Acts (4) – མཛད་པ། (4)

Acts (4) – མཛད་པ། (4)

1 པེ་ཏྲོ་དང་ཡོ་ཧ་ནན་གྱིས་མི་ཚོགས་ལ་གཏམ་བྱེད་པའི་དུས་སུ་ཡ་ཧུ་དཱ་པའི་བླ་མ་རྣམས་དང༌། སཱ་ཅུ་སེ་པའི་ཕྱོགས་ཁག་ནང་ནས་ཁ་ཅིག་དང༌། མཆོད་ཁང་གི་སྲུང་དམག་གི་དཔོན་པོ་ཁོ་ཚོའི་འཁྲིས་སུ་སླེབས།

2ཁོང་གཉིས་ཀྱིས་གཙོ་བོ་ཡེ་ཤུའི་ཐོག་ནས་འཆི་བ་ལས་སླར་གསོན་པ་ཡོད་པར་བསྒྲགས་ཏེ་མི་རྣམས་ལ་ཆོས་བསྟན་གནང་བས་ཁོ་ཚོ་སེམས་ཤིན་ཏུ་འཁྲུགས་པས།

3 ཁོང་ཚོ་འཛིན་བཟུང་བྱས་པ་དང༌། དགོང་དྲོ་ཟིན་ཚར་བས་དེའི་སང་ཉིན་གྱི་བར་བཙོན་ཁང་དུ་བཅུག

4 འོན་ཀྱང་བཀའ་དེ་ཐོས་མཁན་གྱི་ནང་ནས་མི་མང་པོ་ཞིག་གིས་དད་པ་བྱས་ཏེ། དད་ལྡན་རྣམས་ཀྱི་གྲལ་དུ་སྐྱེས་པ་རྣམས་ཀྱི་གྲངས་ལྔ་སྟོང་ཙམ་དུ་གྱུར།

5 དེའི་ཕྱི་ཉིན་ཁོ་ཚོའི་དཔོན་པོ་དང༌། རྒན་པོ། ཆོས་ཁྲིམས་ལ་མཁས་པའི་མི་རྣམས།

6 ཡ་ཧུ་དཱ་པའི་བླ་ཆེན་གཙོ་བོ་ཨ་ན་སི། ཀ་ཡ་ཕཱ། ཡོ་ཧ་ནན། ཨ་ལིག་ཟན་ཌེར། བླ་ཆེན་གཙོ་བོའི་ནང་མི་ཐམས་ཅད་ཡེ་རུ་ཤ་ལེམ་དུ་འཛོམས།

7 བཙོན་པ་དེ་གཉིས་ཁོ་ཚོའི་དཀྱིལ་ལ་བཞག་ནས་ཁོ་ཚོས་ “ནུས་མཐུ་གང་ངམ། སུའི་མིང་ལ་བརྟེན་ནས་ཁྱོད་ཚོས་དོན་འདི་བསྒྲུབས་པ་ཡིན་ནམ་” ཞེས་དྲིས་པས།

8 སྐུ་ཚབ་པེ་ཏྲོ་དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་ནས་ཁོ་ཚོར་ “ཀྱེ་དཔོན་རིགས་དང་རྒན་པོ་རྣམས།

9 གལ་ཏེ་ནད་པ་ཞིག་ལ་འཕྲིན་ལས་བྱས་པ་དང༌། ཅི་ལྟར་བྱས་ཏེ་ཁོ་གསོས་པར་གྱུར་བའི་སྐོར་ལ་ཁྱེད་རྣམས་ཀྱིས་ང་ཚོར་དེ་རིང་འདྲི་གཅོད་བྱས་ན།

10 ཁྱོད་རྣམས་ཀྱིས་རྒྱང་ཤིང་སྒང་ལ་བསད་ནས་དཀོན་མཆོག་གིས་འཆི་བ་ནས་གསོན་པོར་ལང་དུ་མཛད་པ་ན་ཙ་རེལ་པ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་མི་འདི་ཁྱེད་ཀྱི་མདུན་དུ་ཁམས་བཟང་པོར་བཞུགས་པ་ཁྱེད་ཚོ་དང༌། ཡི་སི་ར་ཨེལ་གྱི་མི་ཚང་མས་ཤེས་པར་གྱིས་ཤིག

11 ཡེ་ཤུ་ནི་གསུང་རབ་ལྟར་ཁྱོད་ཚོ་བཟོ་པ་རྣམས་ཀྱིས་དོར་བའི་རྡོ་སྟེ་རྨང་རྡོར་གྱུར་བ་དེ་ཡིན་ནོ།

12 ཐར་པ་ནི་གཞན་སུ་ཡང་ལས་འབྱུང་མི་སྲིད། གང་ཡིན་ཞེ་ན། ང་ཚོ་ཐར་བར་འགྱུར་བའི་ཆེད་དུ་མི་རྣམས་ཀྱི་ནང་ནས་མཚན་འདི་མ་གཏོགས་པར་གཞན་ཞིག་ནམ་འོག་ཏུ་གནང་བ་མ་ཡིན་ནོ་” ཞེས་གསུངས།

13 ཁོ་རྣམས་ཀྱིས་པེ་ཏྲོ་དང་ཡོ་ཧ་ནན་གྱིས་བློ་སྟོབས་ཆེན་པོས་གསུངས་པར་མཐོང་བ་དང༌། ཁོང་ཚོ་སློབ་གསོ་མྱོང་མེད་པའི་མི་སེར་ཡིན་པར་རྟོགས་ཏེ། ཡ་མཚན་ཆེན་པོ་སྐྱེས་ནས་དེ་གཉིས་གཙོ་བོ་ཡེ་ཤུ་དང་འགྲོགས་མྱོང་བ་ཡིན་པར་ཤེས།

14 ཡང་ཞ་བོ་ནད་ལས་གསོས་པར་གྱུར་བ་དེ་ཁོ་ཚོའི་དཀྱིལ་ལ་ལངས་ཏེ་སྡོད་པ་མཐོང་བས་ཁོ་ཚོས་ལན་ཅི་ཡང་བརྗོད་མ་ཐུབ་རྐྱེན།

15 ཁོང་ཚོས་ཁོ་གཉིས་གྲོས་ཚོགས་ཁང་ནས་ཕྱི་རུ་འདོན་པའི་བཀའ་བཏང་ནས། གཅིག་གིས་གཅིག་ལ་གཏམ་གླེང་བྱས་ཏེ་

16 “ངེད་རྣམས་ཀྱིས་མི་འདི་གཉིས་ལ་ཅི་བྱེད་པར་བྱ། ཡེ་རུ་ཤ་ལེམ་ལ་སྡོད་མཁན་ཀུན་གྱིས་ངོ་མཚར་བའི་རྟགས་བསྒྲུབས་པ་ཡིན་པར་ཤེས་པས་ང་ཚོས་དེ་མ་བྱུང་ཞེས་ཟེར་མི་སྲིད།

17 འོན་ཀྱང་དོན་འདི་མི་རྣམས་ཀྱི་ཁྲོད་དུ་སྔར་ལས་ལྷག་པ་མི་ཁྱབ་པའི་ཆེད་དུ་ང་ཚོས་ཁོ་རྣམས་ལ་ད་ནས་བཟུང་མཚན་འདིའི་ཐོག་ནས་སུ་ལ་ཡང་མི་འཆད་པའི་ཐ་ཚིག་བྱེད་རྒྱུ་ཡིན་” ཞེས་བཤད་པས།

18 ཁོ་ཚོ་གཉིས་བོས་པ་དང༌། གཙོ་བོ་ཡེ་ཤུའི་མཚན་ཐོག་ནས་ནམ་ཡང་གཏམ་བརྗོད་པ་དང་ཆོས་སྟོན་མི་ཆོག་པར་བཀའ་བཏང་ཡང༌།

19 པེ་ཏྲོ་དང་ཡོ་ཧ་ནན་གྱིས་ཁོ་ཚོར་ “ཁྱེད་ཀྱི་གསུང་ངམ། དཀོན་མཆོག་གི་བཀའ་ལ་ཉན་པ་ནི་དཀོན་མཆོག་གི་སྤྱན་སྔར་ཇི་ཞིག་འོས་པ་ཡིན་པར་ཁྱེད་ཀྱིས་ཐག་གཅོད་བྱེད་དགོས་ཏེ།

20 ང་ཚོས་གང་མཐོང་བ་དང་ཐོས་པའི་སྐོར་ལ་འཆད་རྒྱུ་ལས་ཐབས་གཞན་མེད་” ཅེས་གསུངས།

21-22 ངོ་མཚར་བའི་རྟགས་ཀྱིས་གསོས་པར་འགྱུར་བའི་མི་དེ་ལོ་བཞི་བཅུ་ལྷག་ཙམ་ལོན་པ་ཞིག་ཡིན་ཏེ། རྟགས་དེ་བྱུང་བས་མི་ཐམས་ཅད་ཀྱིས་དཀོན་མཆོག་ལ་བསྟོད་པ་ཕུལ་བའི་རྐྱེན་གྱིས་ཁོང་གཉིས་ལ་ཉེས་ཆད་གཏོང་མ་ནུས། དེའི་ཕྱིར་གྲོས་ཚོགས་ཀྱིས་སྔོན་ལས་ལྷག་པའི་རྫིག་རྫིག་བཏང་ནས་ཁོང་རྣམས་གློད།

བློ་སེམས་གཅིག་མཐུན་གྱིས་སྨོན་ལམ་བཏབ་པ།

23དེའི་རྗེས་སུ་སྐུ་ཚབ་པེ་ཏྲོ་དང་ཡོ་ཧ་ནན་རང་གི་འགྲོགས་མིའི་རྩར་ཕྱིར་ལོག་ནས་བླ་ཆེན་དང་རྒན་པོ་རྣམས་ཀྱིས་གང་བཤད་པ་ཐམས་ཅད་ཁོ་ཚོར་གསུངས།

24 ཁོ་ཚོས་གཏམ་དེ་ཐོས་ནས་བློ་སེམས་གཅིག་མཐུན་གྱིས་དཀོན་མཆོག་ལ་སྨོན་ལམ་བཏབ་སྟེ་ “ཀྱེ་གཙོ་བོ་དཀོན་མཆོག ཁྱེད་ཀྱིས་གནམ་ས་གཉིས་དང༌། རྒྱ་མཚོ། དེར་ཡོད་པ་ཐམས་ཅད་བཀོད་པ་གནང་ངོ༌།

25 ཁྱེད་ཀྱིས་དམ་པའི་ཐུགས་ཉིད་ཀྱི་ཐོག་ནས་ཁྱེད་ཀྱི་ཞབས་ཕྱི་ང་ཚོའི་མེས་པོ་དཱ་བིད་བརྒྱུད་ནས།

ཕྱི་པ་རབ་ཏུ་ཁྲོས་པ་ཅི་ཡི་ཕྱིར།།

མི་རྒྱུད་རྣམས་ཀྱིས་དོན་མེད་བྱེད་པ་ཅི།།

26 དེ་ཡང་གཙོ་བོ་དཀོན་མཆོག་ཁོང་ཉིད་ཀྱིས།།

མངགས་པའི་སྐྱབས་མགོན་དེ་ལ་རྒོལ་ཆེད་དུ།།

ས་སྟེང་རྒྱལ་དཔོན་ཐམས་ཅད་མཉམ་དུ་འདུས།།

ཞེས་གསུངས་པའི་ལུང་བསྟན་ནི།

27 དོན་དངོས་སུ་གྲོང་ཁྱེར་འདིར་བསྒྲུབས་སོ། གང་ལགས་ཟེར་ན། རྒྱལ་པོ་ཧེ་རོ་དཱེ་དང་སྤྱི་ཁྱབ་ཕོན་ཏི་ཡུ་པི་ལ་ཏུ་གཉིས་ནི་ཕྱི་པ་རྣམས་དང་ཡི་སི་ར་ཨེལ་གྱི་མི་སྡེ་དང་བཅས་པ་ཁྱེད་ཀྱིས་སྣུམ་གྱིས་བྱུགས་སུ་བཅུག་པའི་ཞབས་ཕྱི་དམ་པ་ཡེ་ཤུ་ལ་ངོ་རྒོལ་བྱེད་པར་འཛོམས།

28 དེ་ནི་སྔར་ནས་ཁྱེད་ཀྱི་དབང་དང་ཐུགས་དགོངས་ཀྱིས་གང་ཐག་བཅད་ཟིན་པ་དེ་སྒྲུབ་པའི་ཆེད་དུ་ཡིན།

29 ཀྱེ་གཙོ་བོ་དཀོན་མཆོག ད་ཁོ་ཚོའི་འཇིགས་སྐུལ་གཟིགས་ཤིང༌། ཁྱེད་ཀྱི་གཡོག་པོ་རྣམས་ཀྱིས་བློ་སྟོབས་ཆེན་པོས་ཁྱེད་ཀྱི་བཀའ་སྒྲོག་གནང་བར་ཤོག

30 ཡང་ནད་གསོ་བར་མཛད་པའི་ཆེད་དུ་ཁྱེད་ཀྱི་ཕྱག་རྐྱོངས་ཤིང༌། ཁྱེད་ཀྱི་ཞབས་ཕྱི་དམ་པ་ཡེ་ཤུའི་མཚན་གྱི་ཐོག་ནས་རྟགས་དང་ངོ་མཚར་བའི་དོན་སྒྲུབ་པར་ཤོག་” ཅེས་གསུངས།

31 ཁོང་ཚོས་སྨོན་ལམ་བཏབ་པའི་རྗེས་སུ་འཛོམས་ས་གཡོ་བར་གྱུར་བ་དང༌། ཁོང་ཚོ་ཚང་མ་དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་བས་འཇིགས་སྣང་ཅི་ཡང་མེད་པར་དཀོན་མཆོག་གི་བཀའ་བསྒྲགས།

ནོར་རྫས་ཐམས་ཅད་ཐུན་མོང་དུ་བྱས་པ།

32 ཡང་དད་ལྡན་གྱི་མི་ཚོགས་བློ་སེམས་གཅིག་མཐུན་པར་བཞུགས་ཏེ། ཁོ་ཚོའི་ནང་ནས་རང་ནོར་རང་གི་ཡིན་ཟེར་མཁན་གཅིག་ཀྱང་མེད་པས། ནོར་རྫས་ཐམས་ཅད་ཐུན་མོང་དུ་བྱས།

33 ནུས་མཐུ་ཆེན་པོས་སྐུ་ཚབ་རྣམས་ཀྱིས་གཙོ་བོ་ཡེ་ཤུ་འཆི་བ་ནས་སླར་གསོན་པར་དཔང་པོ་མཛད། དཀོན་མཆོག་གི་ཐུགས་རྗེ་ཆེན་པོ་ཁོང་ཚོ་ཚང་མར་བབས་སོ།

34-35 དད་ལྡན་རྣམས་ཀྱི་ནང་ནས་དབུལ་པོ་གཅིག་ཀྱང་མེད། རྒྱུ་མཚན་ནི་ས་ཞིང་ངམ་ཁང་པ་ཡོད་པའི་མི་ཐམས་ཅད་ཀྱིས་དེ་ཚོ་བཙོངས་ནས་དངུལ་ཐོབ་པ་དང༌། དད་ལྡན་གཞན་ལ་ཕན་པའི་ཕྱིར་སྐུ་ཚབ་རྣམས་ཀྱི་ཞབས་ཀྱི་དྲུང་དུ་བཞག དེ་ནས་ཁོང་ཚོས་མི་རེ་རེ་ལ་དགོས་པ་བཞིན་དུ་བགོ་བཤའ་བརྒྱབ།

36 ཡང་ཀིབ་རུ་གླིང་ཕྲན་ནས་ཡིན་པའི་སྐྱེས་པ་ཡོ་སེབ་ཟེར་མཁན་ཞིག་ཡོད་དེ། ཁོང་ནི་ལེ་ཝི་པ་ཞིག་ཡིན། སྐུ་ཚབ་རྣམས་ཀྱིས་ཁོང་ལ་མིང་པར་ན་པཱ་ཞེས་བཏགས་པ་སྟེ། བློ་སྟོབས་སྤེལ་མཁན་ཞེས་པའི་དོན་ཡིན།

37 ཁོང་ལ་ཡོད་པའི་ཞིང་ཁ་ཞིག་བཙོངས་ནས་དེའི་རིན་གོང་འཁྱེར་ཡོང་བ་དང༌། སྐུ་ཚབ་རྣམས་ཀྱི་ཞབས་ཀྱི་དྲུང་དུ་བཞག་གོ །

 

********************************

Gospel of Mark (8) – མར་ཀུ (8)

Gospel of Mark (8) – མར་ཀུ (8)

1 དེའི་དུས་སུ།

ཡང་བསྐྱར་མི་མང་པོ་ཞིག་དེར་འདུས་ཏེ།

ཁོ་ཚོར་ཟ་རྒྱུ་ཅི་ཡང་མེད་པས་ཡེ་ཤུས་ཁོང་གི་ཉེ་གནས་ཚོ་བོས་ཏེ་

2 “མི་ཚོགས་འདི་ང་དང་མཉམ་དུ་བསྡད་ནས་ཉིན་ཞག་གསུམ་སོང་ཞིང༌།

ད་ཆ་ཟས་ཅི་ཡང་མེད་པས་ཁོ་ཚོ་སྙིང་རྗེ་བར་འདུག

3 ཁོ་ཚོའི་ནང་ནས་མི་ཁ་ཤས་རྒྱང་རིང་ནས་ཡོང་བས།

གལ་ཏེ་ངས་ཁོ་ཚོ་གྲོད་པ་སྟོང་བར་ལོག་ཏུ་བཅུག་ན།

ལམ་བར་དུ་བཀྲེས་ཤིང་ལྟོགས་ཏེ་དྲན་མེད་དུ་བརྒྱལ་བར་ངེས་”

ཞེས་གསུངས།

4 ཉེ་གནས་ཚོས་ཁོང་ལ་

“མི་འདི་རྣམས་འགྲང་བར་བྱེད་པའི་བག་ལེབ་ནི་དབེན་སྟོང་འདི་རུ་ག་ནས་རྙེད་ཐུབ་བམ་”

ཞེས་ཞུས།

5 ཡེ་ཤུས་

“ཁྱེད་ཚོར་བག་ལེབ་ཅི་ཙམ་ཡོད་”

ཅེས་བཀའ་འདྲི་གནང་བས།

ཁོ་ཚོས་

“བདུན་ཡོད་”

ཅེས་ཞུས།

6 དེ་ནས་ཁོང་གིས་མི་ཚོགས་ལ་བཀའ་གནང་ནས་ས་ལ་སྡོད་དུ་བཅུག

བག་ལེབ་བདུན་པོ་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཆེ་ཞུས་རྗེས།

བག་ལེབ་དུམ་བུར་བྱས་ནས་ཉེ་གནས་རྣམས་ལ་སྤྲད་ཅིང་ཁོ་ཚོས་མི་ཚོགས་ལ་བྱིན།

7 ཡང་ཉ་ཤ་ཆུང་ངུ་ཁ་ཤས་ཡོད་པ་ཡེ་ཤུས་དཀོན་མཆོག་ལ་བཀའ་དྲིན་ཆེ་ཞུས་པའི་རྗེས་ལ་དེ་ཡང་བག་ལེབ་བགོས་པ་བཞིན་དུ་མཛད་ནས་མི་ཚོགས་ལ་སྟེར་བའི་བཀའ་གནང༌།

8 དེ་ནས་མི་ཚོགས་ཚང་མས་བཟས་ནས་འགྲངས་ཤིང་ཁོ་ཚོས་ཟས་ལྷག་བསྡུ་གསོག་བྱས་པ་སླེ་པོ་བཀང་བ་བདུན་བྱུང༌།

9 དེར་མི་སྟོང་ཕྲག་བཞི་ཙམ་ཡོད་པ་ཡིན།

ཡང་ཁོང་གིས་མི་དེ་ཚོ་འགྲོ་རུ་བཅུག

10 དེ་མ་ཐག་ཁོང་ཉེ་གནས་རྣམས་དང་མཉམ་དུ་གྲུ་ལ་བཞུགས་ནས་དཱལ་མ་ནུ་ཐ་ཞེས་བྱ་བའི་ཡུལ་ཕྱོགས་སུ་ཕེབས།

ཕཱ་རུ་ཤི་པ་རྣམས་ཀྱིས་སྟོན་པ་ཡེ་ཤུ་ལ་ཉམས་ཚོད་ལེན་པ།

11 དེའི་ཚེ་ཕཱ་རུ་ཤི་པ་རྣམས་འོངས་ནས་ཡེ་ཤུ་ལ་རྩོད་གླེང་བྱས་ཤིང༌།

ཁོང་ལ་དཀོན་མཆོག་ནས་མངགས་པ་ཡིན་པའི་རྟགས་ཤིག་བསྟན་དུ་གསོལ་ཞུས་ནས་ཉམས་ཚོད་བྱས།

12 ཡེ་ཤུས་རང་གི་ཐུགས་ནས་དབུགས་རིང་ཕྱུང་སྟེ་

“མི་རབས་འདིས་ངོ་མཚར་བའི་རྟགས་ཤིག་ཅིའི་ཕྱིར་འཚོལ།

ངས་ཁྱེད་ཚོ་ལ་བདེན་པར་ཟེར་རྒྱུར།

མི་རབས་འདི་ལ་རྟགས་སྟོན་པར་མི་འགྱུར་རོ་”

ཞེས་གསུངས་པ་དང༌།

13 ཡེ་ཤུ་ཁོ་ཚོ་བཞག་ནས་ཡང་བསྐྱར་གྲུ་ལ་བཞུགས་ཏེ་མཚོ་ག་ལིལ་གྱི་ཕ་རོལ་ཏུ་ཕེབས་སོ།།

ཉེ་གནས་རྣམས་ལ་བཀའ་བཀྱོན་གནང་བ།

14 ཉེ་གནས་རྣམས་ཀྱིས་ལམ་རྒྱགས་འཁྱེར་རྒྱུ་བརྗེད་སོང་བས།

གྲུའི་ནང་དུ་བག་ལེབ་གཅིག་ལས་གཞན་ཟས་ཅི་ཡང་མེད།

15 དེ་ནས་ཡེ་ཤུས་

“ཁྱེད་ཚོས་བློ་རིག་བསྒྲིམས་ནས་ཕཱ་རུ་ཤི་པ་དང་ཧེ་རོ་དཱེ་ཡི་སྐྱུར་རྩི་ལ་དོགས་ཟོན་གྱིས་ཤིག་”

ཅེས་བཀའ་གནང་ཞིང༌།

16 ཉེ་གནས་རྣམས་ཀྱིས་ཕན་ཚུན་ལ་

“འདི་ནི་ང་ཚོར་བག་ལེབ་མེད་པའི་ཕྱིར་”

ཞེས་སྨྲས་པ་དང༌།

17 ཡེ་ཤུས་དེ་མཁྱེན་ནས་ཁོ་ཚོར་

“ཁྱོད་ཚོས་ཅིའི་ཕྱིར་བག་ལེབ་མེད་པའི་གཏམ་གླེང་བ་ཡིན་ནམ།

ཁྱོད་ཚོས་ད་དུང་ཡང་མི་ཤེས་ལ་ཧ་མི་གོའམ།

ཁྱོད་ཚོའི་སེམས་མཁྲེགས་པོར་གྱུར་བ་ཡིན་ནམ།

18 ཁྱོད་ཚོར་མིག་ཡོད་ཀྱང་མི་མཐོང་ངམ།

རྣ་བ་ཡོད་ཀྱང་མི་ཐོས་སམ།

ཁྱོད་ཚོས་ཅི་ཡང་མི་དྲན་ནམ།

19 ངས་བག་ལེབ་ལྔ་མི་ལྔ་སྟོང་ལ་བགོས་པའི་སྐབས་ཁྱོད་ཚོས་ཟས་ལྷག་སླེ་པོ་ཅི་ཙམ་བསྡུ་གསོག་བྱས་སམ་”

ཞེས་དྲིས་པ་ལ།

ཁོ་ཚོས་

“བཅུ་གཉིས་སོ་”

ཞེས་ཞུས།

20 “ཡང་བག་ལེབ་བདུན་མི་བཞི་སྟོང་ལ་བགོས་པའི་དུས་ཁྱོད་ཚོས་ཟས་ལྷག་སླེ་པོ་ཅི་ཙམ་བསྡུ་གསོག་བྱས་སམ་”

ཞེས་དྲིས་ཤིང༌།

ཁོ་ཚོས་

“བདུན་ནོ་”

ཞེས་ཞུས་པ་དང༌།

21 ཡེ་ཤུས་

“ཁྱོད་ཚོས་ད་དུང་མི་ཤེས་སམ་”

ཞེས་གསུངས།

ལོང་བའི་ནད་སེལ་གནང་བ།

22 དེ་ནས་ཁོང་རྣམས་པེ་སད་དཱ་ཞེས་བྱ་བའི་གྲོང་སྡེ་ལ་ཕེབས་པ་དང༌།

མི་འགའ་ཞིག་གིས་ལོང་བ་ཞིག་ཡེ་ཤུའི་དྲུང་དུ་ཁྲིད་ཡོང་སྟེ།

ཁོང་ལ་ཕྱག་གིས་རེག་པའི་ཞུ་བ་ཞུས།

23 ཁོང་གིས་ལོང་བ་དེའི་ལག་པ་ནས་འཇུས་ཏེ་གྲོང་ཚོའི་ཕྱི་རོལ་ཏུ་ཁྲིད་ཅིང༌།

དེའི་མིག་གཉིས་ལ་ལྗགས་ཆུ་གཏོར་བ་དང༌།

ཁོང་གིས་ཕྱག་ཟུང་མི་དེ་ལ་བཞག་སྟེ་

“ཁྱེད་ཀྱི་མིག་གིས་མཐོང་གི་འདུག་གམ་”

ཞེས་གསུངས་པ་དང༌།

24 མི་ལོང་བ་དེས་ཡར་བལྟས་ཏེ་

“ངས་མི་རྣམས་མཐོང༌།

འོན་ཀྱང་ཁོ་ཚོ་ཤིང་འགྲོ་བཞིན་པ་ལྟར་མཐོང་གི་འདུག་”

ཞེས་ཞུས།

25 དེ་ནས་ཡེ་ཤུས་ཡང་བསྐྱར་མི་དེའི་མིག་ལ་བཞག་པ་དང༌།

ཁོས་མིག་ནན་གྱིས་བལྟས་ནས་མིག་ཟུང་གསོས་ཏེ་དངོས་པོ་ཐམས་ཅད་གསལ་པོར་མཐོང་བར་གྱུར།

26 ཡང་ཡེ་ཤུས་མི་དེ་རང་ཁྱིམ་དུ་འགྲོ་རུ་བཅུག་སྟེ་

“གྲོང་སྡེ་འདིའི་ནང་དུ་ཡང་བསྐྱར་མ་འགྲོ་”

ཞེས་གསུངས།

པེ་ཏྲོས་སྟོན་པ་ཡེ་ཤུ་ནི་མཱ་ཤི་ཀ་ཡིན་པར་ཁས་ལེན་པ།

27 ཡང་ཡེ་ཤུ་རང་གི་ཉེ་གནས་རྣམས་དང་མཉམ་དུ་སེ་སར་རེ་ཡཱ་ཕི་ལིབ་པཱི་ཞེས་པའི་ཡུལ་གྱི་གྲོང་སྡེ་རྣམས་ལ་ཕེབས་ཏེ་ལམ་བར་དུ་ཉེ་གནས་ཚོར་

“མི་རྣམས་ཀྱིས་ང་རང་སུ་རེད་ཅེས་བཤད་བཞིན་ཡོད་དམ་”

ཞེས་གསུངས་ནས།

28 ཁོ་རྣམས་ཀྱིས་

“མི་ལ་ལས་ཁྲུས་གསོལ་མཁན་ཡོ་ཧ་ནན་དང༌།

ལ་ལས་ལུང་སྟོན་པ་ཨེ་ལི་ཡཱ།

ཡང་མི་ལ་ལས་ལུང་སྟོན་པའི་ནང་གི་གཅིག་རེད་ཅེས་ཟེར་”

ཞེས་ཞུས་

29 “འོ་ན་ཁྱེད་ཚོས་བྱས་ན་ང་རང་སུ་ཡིན་ཟེར་”

ཞེས་གསུངས་པས་ལན་དུ།

པེ་ཏྲོས་

“ཁྱེད་ནི་སྐྱབས་མགོན་མཱ་ཤི་ཀ་ཡིན་ནོ་”

ཞེས་ཞུས།

30 ཡེ་ཤུས་ཁོ་རྣམས་ལ་

“དོན་འདི་མི་གཞན་ལ་མ་ཤོད་”

ཅེས་ནན་གྱིས་བསྐུལ།

སྟོན་པ་ཡེ་ཤུས་དགྲོང་བར་འགྱུར་བའི་སྐོར་ལུང་བསྟན་གནང་བ།

31 དེ་ནས་ཁོང་གིས་ཉེ་གནས་ཚོར་མིའི་རིགས་ཀྱི་བུ་ནི་ངེས་པར་དུ་སྡུག་བསྔལ་མང་པོ་མྱོང་ཞིང༌།

ཡ་ཧུ་དཱ་པའི་མི་རིགས་ཀྱི་རྒན་པོ་དང་བླ་ཆེན་རྣམས།

ཆོས་ཁྲིམས་ལ་མཁས་པའི་མིས་ཁོ་རང་དོར་ནས་གསོད་པར་འགྱུར་ལ།

ཡང་ཉིན་གསུམ་གྱི་རྗེས་འཆི་བ་ནས་སླར་གསོན་པར་ལང་ངོ་ཞེས་གསུངས།

32 ཁོང་གིས་བཀའ་དེ་གསལ་པོར་གསུངས་ཤིང༌།

པེ་ཏྲོས་ཁོང་ཟུར་དུ་ཁྲིད་ནས་གཤེ་གཤེ་བཏང༌།

33 འོན་ཀྱང་ཡེ་ཤུས་ཞལ་ཕྱིར་སྐོར་ཏེ་ཉེ་གནས་ཚོར་གཟིགས་ནས་པེ་ཏྲོ་ལ་བཀའ་བཀྱོན་གནང་སྟེ་

“བདུད་སཱ་ཏན་ཁྱོད།

ངའི་རྒྱབ་ཏུ་སོང་ཞིག

ཁྱོད་ཀྱི་བསམ་པ་དཀོན་མཆོག་བཞིན་མ་ཡིན་པར་མི་བཞིན་ཡིན་ནོ་”

ཞེས་གསུངས།

34 ཁོང་གིས་མི་ཚོགས་དང་ཉེ་གནས་རྣམས་རང་གི་དྲུང་དུ་བོས་ནས་

“གལ་ཏེ་མི་སུ་ཞིག་ང་ཡི་རྗེས་སུ་འབྲང་འདོད་ན།

རང་ཉིད་དོར་ནས་རང་གི་རྒྱང་ཤིང་འཁུར་ཏེ་ང་ཡི་རྗེས་སུ་འབྲང་དགོས།

35 མི་སུས་ཀྱང་རང་གི་སྲོག་ཐར་བར་བྱེད་འདོད་པ་དེས་བརླག་པར་འགྱུར།

མི་སུས་ཀྱང་ང་རང་དང་འཕྲིན་བཟང་གི་དོན་དུ་རང་གི་སྲོག་གཏོང་པ་དེས་ཐར་བར་འགྱུར་ངེས་ཡིན།

36 མི་སུ་ལ་འཇིག་རྟེན་ཧྲིལ་པོ་ཐོབ་ཀྱང་རང་སྲོག་བརླགས་ན་ཅི་ཕན།

37 ཡང་ན་མིས་རང་གི་སྲོག་ཅི་དང་བརྗེའམ།

38 ལོག་གཡེམ་ཅན་དང་སྡིག་སྤྱོད་ཀྱི་མི་རབས་འདི་ལས་མི་སུ་ཞིག་གིས་ང་དང་ངའི་བཀའ་ངོ་ཚ་བའི་རྒྱུར་བརྩིས་ན།

མིའི་རིགས་ཀྱི་བུ་ཡང་ཡབ་དཀོན་མཆོག་གི་གཟི་བརྗིད་ལས་དམ་པའི་ཕོ་ཉ་འཁོར་དང་བཅས་པ་འཇིག་རྟེན་དུ་ཕེབས་དུས།

མི་དེ་ཡང་ངོ་ཚ་བའི་རྒྱུར་བརྩི་བར་བྱ་”

ཞེས་གསུངས།

 

********************************************

Hebrews (11) – ཡ་ཧུ་དཱ་པ། (11)

ལེའུ་བཅུ་གཅིག་པ།

དད་པའི་སྐོར་གླེང་བ།

1 དད་པ་ནི་རེ་བ་གནས་ས་ལ་བློ་གདེང་དང༌། མིག་གིས་མི་མཐོང་བ་དེ་རྣམས་ལ་ཡིད་ཆེས་ངེས་པ་རྙེད་པ་དེའོ།

2 དད་པའི་སྒོ་ནས་གནའ་བོའི་དུས་ཀྱི་མི་རྣམས་ལ་དཀོན་མཆོག་གི་གདེང་འཇོག་ཐོབ།

3 དད་པའི་སྒོ་ནས་དཀོན་མཆོག་གི་བཀའ་ཡིས་འཇིག་རྟེན་ཁམས་བཀོད་པ་དང༌། མིག་གིས་མཐོང་བ་ནི་མི་སྣང་བ་ལས་མཛད་པ་ཡིན་པ་ང་ཚོས་རྟོགས།

4 དད་པའི་སྒོ་ནས་མེས་པོ་ཧ་བེལ་གྱིས་ཁོའི་སྤུན་ཀ་ཡིན་ལས་ལེགས་པའི་མཆོད་པ་ཞིག་དཀོན་མཆོག་ལ་ཕུལ་བས། དྲང་ལྡན་པ་ཞིག་ཡིན་པར་མཚོན་ཞིང༌། ཁོང་གི་མཆོད་པ་ལ་དཀོན་མཆོག་གི་གདེང་འཇོག་ཐོབ། ཧ་བེལ་ཤི་ཡང་དད་པའི་དཔེའི་སྒོ་ནས་ད་དུང་ང་ཚོར་གཏམ་བྱེད།

5 དད་པའི་སྒོ་ནས་ཧེ་ནོག་ཡར་དྲངས་ནས་འཆི་བ་མ་མྱོང༌། དཀོན་མཆོག་གིས་ཁོང་ཡར་ཁྲིད་གནང་བས་མི་རྙེད་པར་གྱུར། ཁོང་ཡར་འདྲངས་པའི་སྔོན་ལ་དཀོན་མཆོག་གི་ཐུགས་མཉེས་པའི་མི་ཡིན་པར་གདེང་འཇོག་ཐོབ།

6 དད་པ་མེད་པར་དཀོན་མཆོག་ཐུགས་མཉེས་མི་སྲིད། གང་ཡིན་ཟེར་ན། དཀོན་མཆོག་གི་དྲུང་དུ་ཡོང་བ་དེས་དཀོན་མཆོག་ཡོད་པ་དང༌། ཁོང་འཚོལ་མཁན་རྣམས་ལ་བྱ་དགའ་གནང་མཁན་ཡིན་པར་དད་པ་བྱེད་དགོས་པས་སོ།

7 མེས་པོ་ནོ་ཨ་ཡིས་དད་པའི་སྒོ་ནས་དཀོན་མཆོག་གིས་ཁོང་ལ་ད་དུང་མ་མཐོང་བ་རྣམས་ཀྱི་སྐོར་ལ་ཐ་ཚིག་སྒྲོག་པར་མཛད་པའི་སྐབས་སུ། རང་གི་ནང་མི་སྐྱོབ་པའི་ཕྱིར་བསྙེན་བཀུར་བྱས་ཏེ་གྲུ་གཟིངས་ཤིག་བཟོས། དེའི་སྒོ་ནས་ཁོང་གིས་འཇིག་རྟེན་གྱི་སྐྱོན་གསལ་པོར་བསྟན་ཞིང༌། དད་པ་ལས་འབྱུང་བའི་རྣམ་པར་དག་པ་ཡི་ཞལ་ཆད་ཐོབ།

8 དད་པའི་སྒོ་ནས་མེས་པོ་ཨབ་ར་ཧམ་ནི་དཀོན་མཆོག་གི་ཞལ་ཆད་ལྟར་འཐོབ་རྒྱུ་ཡིན་པའི་ཡུལ་ཞིག་ལ་འགྲོ་བར་བོས་པའི་ཚེ། གང་དུ་འགྲོ་བ་མི་ཤེས་ཀྱང་བཀའ་དེ་ལ་ཉན།

9 དད་པའི་སྒོ་ནས་གནས་གཡར་བ་ལྟར་ཞལ་ཆད་མཛད་པའི་ཡུལ་དེ་ལ་བསྡད་དེ། ཁོང་དང་ཞལ་ཆད་འཛིན་མཁན་ཡིན་པའི་ཨི་སཱག་དང་ཡ་ཀོབ་ལྟར་གུར་རྣམས་ལ་བསྡད།

10 རྒྱུ་མཚན་ནི་ཁོང་གིས་དཀོན་མཆོག་གིས་འཆར་འགོད་དང་སྐྲུན་གནང་བའི་གཏན་གྱི་རྨང་གཞི་ཡོད་པའི་གྲོང་ཁྱེར་མཆོག་དེ་ཡིད་རྟོན་ནས་བསྒུགས།

11 དད་པའི་སྒོ་ནས་ས་རཱ་ཡིས་ཀྱང་ཞལ་ཆད་མཛད་མཁན་དེ་ཐུགས་གཏད་ཆོག་པར་བརྩིས་པས། རྒས་མོར་གྱུར་ཡང་ཕྲུ་གུ་སྐྱེ་ཐུབ་པའི་ནུས་པ་ཐོབ།

12 དེ་བས་ན་སྐུ་ཕུང་དང་འདྲ་བའི་མི་ཞིག་ལས་བུ་རྒྱུད་ནམ་མཁའི་སྐར་མ་མང་པོ་དང༌། མཚོ་འགྲམ་གྱི་བྱེ་མ་བཞིན་གྲངས་མེད་བྱུང༌།

13 དེ་ཚོ་ཐམས་ཅད་ཀྱིས་མ་འཆི་བར་དུ་དད་པ་ལ་བརྟེན་ཏེ། གང་ཞལ་གྱིས་བཞེས་པ་མ་ཐོབ་ཀྱང༌། ཐག་རིང་ནས་མཐོང་ཞིང་དགའ་བསུ་བྱས། འཇིག་རྟེན་འདིར་རང་ཉིད་གནས་གཡར་བ་དང༌། མགྲོན་པོར་ངོས་འཛིན་བྱས།

14 དེ་ལྟར་སྨྲ་བའི་མི་རྣམས་ཀྱིས་འདི་ངའི་ཕ་ཡུལ་ཡིན་ཟེར་ཐུབ་པའི་ལུང་པ་ཞིག་སྒུག་མཁན་ཡིན་པར་གསལ་སྟོན་བྱེད།

15 ཡུལ་གང་ནས་ཐོན་པ་དེ་དྲན་པ་ཡིན་ན་དེར་ལོག་པའི་གོ་སྐབས་བྱུང་ཡོད།

16 འོན་ཀྱང་ཁོ་ཚོས་དེ་ལས་ལེགས་པའི་ཡུལ་ཏེ་དཀོན་མཆོག་གི་ཞིང་ཁམས་སུ་ཡོད་པ་དེ་རེ་སྒུག་བྱེད་མཁན་ཡིན། དེའི་ཕྱིར་དཀོན་མཆོག་གིས་ཁོ་ཚོའི་དོན་ལ་གྲོང་ཁྱེར་མཆོག་ཅིག་བཤམས་པར་མཛད་ཅིང༌། ཁོང་ཁོ་ཚོའི་དཀོན་མཆོག་ཅེས་ཟེར་བར་ཐུགས་ཚ་མི་གནང༌།

17-18 དཀོན་མཆོག་གིས་མེས་པོ་ཨབ་ར་ཧམ་ལ་ཨི་སཱག་བརྒྱུད་ནས་ཁྱོད་ཀྱི་བུ་རྒྱུད་རྩི་བར་འགྱུར་ཞེས་གསུངས་ཀྱང༌། ཉམས་ཚོད་བླངས་པའི་ཚེ་དད་པའི་སྒོ་ནས་ཞལ་ཆད་འཛིན་མཁན་ཨབ་ར་ཧམ་གྱིས་རང་གི་བུ་གཅིག་པོ་ཨི་སཱག་མཆོད་པར་འབུལ་གྲབས་བྱས།

19 ཨབ་ར་ཧམ་གྱིས་དཀོན་མཆོག་གིས་མི་རྣམས་འཆི་བ་ལས་སླར་གསོན་དུ་མཛད་ཐུབ་པར་སྙམ་ཞིང༌། ཁོང་ལ་བུ་ཨི་སཱག་འཆི་བ་ལས་ལོག་པ་བཞིན་ཐོབ།

20 དད་པའི་སྒོ་ནས་མེས་པོ་ཨི་སཱག་གིས་མ་འོངས་པའི་དོན་ལ་བལྟས་ཏེ་ཁོང་གི་བུ་ཡ་ཀོབ་དང་ཨེ་སའུ་གཉིས་ལ་བྱིན་རླབས་གནང༌།

21 དད་པའི་སྒོ་ནས་མེས་པོ་ཡ་ཀོབ་གྲོངས་པའི་སྐབས་སུ་ཡོ་སེབ་ཀྱི་བུ་རེ་རེ་ལ་བྱིན་རླབས་གནང་སྟེ། འཁར་བ་ལ་བསྙེས་ཏེ་དཀོན་མཆོག་ལ་བསྙེན་བཀུར་བྱས།

22 དད་པའི་སྒོ་ནས་མེས་པོ་ཡོ་སེབ་འཆི་བ་ལ་ཐུག་པའི་ཚེ་ཡི་སི་ར་ཨེལ་གྱི་བུ་རྒྱུད་ཨེ་ཇེབ་ཡུལ་ནས་འཐོན་པའི་སྐོར་སྨྲ་ཞིང༌། རང་གི་རུས་པ་དུར་དུ་འཇུག་པའི་སྐོར་ལ་བཀའ་གནང༌།

23 དད་པའི་སྒོ་ནས་ལུང་སྟོན་པ་མོ་ཤེའི་ཕ་མ་ཡིས་ཁོང་འཁྲུངས་ནས་ཕྲུ་གུ་མཛེས་པ་ཞིག་ཡོད་པར་མཐོང་སྟེ། རྒྱལ་པོའི་བཀའ་ལ་མི་འཇིགས་པར། ཟླ་བ་གསུམ་རིང་ཁོང་སྦས་ནས་བཞག

24 དད་པའི་སྒོ་ནས་ལུང་སྟོན་པ་མོ་ཤེ་ན་སོ་ལོན་ནས་ཨེ་ཇེབ་ཀྱི་རྒྱལ་པོ་ཕར་ཨོ་ཡི་སྲས་མོའི་བུ་ཟེར་བའི་མིང་དང་ལེན་མ་བྱས་ཏེ།

25 སྡིག་ཉེས་ཀྱི་ལོངས་སྤྱོད་མི་རྟག་པ་ལས། ཁོང་གིས་དཀོན་མཆོག་གི་མི་རྣམས་དང་མཉམ་དུ་མནར་གཅོད་མྱོང་བར་བདམས།

26 མ་འོངས་པའི་བྱ་དགའ་ལ་བལྟས་ཏེ། ཨེ་ཇེབ་ཀྱི་གཏེར་ལས་མཱ་ཤི་ཀའི་དོན་ལ་སྡུག་བསྔལ་མྱོང་བའི་ནོར་ཆེ་བར་བརྩིས།

27 དད་པའི་སྒོ་ནས་རྒྱལ་པོའི་ཁྲོ་བ་ལ་མ་འཇིགས་པར་མོ་ཤེ་ཨེ་ཇེབ་ནས་ཐོན། མིག་གིས་མཐོང་མི་སྲིད་པའི་དཀོན་མཆོག་ལ་ནན་གྱིས་བལྟས་ནས་ཁོང་གིས་བཟོད་པ་བསྒོམས།

28 དད་པའི་སྒོ་ནས་ཁོང་གིས་པེ་སག་ཟེར་བའི་དུས་ཆེན་བསྲུངས་ཤིང༌། སྔོན་སྐྱེས་ཀྱི་བུ་རྣམས་མེད་པ་བཟོ་བའི་ཕོ་ཉ་ཡིས་ཡི་སི་ར་ཨེལ་གྱི་སྔོན་སྐྱེས་པའི་བུ་རྣམས་ལ་གནོད་པ་མི་བྱེད་པའི་ཕྱིར་ཁྲག་གཏོར།

29 དད་པའི་སྒོ་ནས་ཡི་སི་ར་ཨེལ་པ་རྣམས་སྐམ་ས་འགྲོ་བ་ལྟར་རྒྱ་མཚོ་དམར་པོ་བརྒྱུད་ནས་ཕྱིན། འོན་ཀྱང་ཨེ་ཇེབ་པ་རྣམས་དེ་ལྟར་བྱེད་པར་ཕྱིན་པས་ཆུ་ལ་ནུབ་སྟེ་ཤིའོ།

30 དད་པའི་སྒོ་ནས་ཡི་སི་ར་ཨེལ་པ་རྣམས་ཡེ་རུ་ཀོ་གྲོང་ཁྱེར་གྱི་ལྕགས་རི་ཉི་མ་བདུན་གྱི་བར་དུ་བསྐོར་ནས་ལྕགས་རི་དེ་རྡིབ།

31 དད་པའི་སྒོ་ནས་སྨད་འཚོང་མ་ར་ཧབ་ཀྱིས་སོ་པ་རྣམས་ལ་ཞི་བདེའི་ངང་ནས་སྣེ་ལེན་བྱས་པས། བཀའ་ལ་མ་ཉན་པ་རྣམས་དང་མཉམ་དུ་མ་ཤི

32 ད་ཅི་སྨྲ། གི་དེ་ཡོན་དང༌། པཱ་རག སམ་སོན། ཡེབ་ཐཱ། དཱ་བིད། ཤ་མུ་ཨེལ་དང༌། ལུང་སྟོན་པ་རྣམས་ཀྱི་སྐོར་སྨྲ་ལོང་མེད།

33 དད་པའི་སྒོ་ནས་ཁོ་ཚོས་རྒྱལ་ཁམས་བཅོམ། ཁྲིམས་གཅོད་བདེན་པར་བྱས། གང་ཞལ་གྱིས་བཞེས་པ་ཐོབ། སེང་གེའི་ཁ་བཀག

34 མེ་དྲག་བསད། རལ་གྲིའི་ཁ་ལས་ཐར། སྟོབས་ཞན་པ་ལས་སྟོབས་ཅན་དུ་བསྒྱུར་ཞིང༌། དམག་གི་དཔའ་བོར་གྱུར་ནས་ཕྱི་རྒྱལ་གྱི་དམག་དཔུང་འབྲོས་སུ་བཅུག

35 བུད་མེད་རྣམས་ལ་རང་གི་ནང་མི་རྣམས་འཆི་བ་ནས་གསོན་པོར་གྱུར་ནས་ཐོབ། གཞན་རྣམས་མནར་གཅོད་མྱོང༌། འཆི་བ་ནས་སླར་གསོན་ཏེ་ཚེ་འདི་ལས་ལེགས་པ་འཐོབ་པའི་ཕྱིར་སྡུག་བསྔལ་དེ་ལས་སྒྲོལ་བའི་ཆེད་དུ་དཀོན་མཆོག་སྤོང་བར་ཁས་ལེན་མ་བྱས།

36 གཞན་རྣམས་ཀྱིས་འཕྱ་དམོད་དང༌། རྟ་ལྕག་གིས་བརྡུངས་པར་གྱུར་བ་མ་ཟད། ལྕགས་ཐག་གིས་བཅིངས་ནས་བཙོན་དུ་འཇུག་པའང་མྱོང༌།

37 ཁོ་ཚོ་རྡོ་རུབ་བཏང་ནས་བསད། སོག་ལེ་ཡིས་བསད། རལ་གྲི་ཡིས་བསད། ཁོ་ཚོས་ར་དང་ལུག་གི་ལྤགས་པ་གྱོན་ཏེ་འཁྱམས། དབུལ་ཞིང༌། མནར་གཅོད། སྡུག་བསྔལ་དྲག་པོ་མྱོང༌།

38 འཇིག་རྟེན་འདི་ལ་ཁོ་ཚོ་གནས་པ་འོས་པ་མིན་པས། ཁོ་ཚོ་འབྲོག་སྟོང་དང༌། རི་དང༌། བྲག་ཕུག ས་དོང་རྣམས་ལ་བསྡད་དུ་བཅུག

39 ཁོ་ཚོ་ཐམས་ཅད་དད་པའི་སྒོ་ནས་དཀོན་མཆོག་གི་གདེང་འཇོག་ཐོབ་ཀྱང༌། གང་ཞལ་གྱིས་བཞེས་པ་དེ་མ་ཐོབ།

40 གང་ཡིན་ཟེར་ན། དཀོན་མཆོག་གིས་ང་ཚོའི་དོན་ལ་དེ་ལས་ལེགས་པ་ཞིག་གནང་བས། ང་ཚོ་དང་བྲལ་བར་ཁོ་རྣམས་ཡོངས་སུ་རྫོགས་པར་མི་མཛད་པའི་ཕྱིར་རོ།།