཀྱི་ཁྲོད་དུ་མི་སྟོང་ཕྲག་མང་པོ་དད་ལྡན་པར་གྱུར་བ་ཁྱེད་ཀྱིས་གཟིགས། ཁོ་ཚོ་ཐམས་ཅད་ཀྱིས་བརྩོན་སེམས་ཆེན་པོས་ཆོས་ཁྲིམས་སྲུང་གི་ཡོད།

21ཡང་ཡ་ཧུ་དཱ་པ་མིན་པའི་ཁྲོད་དུ་སྡོད་པའི་ཡ་ཧུ་དཱ་པ་ཐམས་ཅད་ལ་ཁྱེད་ཀྱིས་མོ་ཤེའི་ཆོས་ཁྲིམས་སྤོང་བར་བསྐུལ་ཏེ་ཁོ་ཚོའི་བུ་རྣམས་ལ་ཡ་ཧུ་དཱ་པའི་ཆོས་ཀྱི་རྟགས་མི་རྒྱག་ཅིང༌། ཆོས་ཀྱི་ལུགས་སྲོལ་མི་སྲུང་བར་སྟོན་ཞེས་པའི་གཏམ་འཆལ་ཁོ་ཚོས་ཐོས།

22 བྱས་ན། ཁྱེད་འདིར་ཕེབས་པ་ཁོ་ཚོས་ཐོས་པར་འགྱུར་ངེས་ཡིན། ང་ཚོས་ཅི་བྱ།

23 ང་ཚོས་སྨྲ་བ་ལྟར་མཛོད་ཅིག ང་ཚོའི་ནང་ན་དམ་བཅའ་པ་བཞི་ཡོད།

24 ཁོ་ཚོ་དང་མཉམ་དུ་ཆོས་ཀྱི་གཙང་སྦྲ་བྱེད་པའི་ཆོ་ག་བྱོས་དང༌། ཁོ་ཚོའི་སྐྲ་འབྲེག་པའི་ཕྱིར་ཁོ་ཚོར་འགྲོ་སོང་ཕུལ་ཅིག དེ་ནས་མི་རྣམས་ཀྱིས་ཁྱེད་ཀྱི་སྐོར་ལ་ཐོས་པའི་གཏམ་མི་བདེན་པ་ཡིན་ཞིང༌། ཁྱེད་ཉིད་ཀྱིས་ཆོས་ཁྲིམས་སྲུང་བ་མི་ཐམས་ཅད་ཀྱིས་ཤེས་པར་འགྱུར།

25 ཡང་དད་པར་གྱུར་བའི་ཡ་ཧུ་དཱ་པ་མིན་པ་རྣམས་ཀྱི་སྐོར་ང་ཚོས་ཐག་གཅོད་བྱས་ཏེ། ཁོ་ཚོས་ལྷ་སྐུ་ལ་ཕུལ་བའི་ཤ ཁྲག སྐེ་བཙིར་ནས་གསོད་པའི་དུད་འགྲོའི་ཤ ལོག་གཡེམ་བཅས་ལ་འཛེམ་དགོས་ཞེས་པའི་ཡི་གེ་ཞིག་བཏང་” ཞེས་བཤད།

26 དེའི་སང་ཉིན་མི་དེ་ཚོ་བཞི་འཁྲིད་དེ་པའུ་ལུས་ཁོ་ཚོ་དང་བཅས་པར་གཙང་སྦྲ་བྱེད་པའི་ཆོ་ག་མཛད། དེ་ནས་ཁོང་ཚོ་རེ་རེའི་ཆེད་དུ་མཆོད་པ་ཕུལ་བའི་ཉི་མ་དང༌། གཙང་སྦྲ་འགྲུབ་པའི་དུས་ཡ་ཧུ་དཱ་པའི་བླ་མར་སྨྲ་བའི་ཕྱིར་མཆོད་ཁང་ཆེན་མོར་ཕེབས།

པའུ་ལུ་འཛིན་བཟུང་བྱས་པ།

27 གཙང་སྦྲ་བྱེད་པའི་ཉིན་བདུན་པོ་རྫོགས་ལ་ཉེ་བའི་སྐབས་ཨེ་ཞེ་ཡཱ་ཞིང་ཆེན་ནས་ཡིན་པའི་ཡ་ཧུ་དཱ་པ་ཁ་ཅིག་གིས་མཆོད་ཁང་ལ་པའུ་ལུ་མཐོང་ནས། མི་ཚོགས་ཀུན་ལ་ངན་བསྐུལ་བྱས་ཏེ་ཁོང་འཛིན་བཟུང་བྱས།

28 ཁོ་ཚོས་སྐད་ཆེན་པོས་ “ཡི་སི་ར་ཨེལ་པ་རྣམས་ང་ཚོར་རོགས་རམ་བྱོས་ཤིག མི་འདི་ནི་ཡུལ་ཀུན་ཏུ་མི་ཐམས་ཅད་ལ་ངེད་རྣམས་ཀྱི་མི་རིགས་དང༌། ཆོས་ཁྲིམས། གནས་འདི་བཅས་ལ་ངོ་རྒོལ་བྱེད་མཁན་ཡིན། དེས་མ་ཚད་གྷི་རིག་པ་རྣམས་ཀྱང་མཆོད་ཁང་གི་ནང་དུ་འཁྲིད་པས་ཁོས་གནས་མཆོག་འདི་མི་གཙང་བར་བྱས་” ཞེས་བཤད།

29 (གང་ཡིན་ཞེ་ན། སྔར་ཁོ་ཚོས་གྲོང་ཁྱེར་ལ་ཡུལ་ཨེ་ཕེ་སུ་ནས་ཡིན་པའི་ཏྲོ་ཕེ་མུ་ཁོང་དང་འགྲོགས་པར་མཐོང་ཡོད་པས། པའུ་ལུས་ཁོ་མཆོད་ཁང་ཆེན་མོའི་ནང་དུ་འཁྲིད་པ་ཡིན་པར་སྙམ་)

30 གྲོང་ཁྱེར་གྱི་མི་ཚང་མ་འཁྲུགས་པར་གྱུར་ནས། ཁོ་རྣམས་དེར་ལྷན་ཅིག་ཏུ་བརྒྱུགས་ཏེ་པའུ་ལུ་བཟུང༌། ཁོང་མཆོད་ཁང་གི་ར་བ་ནས་ཕྱི་རོལ་དུ་བཙན་ཁྲིད་བྱས་མ་ཐག་ལམ་སེང་རྒྱལ་སྒོ་བརྒྱབ།

31 ཁོང་གསོད་ཐབས་བྱེད་དུས་རོ་མཱ་དམག་མིའི་སྟོང་དཔོན་གྱིས་ཡེ་རུ་ཤ་ལེམ་ཡོངས་སུ་ཟིང་ཆ་ལངས་ཞེས་ཟེར་བའི་གཏམ་ཐོས་ནས།

32 མྱུར་དུ་བརྒྱ་དཔོན་དང་དམག་མི་འཁྲིད་དེ་ཁོ་ཚོའི་རྩར་བརྒྱུགས། མི་ཚོགས་ཀྱིས་སྟོང་དཔོན་དང་དམག་མི་རྣམས་མཐོང་ནས་པའུ་ལུ་ལ་རྡུང་བ་མཚམས་བཞག

33 སྟོང་དཔོན་ཡོང་སྟེ་པའུ་ལུ་འཛིན་བཟུང་བྱས་པ་དང༌། ལྕགས་ཐག་གཉིས་ཀྱིས་འཆིང་བའི་བཀའ་བསྒོས་ནས་ཁོང་སུ་ཡིན་དང་ཅི་ཞིག་བྱས་པའི་སྐད་ཆ་དྲིས།

34 མི་ཚོགས་ཀྱི་ཁྲོད་དུ་ལ་ལས་སྐད་ཆེན་པོས་གཅིག་སྨྲས། ལ་ལས་གཞན་སྨྲས་པས། སྐད་ཅོར་གྱི་རྐྱེན་པས་གནས་ཚུལ་ངེས་པར་ཤེས་མ་ཐུབ་པས་ཁོས་པའུ་ལུ་མཁར་རྫོང་ལ་འཁྲིད་དགོས་པའི་བཀའ་བཏང༌།

35མཁར་རྫོང་གི་རྡོ་སྐས་ཀྱི་བར་དུ་སླེབས་ནས་མི་ངན་འཛོམས་ཏེ་དྲག་སྤྱོད་ཆེན་པོར་གྱུར་བས་དམག་མི་རྣམས་ཀྱིས་ཁོང་ཡར་བཏེགས་ནས་འཁུར་དགོས་བྱུང༌།

36 གང་ཡིན་ཟེར་ན། མི་ཚོགས་མང་པོ་ཞིག་ཁོང་ཚོའི་རྗེས་སུ་འབྲངས་ཏེ་སྐད་ཆེན་པོས་ “ཁོ་སོད་ཅིག་” ཅེས་སྨྲས།

37 མཁར་རྫོང་གི་ནང་དུ་འཁྲིད་པའི་སྐབས་སུ་པའུ་ལུས་སྟོང་དཔོན་ལ་ “ཁྱེད་ལ་གཅིག་ཞུས་ན་ཆོག་གམ་” ཞེས་གསུངས་པས་སྟོང་དཔོན་གྱིས་ “ཁྱོད་ཀྱིས་གྷི་རིག་སྐད་ཤེས་སམ།

38དེས་ན་ཁྱོད་ནི་ཉེ་ཆར་ཟིང་འཁྲུག་བསླངས་ནས་ལྐོག་གསོད་གཏོང་མཁན་ཟེར་བའི་ངོ་ལོག་པ་བཞི་སྟོང་དབེན་གནས་ལ་འཁྲིད་མཁན་ཨེ་ཇེབ་པ་མ་ཡིན་ནམ་” ཞེས་དྲིས་པས།

39 ལན་དུ་པའུ་ལུས་ “ང་ནི་ཡ་ཧུ་དཱ་པ་དང༌། ཀི་ལིག་ཡཱ་ཡུལ་གྱི་གྲོང་ཁྱེར་གལ་ཆེན་ཊར་སཱུ་ཡི་མངའ་འབངས་ཤིག་ཡིན། མི་ཚོགས་ལ་གཏམ་བརྗོད་པའི་ཆོག་མཆན་གནང་རོགས་གནང་” ཞེས་གསུངས།

40 སྟོང་དཔོན་གྱིས་དེ་ལྟར་ཁས་ལེན་པ་ལ། པའུ་ལུས་རྡོ་སྐས་སུ་ལངས་ནས་མི་ཚོགས་ལ་ལག་བརྡ་བྱས་ཤིང༌། ཁོ་ཚོ་ཁ་ཁུ་སིམ་པོར་གྱུར་ནས་ཡ་ཧུ་དཱ་པའི་སྐད་དུ་གསུངས་སོ།།

 

***************************************

Acts (20) – མཛད་པ། (20)

1 འཁྲུག་པ་དེ་ཞི་བར་གྱུར་བའི་རྗེས་སུ་པའུ་ལུས་ཉེ་གནས་རྣམས་བོས་ཏེ་བསྐུལ་བར་མཛད་ཅིང༌། གྱེས་མཚམས་ཞུས་ནས་མ་ཀེ་དོན་ཡཱ་ཡུལ་དུ་ཕེབས།

2 དད་ལྡན་རྣམས་ལ་སྐུལ་མ་མང་པོ་གནང་སྟེ་ཡུལ་དེ་རྣམས་བརྒྱུད་ནས་ཕེབས་ཤིང༌། དེའི་རྗེས་སུ་ཁོང་གྷི་རིག་ཡུལ་དུ་སླེབས་ནས།

3 ཟླ་བ་གསུམ་དེར་བཞུགས། ཁོང་གྲུ་གཟིངས་ལ་བསྡད་ནས་སི་རི་ཡཱ་ཡུལ་ལ་ཕེབས་གྲབས་ཡོད་པའི་སྐབས་སུ། ཡ་ཧུ་དཱ་པ་རྣམས་ཀྱིས་ཁོང་གསོད་པའི་ཇུས་ངན་བརྩམས་པས་ཁོང་གིས་མ་ཀེ་དོན་ཡཱ་ཡུལ་བརྒྱུད་ནས་ཕྱིར་ཕེབས་རྒྱུར་ཐག་བཅད་དོ།

4 ཁོང་དང་མཉམ་དུ་འགྲོ་མཁན་ནི་པིར་རུ་ཡི་བུ་པུ་རེ་ཡཱ་ནས་ཡིན་པའི་སཱོ་པ་ཏེར་དང༌། ཐེ་ས་ལོ་ནི་ཀེ་ནས་ཡིན་པའི་ཨ་རིས་ཐར་ཀུ་དང་སེ་ཀུན་ཊུ་གཉིས། ཌེར་པེ་ནས་ཡིན་པའི་ག་ཡུ། ཐི་མོ་ཐེ། ཨེ་ཞེ་ཡཱ་ཞིང་ཆེན་ནས་ཡིན་པ་ཏི་ཀི་ཀུ་དང་ཏྲོ་ཕེ་མུ་བཅས་ཡིན།

5 ཁོ་ཚོ་ཚང་མ་སྔོན་དུ་ཕྱིན་ནས་ང་ཚོ་མ་སླེབས་པའི་བར་དུ་ཏྲོ་ཡཱ་གྲོང་ཁྱེར་དུ་བསྒུགས།

6 སྐྱུར་རྩི་མེད་པའི་བག་ལེབ་དུས་ཆེན་གྱི་རྗེས་སུ་ང་ཚོ་ཕི་ལིབ་པཱི་གྲོང་ཁྱེར་ནས་གྲུ་གཟིངས་ལ་ཉི་མ་ལྔ་བསྡད་རྗེས་ཏྲོ་ཡཱ་ལ་ཁོ་ཚོ་དང་ཐུག་ཅིང༌། ཉི་མ་བདུན་དེར་བསྡད།

གཞོན་ནུ་ཡུ་ཏི་ཀུ་སླར་གསོན་དུ་མཛད་པ།

7 བདུན་ཕྲག་གི་ཉིན་དང་པོར་ང་ཚོ་བག་ལེབ་བགོ་བཤའ་རྒྱག་པར་འཛོམས་པའི་ཚེ། པའུ་ལུས་དེའི་སང་ཉིན་ཕར་ཕེབས་པར་དགོངས་པས་ནམ་ཕྱེད་བར་དུ་ཆོས་བསྟན་ཏེ་བཞུགས།

8 ང་ཚོ་ལྷན་དུ་འཛོམས་པའི་ཐོག་ཁང་ལ་མར་མེ་མང་པོ་ཡོད།

9 ཡང་སྒེའུ་ཁུང་གི་འཁྲིས་སུ་བསྡད་པའི་ཡུ་ཏི་ཀུ་ཞེས་ཟེར་བའི་གཞོན་ནུ་ཞིག་ཡོད་དེ། པའུ་ལུས་ཡུན་རིང་པོར་ཆོས་བསྟན་དུས་ཁོ་གཉིད་ལྗིད་པོ་ཁུགས་པས་ཐོག་ས་གསུམ་པ་ནས་སར་ལྷུངས་པ་དང༌། མི་གཞན་གྱིས་འཁྱེར་དུས་ཤི་ཟིན་ཡོད་དོ།

10 པའུ་ལུ་མར་ཕེབས་ནས་རོའི་སྟེང་ལ་བཀབ་ནས་འཐམས། ཁོང་གིས་ “གསོན་པོར་འདུག་པས་དངངས་སྐྲག་མ་བྱེད་ཅིག་” ཅེས་གསུངས།

11 ཐོག་ཁང་དུ་ཕྱིར་ཕེབས་ནས་ཁོང་གིས་གཙོ་བོའི་ཞལ་ཟས་སྤྱོད་པ་དང་ཁ་ལག་བཟས་ཤིང༌། ནམ་ལངས་པའི་བར་དུ་ཁོ་ཚོ་དང་གསུང་གླེང་མང་པོ་མཛད་ནས་ཕར་ཕེབས།

12 གསོན་པོའི་གཞོན་ནུ་དེ་ནང་ལ་འཁྲིད་པས་ཁོ་ཚོ་སེམས་ཤིན་ཏུ་གསོ་བར་གྱུར།

13པའུ་ལུའི་བཀོད་སྒྲིག་ལྟར་ང་ཚོ་སྔོན་དུ་ཕྱིན་ནས་ཨ་སཱོ་ཞེས་པའི་གྲོང་ཁྱེར་བར་དུ་གྲུ་གཟིངས་ལ་བསྡད་དེ་དེར་པའུ་ལུ་དང་ཕྲད་ནས་ང་ཚོ་ཚང་མ་གྲུ་གཟིངས་ལ་བཞུགས་ནས་ཕར་འགྲོ་བར་བསམས། པའུ་ལུ་ཉིད་ཞབས་ཐང་ལ་ཕེབས་རྩིས་གནང༌།

14 ཨ་སཱོ་ལ་ཁོང་ང་ཚོ་དང་མཇལ་ནས་གྲུ་གཟིངས་ལ་བསུས་ཏེ་མཉམ་དུ་མི་ཏི་ལེ་ནེ་གྲོང་ཁྱེར་དུ་སླེབས་ཤིང༌།

15 ས་ཆ་དེ་ནས་ཡང་བསྐྱར་གྲུ་གཟིངས་ལ་བསྡད་དེ་ཕྱི་ཉིན་ལ་ཀི་ཨོ་སི་ཞེས་པའི་གླིང་ཕྲན་གྱི་ཕྱོགས་སུ་སླེབས། དེའི་སང་ཉིན་སཱ་མོ་སི་ཞེས་པའི་གླིང་ཕྲན་དུ་ཡོང་བ་དང༌། དེའི་ཕྱི་ཉིན་མི་ལེ་ཏུ་ཞེས་ཟེར་བའི་གྲུ་ཁར་སླེབས།

16 གང་ཡིན་ཞེ་ན། པའུ་ལུས་ཨེ་ཞེ་ཡཱ་ཞིང་ཆེན་ལ་དུས་འགྱངས་མ་བྱེད་པའི་ཆེད་དུ་ཨེ་ཕེ་སུ་གྲོང་ཁྱེར་ལ་མི་འགྲོ་བར་ཐག་གཅོད་བྱས། དེ་ནི་མྱུར་བར་བསྐྱོད་ནས་ཉི་མ་ལྔ་བཅུ་པའི་དུས་ཆེན་གྱི་ཉིན་མོར་ཡེ་རུ་ཤ་ལེམ་ལ་སླེབས་ན་སྙམ་པས་སོ།།

ཨེ་ཕེ་སུའི་ཆོས་ཚོགས་ཀྱི་འགན་འཁུར་བ་རྣམས་ལ་བཤད་པ།

17 མི་ལེ་ཏུ་ནས་པའུ་ལུས་ཨེ་ཕེ་སུའི་ཆོས་ཚོགས་ཀྱི་འགན་འཁུར་བ་རྣམས་རང་གི་མདུན་དུ་བོས་པ་དང༌།

18 ཁོང་གི་མདུན་དུ་སླེབས་ནས་ཁོང་གིས་ཁོ་རྣམས་ལ་ “ང་ཨེ་ཞེ་ཡཱ་ཞིང་ཆེན་དུ་སླེབས་པའི་ཉིན་དང་པོ་ནས་བཟུང་ཁྱེད་ཚོའི་ཁྲོད་དུ་ངའི་སྤྱོད་ལམ་ཇི་ལྟར་ཡིན་པ་ཁྱེད་རྣམས་ཀྱིས་ཤེས།

19 ཆེས་ཉམ་ཆུང་དང་མིག་ནས་མཆི་མ་ལྷུངས་ཤིང་ངས་གཙོ་བོ་ལ་ཞབས་ཏོག་བསྒྲུབས། ཡ་ཧུ་དཱ་པའི་ཇུས་ངན་ལས་བྱུང་བའི་ཉམས་ཚོད་མྱོང༌།

20 ཁྱེད་རྣམས་ལ་ཕན་པའི་དོན་གང་ཡོད་སྒྲོག་པར་མ་འཛེམ་པར་ངས་མི་ཚོགས་ཀྱི་མདུན་དང་ཁང་པ་རེ་རེར་ཆོས་བསྟན།

21ངས་ཡ་ཧུ་དཱ་པ་དང་གྷི་རིག་པ་གཉིས་ལ་སྤྱོད་པ་ངན་པ་སྤངས་ནས་དཀོན་མཆོག་གི་ཕྱོགས་སུ་སེམས་བསྒྱུར་ཏེ་ང་ཚོའི་གཙོ་བོ་ཡེ་ཤུ་ལ་དད་པ་བྱེད་དགོས་པར་ནན་གྱིས་བསྐུལ།

22 ད་ལྟ་དམ་པའི་ཐུགས་ཉིད་ཀྱིས་བསྐུལ་ནས་ཡེ་རུ་ཤ་ལེམ་ལ་འགྲོ་བཞིན་ཡོད། དེར་ང་ལ་གང་འབྱུང་བ་མི་ཤེས་ཀྱང༌།

23 གྲོང་ཁྱེར་རེར་དམ་པའི་ཐུགས་ཉིད་ཀྱིས་ང་ལ་བཙོན་དང་སྡུག་བསྔལ་མྱོང་བར་འགྱུར་ཞེས་བདེན་དཔང་མཛད་པ་དེ་འབའ་ཞིག་ཤེས།

24འོན་ཀྱང་ངས་རང་གི་བགྲོད་ལམ་མཇུག་རྫོགས་དགོས་ཏེ་གཙོ་བོ་ཡེ་ཤུ་ལས་ཐོབ་པའི་དཀོན་མཆོག་གི་ཐུགས་རྗེའི་འཕྲིན་བཟང་ལ་བདེན་དཔང་བྱེད་པའི་ཞབས་ཏོག་དང་ལས་དོན་བསྒྲུབས་ན། ངས་རང་སྲོག་གཅེས་པར་མི་རྩི།

25 ཁྱེད་ཚོའི་ཁྲོད་དུ་ཕར་འགྲོ་ཚུར་འོངས་ཀྱིས་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་སྟེ། ད་ནས་བཟུང་ཁྱེད་ཚོ་ཚང་མས་ངའི་གདོང་མཐོང་བར་མི་འགྱུར་བ་ངས་ཤེས།

26 དེའི་ཕྱིར་ཁྱེད་ཚོའི་ནང་ནས་སུ་ཞིག་གཙོ་བོ་ཡེ་ཤུ་ལ་དད་པ་མི་བྱེད་པར་ཤི་ན། ང་ལ་འགན་མེད་པ་ཡིན་པར་དེ་རིང་ཁྱེད་ཚོར་དཔང་པོ་བྱེད།

27 གང་ལགས་ཤེ་ན། ངས་ཁྱེད་རྣམས་ལ་དཀོན་མཆོག་གི་དགོངས་པ་ཆ་ཚང་སྒྲོག་པར་མ་འཛེམས་པས་སོ།

28 དམ་པའི་ཐུགས་ཉིད་ཀྱིས་ཁྱེད་ཚོ་ཆོས་ཚོགས་ཀྱི་དོ་དམ་པར་བསྒྱུར་བས་ཁྱེད་ཚོ་རང་ཉིད་དང་ཆོས་ཚོགས་ཀྱི་མི་ཐམས་ཅད་སྲུངས། དེ་ནི་དཀོན་མཆོག་གིས་སྲས་ཀྱི་སྐུ་ཁྲག་བླུ་རིན་གྱིས་ཐོབ་པའི་ཆོས་ཚོགས་ལ་ཁྱེད་ཚོས་ལུག་རྫི་ལྟར་བདག་སྐྱོང་བྱེད་པའི་ཆེད་དུ་ཡིན།

29ང་ཕར་ཕྱིན་པའི་རྗེས་སུ་སྤྱང་ཀི་གདུག་པ་དང་འདྲ་བའི་མི་རྣམས་ལུག་ཁྱུ་དང་འདྲ་བའི་ཁྱེད་ཚོའི་དཀྱིལ་ལ་ཡོང་ནས་དད་ལྡན་རྣམས་ལ་གནོད་པ་བྱེད་པ་ངས་ཤེས།

30 ཁྱེད་ཚོའི་ཚོགས་པའི་ནང་ནས་ཀྱང་ཁ་ཅིག་གིས་དད་ལྡན་རྣམས་རང་གི་ཉེ་གནས་སུ་འཇུག་པའི་ཕྱིར་ལོག་ལྟ་སྟོན་པར་ངེས།

31 དེར་བརྟེན་དོགས་ཟོན་གྱིས་ཤིག ལོ་གསུམ་རིང་ངས་ཉིན་མཚན་མེད་པར་མིག་ཆུ་དང་བཅས་པར་མི་རེ་རེར་ཁ་ཏ་བྱས་པ་དེ་ཡིད་ལ་འཇོག་ཅིག

32 ད་ངས་དཀོན་མཆོག་དང་ཁོང་གི་ཐུགས་རྗེའི་བཀའ་ལ་ཁྱེད་རྣམས་འཆོལ། བཀའ་དེས་ཁྱེད་ཚོར་བློ་སྒོ་འབྱེད་ཅིང་དམ་པ་རུ་འགྱུར་བ་ཐམས་ཅད་དང་མཉམ་དུ་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་བགོ་སྐལ་གནང་ཐུབ་བོ།

33 ངས་མི་སུ་གང་གི་དངུལ་ལམ། གསེར་རམ། གྱོན་གོས་བཅས་ལ་ཧམ་སེམས་བཅངས་མེད།

34 ངས་རང་གི་ལག་པ་གཉིས་ལ་བརྟེན་ནས་ང་དང་ངའི་ལས་རོགས་ཀྱི་དགོས་མཁོ་བསྒྲུབས་པ་ཁྱེད་ཉིད་ཀྱིས་ཤེས།

35 གཙོ་བོ་ཡེ་ཤུ་ཉིད་ཀྱིས་ཐོབ་པ་ལས་སྦྱིན་པ་བདེ་བ་ཆེའོ་ཞེས་གསུངས་པར་དྲན་ཏེ། དེ་བཞིན་དུ་ངལ་རྩོལ་བྱེད་པའི་སྒོ་ནས་ངས་ཐབས་ཀུན་གྱིས་ཁྱེད་ཚོར་སྐྱོ་པོ་རྣམས་ལ་རོགས་པ་བྱེད་དགོས་པའི་མིག་དཔེ་ཞིག་བསྟན་ཡོད་” ཅེས་གསུངས་པའི་རྗེས་སུ།

36 པུས་མོ་སར་བཙུགས་ཏེ་ཁོང་གིས་ཁོ་ཚོ་ཐམས་ཅད་དང་མཉམ་དུ་སྨོན་ལམ་བཏབ།

37 ཤུགས་ཆེན་པོར་ངུས་ཏེ་ཁོ་ཚོ་ཐམས་ཅད་ཀྱིས་པའུ་ལུ་ལ་འཐམས་ནས་འགྲམ་པར་འོ་བྱས།

38 ཁོང་གིས་ད་ནས་བཟུང་ངའི་གདོང་རྩ་བ་ནས་མཐོང་བར་མི་འགྱུར་ཞེས་གསུངས་པས་ཁོ་ཚོའི་སེམས་ཧ་ཅང་སྐྱོ་བར་གྱུར། དེ་ནས་ཁོ་ཚོས་པའུ་ལུ་གྲུ་གཟིངས་ལ་བསྐྱལ་ལོ།།

 

********************************

Acts (19) – མཛད་པ། (19)

1 ཡང་ཨ་པོ་ལོ་སི་ཀོ་རིན་ཐུ་གྲོང་ཁྱེར་ལ་ཡོད་དུས་པའུ་ལུ་ག་ལད་ཡཱ་དང་ཕ་རུག་ཡཱ་ཡུལ་གཉིས་བརྒྱུད་ནས་ཕེབས་པ་དང༌། ཨེ་ཕེ་སུ་གྲོང་ཁྱེར་དུ་སླེབས་ནས་ཉེ་གནས་ཁ་ཅིག་དང་ཕྲད།

2 ཁོང་གིས་ཁོ་ཚོར་ “དད་པར་འགྱུར་སྐབས་ཁྱེད་ཚོས་དཀོན་མཆོག་གི་དམ་པའི་ཐུགས་ཉིད་དང་ལེན་བྱས་སམ་” ཞེས་གསུངས་པས་ལན་དུ་ཁོ་ཚོས་ “བྱེད་མ་མྱོང༌། དམ་པའི་ཐུགས་ཉིད་ཡོད་པའང་ཐོས་མ་མྱོང་” ཞེས་སྨྲས།

3 ཡང་པའུ་ལུས་ “བྱས་ན། ཁྲུས་གསོལ་ཅི་ལེན་” ཞེས་གསུངས་པས་ཁོ་ཚོས་ “ཡོ་ཧ་ནན་གྱི་ཁྲུས་གསོལ་” ཞེས་ཟེར།

4 པའུ་ལུས་ “ཡོ་ཧ་ནན་གྱིས་མི་རྣམས་ལ་ཁོང་གི་རྗེས་སུ་ཕེབས་མཁན་ཏེ། ཡེ་ཤུ་ལ་དད་པ་བྱེད་དགོས་པར་གསུངས་ནས་སྡིག་ཉེས་སེལ་བའི་ཆེད་སྤྱོད་པ་ངན་པ་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་གནང་” ཞེས་གསུངས།

5 དེ་ཐོས་ནས་ཁོ་ཚོས་གཙོ་བོ་ཡེ་ཤུའི་མཚན་གྱི་ཐོག་ནས་ཁྲུས་གསོལ་ལེན།

6 པའུ་ལུས་ཁོ་རྣམས་ཀྱི་ལུས་སྟེང་དུ་ཕྱག་བཞག་ནས་དཀོན་མཆོག་གི་དམ་པའི་ཐུགས་ཉིད་ཁོ་ཚོར་བབས་ཤིང༌། སྐད་རིགས་གཞན་རྣམས་སྤྱད་ནས་སྐད་ཆ་བཤད་དེ་ལུང་ཡང་བསྟན།

7 དེ་དུས་བསྡོམས་པས་ཁོ་ཚོ་མི་བཅུ་གཉིས་ཙམ་ཡོད།

8ཟླ་བ་གསུམ་གྱི་རིང་ལ་པའུ་ལུ་འདུ་ཁང་ལ་ཡང་ཡང་ཕེབས་ནས་འཇིགས་པ་མེད་པར་རྩོད་གླེང་མཛད་ཅིང་དཀོན་མཆོག་གི་རྒྱལ་སྲིད་ཀྱི་སྐོར་ཆོས་བསྟན་ཞིང་བསྐུལ།

9 ཁ་ཅིག་སེམས་མཁྲེགས་ཤིང་ཁ་ལ་མི་ཉན་པར་གྱུར་ནས་ཚོགས་པའི་མདུན་དུ་ཡེ་ཤུའི་ཐར་ལམ་ལ་ངན་སྨྲས་བྱས་པས། ཁོ་ཚོ་དང་ཁ་བྲལ་ནས་པའུ་ལུས་ཉེ་གནས་རྣམས་ཕར་འཁྲིད་དེ་ཉིན་ལྟར་ཏི་རན་ནུ་ཞེས་བྱ་བའི་སློབ་ཁང་དུ་ཆོས་བསྟན།

10ཁོང་གིས་ལོ་གཉིས་རིང་དེ་ལྟར་གནང་བས་ཨེ་ཞེ་ཡཱ་ཞིང་ཆེན་ལ་སྡོད་མཁན་ཏེ་ཡ་ཧུ་དཱ་པ་དང་གྷི་རིག་མི་རིགས་ཚང་མས་གཙོ་བོ་དཀོན་མཆོག་གི་བཀའ་ཐོས་སོ།།

11 དཀོན་མཆོག་གིས་པའུ་ལུའི་ཕྱག་བརྒྱུད་ནས་ཤིན་ཏུ་ངོ་མཚར་ཆེ་བའི་དོན་མཛད་པ་སྟེ།

12 དཔེར་ན་ཁོང་གིས་གཏུགས་པའི་ལག་ཕྱིས་སམ་པང་ཁེབས་ནད་པ་རྣམས་ཀྱི་རྩར་འཁྱེར་ནས་ནད་སེལ་བར་གྱུར་ཞིང༌། གདོན་འདྲེ་རྣམས་ཕྱིར་ཐོན།

13 ཡ་ཧུ་དཱ་པའི་འགྲུལ་པ་གདོན་འདྲེ་སྐྲོད་མཁན་ཁ་ཅིག་གིས་གཙོ་བོ་ཡེ་ཤུའི་མཚན་བརྗོད་ནས་གདོན་འདྲེས་ཟིན་པའི་མི་རྣམས་ལ་ “པའུ་ལུས་སྒྲོག་པའི་ཡེ་ཤུའི་ཐོག་ནས་ངས་ཁྱོད་ལ་བཀོད་པ་གཏོང་” ཞེས་ཟེར།

14 དེ་ལྟར་བྱེད་མཁན་གྱི་ནང་དུ་སི་རྐེ་བཱ་ཞེས་བྱ་བ་ཡ་ཧུ་དཱ་པའི་བླ་ཆེན་ཅིག་གི་བུ་བདུན་པོ་ཡོད།

15 གདོན་འདྲེ་དེས་ “ངས་ཡེ་ཤུ་ངོ་ཤེས་ཤིང༌། པའུ་ལུའི་སྐོར་ཡང་ཤེས། འོན་ཀྱང་ཁྱོད་རྣམས་སུ་ཡིན་” ཞེས་ཟེར་བས།

16 གདོན་འདྲེས་ཟིན་པའི་མི་དེས་ཁོ་ཚོའི་སྟེང་ལ་མཆོངས་ནས་བཅོམས་པས་ཁོ་ཚོ་རྒྱལ་ཞིང་ཁོ་ཚོ་རྨས་ནས་གཅེར་བུར་ཁང་པ་ནས་བྲོས།

17 ཨེ་ཕེ་སུ་གྲོང་ཁྱེར་ལ་སྡོད་མཁན་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་དེའི་སྐོར་ཤེས་ནས་འཇིགས་པས་གཙོ་བོ་ཡེ་ཤུའི་མཚན་ལ་བསྟོད་པ་རེད།

18 ཡང་དད་པར་གྱུར་བ་རྣམས་ལས་མང་པོ་དེར་ཡོང་སྟེ་རང་གི་ལས་ངན་བཤད་ནས་ཁས་བླངས་པ་དང༌།

19 སྔགས་རྒྱག་མཁན་རྣམས་ལས་མང་པོ་ཞིག་གིས་རང་གི་དཔེ་ཆ་རྣམས་གཅིག་ཏུ་བསྡུས་ནས་མི་ཚང་མའི་མདུན་དུ་བསྲེགས། དཔེ་ཆ་དེ་རྣམས་ཀྱི་རིན་ཐང་རྩི་དུས་དངུལ་གྱི་ཊམ་ཀ་ཁྲི་ལྔ་ཡིན།

20 དེ་ལྟར་གཙོ་བོ་དཀོན་མཆོག་གི་བཀའ་དར་ཞིང་རྒྱས་པར་གྱུར་རོ།།

ཨེ་ཕེ་སུ་གྲོང་ཁྱེར་དུ་ཟིང་ཆ་ལངས་པ།

21 དོན་དེ་རྣམས་བྱུང་བའི་རྗེས་སུ་པའུ་ལུས་མ་ཀེ་དོན་ཡཱ་དང་ཨ་ཀ་ཡཱ་ཡུལ་བརྒྱུད་དེ་ཡེ་རུ་ཤ་ལེམ་ལ་འགྲོ་བར་དགོངས། ཁོང་གིས་ “དེར་ཕྱིན་ནས་ང་རོ་མཱ་གྲོང་ཁྱེར་དུ་ལྟ་བར་འགྲོ་དགོས་” ཞེས་གསུངས།

22 རོགས་པ་བྱེད་མཁན་ལས་ཐི་མོ་ཐེ་དང་ཨེ་ར་སི་ཏུ་གཉིས་མ་ཀེ་དོན་ཡཱ་ཡུལ་ལ་མངགས་ནས་ཁོང་ཉིད་དུས་རེ་ཞིག་གི་བར་དུ་ཨེ་ཞེ་ཡཱ་ཞིང་ཆེན་དུ་བཞུགས།

23 དུས་དེ་ཙམ་ལ་ཡེ་ཤུའི་ཐར་ལམ་གྱི་སྐོར་ལ་འཁྲུག་རྩོད་ཆེན་པོ་ཞིག་བྱུང༌།

24 དེ་མེ་ཏྲི་ཡུ་ཞེས་ཟེར་བའི་དངུལ་བཟོ་བ་ཞིག་གིས་ལྷ་མོ་ཨར་ཏེ་མཱི་ཡི་ལྷ་ཁང་དཔེར་བྱས་ནས་དངུལ་སྒམ་བཟོས་པས་བཟོ་པ་རྣམས་ལ་ཁེ་ཕན་ཆེན་པོ་ཐོབ། 25 ཁོ་ཚོ་དང་ལག་རྩལ་བཟོ་པ་གཞན་རྣམས་བསྡུས་ནས་ཁོས་ “ལས་གྲོགས་རྣམས། ཉོ་ཚོང་འདིས་ངེད་རྣམས་ལ་ནོར་ཐོབ་པ་ཁྱེད་ཚོས་ཤེས།

26 ཨེ་ཕེ་སུ་གྲོང་ཁྱེར་ཙམ་མ་ཟད་ཨེ་ཞེ་ཡཱ་ཞིང་ཆེན་ཕལ་ཆེར་དུ་པའུ་ལུ་ཟེར་མཁན་འདིས་མིའི་ལག་པས་བཟོས་པ་དེ་ལྷ་མ་ཡིན་ཟེར་ནས། མི་མང་པོ་སེམས་བསྒྱུར་ཞིང་བསླུ་བྲིད་བྱས་པ་ཁྱེད་ཚོས་མཐོང་ཞིང་ཐོས།

27 ང་ཚོའི་ཉོ་ཚོང་གི་སྙན་གྲགས་ཉམས་ཉེས་སུ་འགྲོ་བའི་ཉེན་ཁ་ཡོད་པ་མ་ཟད། ལྷ་མོ་ཆེན་མོ་ཨར་ཏེ་མཱི་ཡི་ལྷ་ཁང་བརྩི་མེད་དུ་འགྱུར་ཞིང༌། ཨེ་ཞེ་ཡཱ་ཞིང་ཆེན་དང་འཇིག་རྟེན་གྱི་མི་ཐམས་ཅད་ཀྱིས་བསྙེན་བཀུར་བྱེད་པའི་ལྷ་མོ་ཉིད་ཀྱི་གཟི་བརྗིད་ཉམས་པར་འགྱུར་བའི་ཉེན་ཁའང་ཡོད་” ཅེས་སྨྲས།

28 མི་རྣམས་ཀྱིས་དེ་ཐོས་ཏེ་ཁོང་ཁྲོ་འབར་ནས་སྐད་ཆེན་པོས་ “ཨེ་ཕེ་སུ་པའི་ལྷ་མོ་ཨར་ཏེ་མཱི་ཆེའོ་” ཞེས་ཟེར།

29 གྲོང་ཁྱེར་ཡོངས་སུ་ཟིང་ཆ་ལངས་ཤིང༌། མི་ཚོགས་ཀྱིས་པའུ་ལུའི་ལམ་གྲོགས་ཡིན་པའི་མ་ཀེ་དོན་ཡཱ་ཡུལ་གྱི་ག་ཡུ་དང་ཨ་རིས་ཐར་ཀུ་གཉིས་བཙན་ཁྲིད་བྱས་ཏེ་ཁོ་ཚོ་ལྷན་ཅིག་ཏུ་འཁྲབ་སར་བརྒྱུགས།

30 པའུ་ལུ་མི་ཚོགས་ཀྱི་མདུན་དུ་ཕེབས་པར་འདོད་ཀྱང༌། ཉེ་གནས་རྣམས་ཀྱིས་ཁོང་ཕེབས་སུ་མ་བཅུག

31 ཡང་པའུ་ལུའི་གྲོགས་པོ་ཡིན་པའི་ཨེ་ཞེ་ཡཱ་ཞིང་ཆེན་གྱི་དཔོན་རིགས་ཁ་ཅིག་གིས་ཁོང་ལ་འཁྲབ་སར་མ་ཕེབས་ཞེས་པའི་ལན་བཏང༌།

32 དེའི་དུས་སུ་ཚོགས་པ་ཟང་ཟིང་དུ་གྱུར་བས། ལ་ལས་སྐད་ཆེན་པོས་གཅིག་སྨྲས། ལ་ལས་གཞན་སྨྲས། མི་མང་ཆེ་བས་དེར་འདུས་པའི་རྒྱུ་མཚན་ཡང་མ་ཤེས།

33 ཡ་ཧུ་དཱ་པ་རྣམས་ཀྱིས་ཨ་ལིག་ཟན་ཌེར་མི་ཚོགས་ཀྱི་མདུན་དུ་བཞག་ནས། མི་ཚོགས་ལས་ཁ་ཅིག་གིས་ཁོ་ལ་གཏམ་བཤད་པས། ཁོས་ལག་བརྡ་བྱས་ནས་མི་ཚོགས་ལ་དོན་དེའི་སྐོར་གསལ་བཤད་བྱེད་པར་བསམས་ཀྱང༌།

34 ཁོ་ཡ་ཧུ་དཱ་པ་ཡིན་པར་ཤེས་ནས་ཁོ་ཚོས་ཆུ་ཚོད་གཉིས་ཙམ་ལྷན་ཅིག་ཏུ་སྐད་ཆེན་པོས་ “ཨེ་ཕེ་སུ་པའི་ཨར་ཏེ་མཱི་ཆེའོ་” ཞེས་ཟེར།

35 གྲོང་ཁྱེར་གྱི་དྲུང་ཡིག་གིས་མི་ཚོགས་ཁ་ཁུ་སིམ་པོར་སྡོད་དུ་བཅུག་ནས་ “ཁྱེད་ཨེ་ཕེ་སུ་པ་རྣམས། ཨེ་ཕེ་སུ་གྲོང་ཁྱེར་གྱི་མི་རྣམས་ནི་ལྷ་མོ་ཆེན་མོ་ཨར་ཏེ་མཱི་ཡི་ལྷ་ཁང་དང༌། ནམ་མཁའ་ནས་བབས་པའི་དེ་ཡི་སྐུ་རྟེན་སྲུང་མཁན་ཡིན་པར་སུས་མི་ཤེས།

36 དོན་དེར་རྩོད་རྒྱུ་མེད་པས་ཁྱེད་ཚོ་ཞི་བར་སྡོད་ཅིང༌། རྗེས་འབྲས་ལ་མི་ལྟ་བའི་ལས་མ་བྱོས།

37 གང་ཡིན་ཞེ་ན། ཁྱེད་རྣམས་ཀྱིས་འདིར་བཙན་འཁྲིད་བྱས་པའི་མི་རྣམས་ཀྱིས་ལྷ་ཁང་ནས་ཅི་ཡང་མ་ཕྲོགས། ང་ཚོའི་ལྷ་མོ་ལ་དམའ་འབེབས་ཡང་མ་བྱས།

38 གལ་ཏེ་དེ་མེ་ཏྲི་ཡུ་ལ་སོགས་པའི་ལག་རྩལ་བཟོ་པ་རྣམས་ཀྱིས་མི་སུ་ཞིག་ལ་ནག་ཉེས་འཛུགས་པར་འདོད་ན། ཁྲིམས་ཁང་སྒོ་ཕྱེ་ཡོད་དེ་སྤྱི་ཁྱབ་ཀྱང་ཡོད་པས། དེར་གཅིག་གིས་གཅིག་ལ་གཏུག་རེས་བྱས་ན་འགྲིག

39 དེ་ལས་ལྷག་པར་འདོད་ན་ཁྲིམས་བཞིན་དུ་འདུས་པའི་ཚོགས་པར་ཐག་གཅོད་པར་འགྱུར།

40 གང་ལགས་ཤེ་ན། དེ་རིང་འཁྲུག་པའི་རྒྱུ་མཚན་གང་ཡིན་པ་གསལ་བཤད་བྱེད་མི་ཐུབ་པས། ང་ཚོར་ཟིང་ཆ་སློང་བའི་ནག་ཉེས་འཛུགས་ཉེན་ཡོད་” ཅེས་སྨྲས་ནས།

41 ཁོས་མི་ཚོགས་ཕར་བཏང་ངོ༌།།

 

***************************************